Yadigar Məmmədli: "İnternet üzərindən jurnalistika geniş yayıldığı üçün, dəyişən prinsiplər gözlənilməlidir"
Xəbər verildiyi kimi, Azərbaycanda internet informasiya məkanında dövlət başçısının - Prezidentin şərəf və ləyaqətini ləkələmə və ya alçaltma cəhdi cinayət məsuliyyəti yaradacaq.
Baş prokuror Zakir Qaralov bununla bağlı Cinayət Məcəlləsinin 323.1-ci (Azərbaycan dövlət başçısının -Azərbaycan Respublikası Prezidentinin şərəf və ləyaqətini kütləvi çıxışda, kütləvi nümayiş etdirilən əsərdə və ya kütləvi informasiya vasitəsində ləkələmə və ya alçaltma) maddəsinə əlavələrin edilməsi ilə bağlı Milli Məclisə təklif göndərib. Layihəyə əsasən, bu maddədə "və ya kütləvi informasiya vasitəsində" sözləri "kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında" sözləri ilə əvəz edilir.
Buna görə qüvvədə olan sanksiya 500 manatdan 1000 manatadək miqdarda cərimə və ya 2 ilədək müddətə islah işləri və ya eyni müddətə azadlıqdan məhrum etmədir.
Məcəlləyə 323.1-1 maddəsinin əlavə olunması da təklif edilir. Maddədə deyilir: "323.1-ci maddədə nəzərdə tutulmuş əməllər internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə törədildikdə, 1000 manatdan 1500 manata qədər cərimə və ya 3 ilədək azadlıqdan məhrum etmə ilə cəzalandırılır".
Maraqlıdır, son dəyişiklikləri media ekspertləri necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən Demokratik Jurnalistlər Liqasının rəhbəri Yadigar Məmmədli dəyişikliklərə müsbət prizmadan yanaşdı: "Məsələ ondadır ki, jurnalistikanın forması dəyişir. İnternet resurslarında fəaliyyət göstərən media orqanları artır. Əvvəllər yazılı və radio-televiziya forması var idisə, indi bu sahədə vəziyyət fərqlidir. İnternet üzərindən jurnalistika geniş yayıldığı üçün, dəyişən prinsiplər gözlənilməlidir. Yox, həmin prinsiplər pozularsa, o zaman eyni formada qanun qarşısında cavabdehlik daşımalıdırlar. Bu baxımdan indiki dövrdə, yeni medianın inkişaf etdiyi zamanda sözügedən məsələlər qanunla tənzimlənməlidir. Eyni əməllər, harada olmasından asılı olmayaraq, qanun qarşısında məsuliyyət yaradır. Çünki eyni mahiyyət kəsb edir. O üzdən, bununla bağlı edilən dəyişikliklərə müsbət prizmadan yanaşıram". Vidadi ORDAHALLI
