“Hər şey müqayisədə ölçülür. Əhalisinin sayı Azərbaycanla eyni olan inkişaf etmiş ölkələrdə vəziyyət necədir, Azərbaycanda vəziyyət necədir? O ölkələrin bəzilərində bu günə qədər 10 minə yaxın insan vəfat etdi. Azərbaycanda vəfat edənlərin sayı kifayət qədər azdır”. Bunu Prezident İlham Əliyev yeni istifadəyə verilən DOST mərkəzi ilə tanışlıqdan sonra Azərbaycan Televiziyasına müsahibəsində deyib.
Ölkə başçısının sözlərinə görə, koronavirusla bağlı işlər əvvəldən Azərbaycanda çox düzgün istiqamətdə aparıldı: “Bunu həm Azərbaycan xalqı görür və təqdir edir, həm də beynəlxalq təşkilatlar. Bu günə qədər mən vətəndaşlardan gündə yüzlərlə məktub alıram. Yəni pandemiyanın ilk günlərindən minlərlə məktub almışam və bütün bu məktublar təşəkkür xarakterli məktublardır. Çünki doğrudan da qabaqlayıcı tədbirlərin görülməsi bizi böyük bəladan xilas etdi. Eyni zamanda, qabaqlayıcı, məhdudlaşdırıcı tədbirlər imkan verdi ki, biz pandemiyanın geniş vüsət almasının qarşısını alaq və buna nail olduq. Təsadüfi deyil ki, Ümumdünya Səhiyyə Təşkilatı bizim bu sahədə gördüyümüz işləri yüksək qiymətləndirir və Azərbaycanı nümunəvi ölkə adlandırır. Bu, bizim gördüyümüz işlərə verilən böyük qiymətdir. Mən bilmirəm başqa bir ölkəyə belə bir ad verilib, yoxsa yox. Bu, doğrudan da görülmüş işlərin məntiqi nəticəsidir”.
Həqiqətən də bir sıra inkişaf etmiş ölkələrin əhalisinin sayı Azərbaycanla eynidir, amma həmin ölkələrdə virusdan ölənlərin sayı dəfələrlə çoxdur. Məsələn, Belçika əhalisinin sayı Azərbaycan əhalisinin sayı qədərdir. Bu ölkədə koronavirusdan ölənlərin sayı 9 min nəfəri ötüb. Ölkə ərazisində 55 min nəfərdə koronavirus aşkarlanıb. Portuqaliyada qeydə alınan yoluxma hallarının sayı 30 minə yüksəlib. Pandemiya qurbanlarının sayı 1190-a çatıb. Bununla belə, İsveçdə indiyədək 26 min nəfərə koronavirus diaqnozu qoyulub. Onlardan 3 256 nəfər dünyasını dəyişib. Çexiyada koronavirusa yoluxanların sayı 8 475 nəfərdir. Bu ölkədə pandemiya zamanı ölənlərin ümumi sayı 298 nəfərə çatıb. Azərbaycanda isə indiyədək 3518 nəfərin koronavirus infeksiyasına yoluxması faktı müəyyən edilib, onlardan 2198 nəfər müalicə olunaraq sağalıb, 41 nəfər vəfat edib, 1279 nəfərin xüsusi rejimli xəstəxanalarda müalicəsi davam etdirilir.
Göründüyü kimi, Azərbaycanda koronavirusa həm yoluxanların, həm də bundan ölənlərin sayı sözügedən ölkələrlə müqayisədə dəfələrlə azdır.
“...əhalisinin sayı ölkəmizlə eyni olan bir sıra dövlətlərdə virusdan ölənlərin...”
Məsələyə münasibət bildirən şərqşünas Seyid Camal Əzimbəylinin sözlərinə görə, Azərbaycanda virusdan ölənlərin sayının bir sıra ölkələrlə müqayisədə qat-qat az olması görülən kompleks işlərin sayəsində mümkün oldu: “Məsələ ondadır ki, virus təhlükəsi ilə bağlı bir sıra qabaqlayıcı tədbirlər görüldü. Ölkəyə giriş-çıxış məhdudlaşdırıldı. O cümlədən, ölkə daxilində ciddi karantin rejimi tətbiq edildi. Çünki koronavirus təhlükəsinin bütün dünyada sürətlə genişlənməsi Azərbaycanın da önləyici addımlar atmasını zərurətə çevirdi. Pandemiyanın zərərlərini minimuma endirmək üçün dövlət tərəfindən əhəmiyyətli və sistemli tədbirlər görüldü. Prezident İlham Əliyev əhalini koronavirus təhlükəsindən qorumaq məqsədilə ilk gündən çevik qərarlar qəbul edir. Məqsəd sosial izolyasiya tədbirləri çərçivəsində virusun daha da geniş yayılmasının qarşısını almaqdır. Təsadüfi deyil ki, ölkəmiz yalnız regionda deyil, bütün dünyada koronavirus təhlükəsinə adekvat reaksiya verən, zamanında qabaqlayıcı tədbirlər görən azsaylı dövlətlərdən biridir. Bütün bunların nəticəsidir ki, əhalisinin sayı Azərbaycanla eyni olan bir sıra ölkələrdə virusdan ölənlərin sayı minlərlə olduğu halda, bizdə bu rəqəm 41 nəfərdir. Hesab edirəm ki, Azərbaycanda görülən qabaqlayıcı və digər tədbirlər çoxsaylı insanın xəstəlik qurbanı olmasının qarşısını aldı”.
Vidadi ORDAHALLI
