Məhərrəm Zülfüqarlı: "Ancaq arzuolunandır ki, gələcəkdə qanundan sui-istifadə edib əks proses getməsin"
Xəbər verildiyi kimi, Azərbaycanda internet informasiya ehtiyatında saxta istifadəçi ad və ya hesablarından istifadə edərək böhtan və təhqirlərə yol verməyin cinayət məsuliyyəti sayılması təklif edilir.
Baş prokuror Zakir Qaralov bununla bağlı Cinayət Məcəlləsinə 148-1 (İnternet informasiya ehtiyatında saxta istifadəçi adlar, profil və ya hesablardan istifadə edərək böhtan atma və ya təhqir etmə) maddəsinin əlavə edilməsi ilə bağlı Milli Məclisə təkliflər layihəsi təqdim edib.
Yeni maddəyə əsasən, internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə 1000 manatdan 1500 manata qədər cərimə və ya 360 saatdan 480 saata qədər ictimai işlər, yaxud 2 ilədək müddətə islah işləri və ya 1 ilədək müddətə azadlıqdan məhrum etmə ilə cəzalandırılır.
Yeni maddənin "Qeyd" hissəsində isə göstərilir ki, bu maddədə "saxta istifadəçi adlar, profil və ya hesablar" dedikdə internet informasiya ehtiyatlarında, o cümlədən sosial şəbəkələrdə istifadəçinin şəxsiyyətini eyniləşdirməyə imkan verməyən, yəni ad, soyad və ya ata adına dair yalan məlumat yerləşdirilmiş və ya belə məlumatlar gizlədilmiş, habelə digər şəxsə aid məlumatlardan onun razılığı olmadan istifadə edilməklə yaradılmış istifadəçi adlar, profil və ya hesablar başa düşülür.
Müvafiq olaraq Cinayət Prosessual Məcəlləsinə də uyğunlaşdırma düzəlişlər təklif edilir.
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı buna bir neçə kontekstdən yanaşdı: "Təbii ki, saxta profillər açıb internetdə, sosial şəbəkələrdə kimlərisə başqa adla təhqir, şantaj etmək yolverilməzdir. Təəssüflər olsun ki, sosial şəbəkələrdə zaman-zaman belə hallar baş verir. Ona görə də bu, qanunla tənzimlənməlidir və belə xoşagəlməz halların qarşısı alınmalıdır. Ancaq arzuolunandır ki, gələcəkdə qanundan sui-istifadə edib əks proses getməsin. Yəni kimlərisə şərləmək, yalan ittihamlarla həbsə atmaq da doğru deyil. Ona görə də hesab edirəm ki, qanun varsa, icrası da dəqiq olmalıdır. Buna rəğmən, belə təkliflərin irəli sürülməsi müsbət addımdır. Çünki saxta adla kimisə alçatmaq yolverilməzdir. Əlbəttə, o cür insanlar buna görə məsuliyyətə cəlb olunmalıdır. Çünki belə hallar cəmiyyətdə münasibətlərə mənfi təsir göstərir".
Vidadi ORDAHALLI
