Azərbaycan manatının dollara nisbətdə məzənnəsinin enməsilə əlaqədar olaraq ölkədə bəzi dərman preparatlarının qiymətlərində dəyişikliklər ola bilər. Trend-in məlumatına görə, bunu jurnalistlərə açıqlamasında Yeni Azərbaycan Partiyasının İcra katibi - sədr müavini, Baş nazirin müavini Əli Əhmədov deyib.
Baş nazirin müavininin sözlərinə görə, bu qiymətlərin məzənnəyə uyğunlaşdırılması qaçılmazdır: "Qərarlaşmış qaydalara görə, Azərbaycanda dərmanların qiymətləri Tarif Şurası tərəfindən tənzimlənir. Məlum hadisə ilə əlaqədar olaraq qiymətlərə yenidən baxılacaq və məzənnədə baş verən dəyişikliyə uyğunlaşdırılacaq”.
Ə.Əhmədov bildirib ki, belə bir addımı atmaqla Azərbaycan hökumətinin məqsədi odur ki, Azərbaycan vətəndaşları dərmanların qiymətində müşahidə olunan süni qiymət artımından əziyyət çəkməsinlər: "Buna nail olunub. Amma indi atılan addım ondan ibarət olacaq ki, Azərbaycana dərman idxal edən iş adamları ziyana düşməsinlər. Bu olmayacaq da. Yenə də optimal bir variant işlənib hazırlanacaq, dərmanların qiymətinin süni şişirdilməsinə imkan verilməyəcək".
Əli Əhmədov deyib ki, Azərbaycanda manatın devalvasiyasından sonra ölkədə qiymətləri süni artıran şəxslər barədə tədbirlər görüləcək. Baş nazirin müavini bildirib ki, manatın məzənnəsinin dəyişməsindən sonra yaranmış vəziyyətdən faydalanmaq istəyənlər ortaya çıxır: "Bu, düzgün hərəkət deyil. Prezidentimiz bu cür hallara yol verənlərə dair münasibətini bildirib. İnanıram ki, fürsətdən istifadə edib, süni şəkildə, heç bir obyektiv əsas olmadan satdığı məhsulların qiymətlərini qaldırmağa çalışanlara qarşı Azərbaycan hökuməti, müvafiq qurumlar tərəfindən tədbirlər görüləcək”.
Ə.Əhmədov deyib ki, bu tədbirlər qanun çərçivəsində aparılacaq: "Çalışmaq lazımdır ki, Azərbaycan vətəndaşları əlavə əziyyət çəkməsin, yaranmış vəziyyətdə sıxıntı keçirməsin. Obyektiv olaraq qiymətlərdə baş verən artımlara gəldikdə isə, güman edirəm ki, bu, o qədər də böyük olmayacaq. Xüsusilə də yerli istehsalla əlaqədar olan məhsulların qiymətlərində ciddi artım olmayacaq. Ola bilsin ki, bu məhsulların bəzi komponentləri xaricdən gətirilir və onların gətirilməsi üçün xarici valyutadan istifadə olunur. Qiymət artımı da yalnız o dərəcədə ola bilər".
Baş nazirin müavini süni qiymət artımından faydalanmaq istəyənlərin arzularının reallaşmasına imkan verilməyəcəyini bildirib.
