Aydın Mirzəzadə: "Bu onu göstərir ki, terrorizmə qarşı mübarizədə həm sərhəddə bir yerdə fəaliyyət göstərəcəklər, həm də..."
Məlum olduğu kimi, Azərbaycanın Rusiya ilə sərhəd rayonlarında "Sərhəd-sipər" əməliyyatına start verilib. Keçirilən sözügedən əməliyyatlar Azərbaycanın şimal bölgəsini əhatə edir. Bununla bağlı yayılan məlumata görə, "Sərhəd-sipər" şərti adı altında keçirilən əməliyyatlara Azərbaycanın daxili işlər orqanları ilə yanaşı, Rusiyanın hüquq-mühafizə orqanları da qatılıb.
Yerli sakinlərin verdiyi məlumata görə, aparılan əməliyyatlarla bağlı Xaçmaz və Qusar rayonlarında xüsusi polis postları qurulub. Polis əməkdaşları tərəfindən rayona girən və çıxan avtomobillər yoxlanır.
Hüquq-mühafizə orqanlarından mətbuata bildirilib ki, məlum əməliyyatlar Rusiya ilə Azərbaycan tərəfinin əldə etdiyi razılaşmaya əsasən aparılır. Əməliyyatın keçirilməsində əsas məqsəd hər iki dövlətin sərhədyanı ərazilərində transmilli mütəşəkkil cinayətkarlığa, qanunsuz miqrasiyaya, narkotiklərin, qanunsuz silah-sursatın dövriyyəsinə qarşı mübarizə aparmaqdır. Qeyd edək ki, əməliyyatın noyabrın 27-dək davam edəcəyi bildirilir.
Ümumilikdə, bu kimi əməliyyatların keçirilməsi terrorizmə qarşı mübarizədə, o cümlədən Yaxın Şərqdə fəaliyyət göstərən terrorçuların ölkəyə keçmə risqinin qarşısının alınmasında nə kimi əhəmiyyətə malikdir? Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Mirzəzadə buna müsbət prizmadan yanaşdı: "Əvvəla bu, iki dövlət arasında münasibətlərin yüksək səviyyədə olmasını göstərir. Məsələ ondadır ki, dövlətlər bir-birində daxili stabilliyin olmasında, terrorizmin olmamasında maraqlıdır. Eyni zamanda, heç bir halda kimlərsə bu iki ölkənin birində terror, stabilliyi pozmaq üçün mərkəzlər yaratmağa nail ola bilməyəcək. Həmçinin, kiminsə iki ölkə arasındakı sərhəddən istifadə edərək ölkələrimizi təhdid etməsinə imkan verilməyəcək. Bu onu göstərir ki, terrorizmə qarşı mübarizədə həm sərhəddə bir yerdə fəaliyyət göstərəcəklər, həm də terror və diversiya qruplarının keçməsinə imkan verməyəcəklər. Digər tərəfdən, bundan sonra sözügedən məsələlərdə fəaliyyətlərini koordinasiya edəcəklər. Ona görə də keçirilən birgə əməliyyatların potensial terror risqlərinə qarşı əhəmiyyəti böyükdür". Vidadi ORDAHALLI
