Hüquqşünas-publisist, vətən savaşının iştirakçısı (sabiq komandiri), "Qızıl Qələm" mükafatı laureatı, uzun müddət DİO-da xidmət edən, hazırda "Polisə Dəstək" İB-nin sədri Şəmsəddin Əliyevin "Zaman Dəyişir" adlı yeni kitabı işıq üzü görüb.
"Zaman dəyişir" sayca müəllifin beşinci kitabıdır. Şəmsəddin Əliyev Kəbə evini ziyarət etdikdən sonra "Tanrıya sığınaq", sərhədin mühafizəsi ilə bağlı xidməti vəzifəsini icra edərkən şəhid olmuş oğlu leytenant Səbuhi Əliyevin xatirəsini əbədiləşdirən "Taleyimlə üz-üzə", hüquqşünas kimi çoxlu sayda akademik məqalələr, "Cinayətkarlıqla mübarizə", "Cinayətkarlığın elm kimi öyrənilməsi" tədris kitabları, "İnsan alveri ilə mübarizə, məişət zorakılıqları" və "Terrorizm - XXI əsrin müharibəsi" kitabçalarının da müəllifidir.
"Zaman dəyişir" kitabında tanınmış hüquqşünas Hacı Şəmsəddin Əliyevin son illərdə qələmə aldığı esselər, rekviyemlər, publisistik yazılar, cinayətkarlıqla mübarizənin vəziyyətinə dair akademik məqalələr və "Narahat gecələr" adlı bir detektivi toplanıb.
Kitab oxucular üçün faydalı ola bilər.
Məlumatı "Polisə Dəstək" İB-nin mətbuat xidməti yayıb.
