Akif Aşırlı: "Onlar ölkəmizlə bağlı həqiqətləri bilavasitə gözləri ilə gördülər"
Məlum olduğu kimi, Heydər Əliyev Fondunun və AZƏRTAC-ın təşkilatçılığı ilə Bakıda noyabrın 16-17-də Dünya Xəbər Agentliklərinin V Konqresi keçirilib.
Sessiyalarda "Multimedianın gələcəyi üçün jurnalistlərin təlimi", "Jurnalistlərin missiyasının qorunması: azadlıq, çıxış imkanı, təhlükəsizlik və münaqişə zonaları" və digər mövzularda müzakirələr aparılıb. Eyni zamanda, sözügedən tədbir çərçivəsində bir sıra səmərəli görüşlər keçirilib.
Qeyd edək ki, Azərbaycan nüfuzlu beynəlxalq media qurumlarının toplantılarına - Dünya Xəbər Agentliklərinin V Konqresinə, Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyasına və MDB Dövlət İnformasiya Agentlikləri Rəhbərləri Şurasının (İnformşura) XXII iclasına ev sahibliyi etdi. Tədbirlərdə dünyanın 80 ölkəsindən informasiya siyasətinin əsas istiqamətlərini müəyyənləşdirən 190-a yaxın xəbər agentliyinin rəhbərləri və təmsilçiləri, media üzrə beynəlxalq ekspertlər, BMT - UNESCO-nun rəsmi nümayəndəsi, həmçinin regional media qurumlarının əməkdaşları iştirak edib. Konqresdə dünyanın bütün qitələrindən xəbər agentlikləri təmsil olunub. Belə ki, Asiyanın 31 ölkəsindən 39 agentliyin 77 nümayəndəsi, Avropanın 23 ölkəsindən 30 agentliyin 51 təmsilçisi, Afrika qitəsinin 16 ölkəsindən 16 agentliyin 25 nümayəndəsi, Amerika qitəsinin 7 ölkəsindən 9 agentliyin 17 əməkdaşı, habelə Avstraliyanın 3 agentliyini təmsil edən 4 nümayəndə gəlib.
Bütövlükdə, belə bir tədbirin keçirilməsinin Azərbaycan üçün nə kimi əhəmiyyəti var?
Məsələyə münasibət bildirən "Şərq" qəzetinin baş redaktoru Akif Aşırlının sözlərinə görə, tədbirin Azərbaycan üçün böyük əhəmiyyəti var: "Əvvəla son illər Azərbaycan müxtəlif beynəlxalq tədbirlərə ev sahibliyi edir. Bu, ölkəyə hörmət gətirir. Müxtəlif sahələrlə - iqtisadi, mədəni, dinlərarası dialoqla bağlı tədbirlər keçirilir. Son tədbir də media sferasını əhatə edən bir tədbir idi. Dünyanın 80-dən çox ölkəsindən media təmsilçisi konqresə qatılmışdı. Dünyanın nüfuzlu agentliklərinin rəhbərləri iştirak edirdi. Onların arasında həm İslam, həm də Qərb dünyasının təmsilçiləri vardı. Onlar, təbii ki, Azərbaycanla bağlı həqiqətləri bilavasitə gözləri ilə gördülər. Hesab edirəm ki, tədbir çərçivəsində çox maraqlı diskussiya aparıldı. Azərbaycan Prezidenti İlham Əliyevin çıxışı çox əhəmiyyətli idi. Ümumiyyətlə, dünyada media siyasətinin ümumi mənzərəsini İlham Əliyevin çıxışında görmək olardı. Hesab edirəm ki, tədbir Azərbaycan üçün əhəmiyyətli oldu". Vidadi ORDAHALLI
