Milli Məclisin Böyük Britaniya-Azərbaycan parlamentlərarası əlaqələr üzrə işçi qrupunun rəhbəri, millət vəkili Cavanşir Feyziyev və Böyük Britaniyadakı səfir Tahir Tağızadə Şotlandiya regional parlamenti sədrinin dəvətilə Edinburq şəhərində işgüzar səfərdə olub.
Səfər çərçivəsində nümayəndə heyəti Şotlandiya regional parlamentinin sədri cənab Ken Makintoş tərəfindən qəbul olunub. Görüşdə Azərbaycanın Böyük Britaniyadakı səfiri Tahir Tağızadə ölkələrimiz arasında mövcud siyasi, iqtisadi və mədəni əlaqələr haqqında Parlament sədrinə ətraflı məlumat verib və Azərbaycanla Böyük Britaniya arasında mövcud əlaqələrin yüksək səviyyədə olduğunu vurğulayıb.
Milli Məclisin Böyük Britaniya-Azərbaycan parlamentlərarası əlaqələr üzrə işçi qrupunun rəhbəri, millət vəkili Cavanşir Feyziyev Şotlandiya Parlamentinin sədrinə Azərbaycan Parlamenti haqqında ətraflı məlumat verib, eyni zamanda Milli Məclislə Şotlandiya Parlamenti arasında da ikitərəfli birbaşa əlaqələrin yaradılmasının əhəmiyyətindən danışıb.
Daha sonra Şotlandiya parlamentində təmsil olunan siyasi partiyaların rəhbərləri ilə işgüzar görüşlər keçirilib. Görüşlərdə Şotlandiya Mühafizəkarlar partiyasının, Şotlandiya Millətçi partiyasının, Şotlandiya Leyboristlər partiyasının və Şotlandiya Liberal-Demokrat partiyasının rəhbərləri və fəalları iştirak edib, tərəflər üçün maraq kəsb edən məsələlər ətraflı müzakirə olunub. Ermənistanın Azərbaycana qarşı hərbi təcavüzünün nəticələri aparılan müzakirələrdə diqqət mərkəzində saxlanıb. Hərbi işğal nəticəsində yaranmış bir milyondan çox qaçqın və məcburi köçkünün vəziyyəti və onların öz doğma torpaqlarına qayıtmaqda israrlı olması haqqında şotlandiyalı parlamentarilər ətraflı məlumatlandırılıb. Münaqişənin həlli istiqamətində işğalçı dövlətə qarşı beynəlxalq ictimaiyyətin təzyiqlərinin artırılması zərurəti qeyd edilərək, bu xüsusda müxtəlif parlament qurumları çərçivəsində məsələyə həssaslıq göstərən şotlandiyalı parlamentarilərin rolu təqdir edilib.
Görüşlərdə Azərbaycan-Böyük Britaniya ikitərəfli münasibətlərində xüsusi yer tutan Azərbaycanla Şotlandiya arasında iqtisadi, mədəni və təhsil sahələrində münasibətlərin hazırkı vəziyyəti və bu əməkdaşlığın genişləndirilməsi imkanları da müzakirə edilib.
Enerji sahəsinin ikitərəfli münasibətlərin mühkəmlənməsində xüsusi yerinin qeyd edildiyi görüşdə Azərbaycanın neft-qaz sektorunun inkişafında şotlandların rolu vurğulanıb. Eyni zamanda, çoxsaylı azərbaycanlı icmasının olduğu Aberdin şəhəri başda olmaqla, Şotlandiyanın bir sıra şəhərlərində azərbaycanlı icmasının günü-gündən öz fəaliyyətini genişləndirdiyi və cəmiyyətə uğurla inteqrasiya etdiyi nəzərə çatdırılıb. Təhsil sahəsində Bakı Ali Neft Məktəbi və Edinburq şəhərində yerləşən "Herriot-Vot" Universiteti arasında uğurlu əməkdaşlıq münasibətlərinin mövcudluğu, digər universitetlər arasında da buna bənzər qarşılıqlı faydalı əməkdaşlıq üçün potensialın olduğu nəzərə çatdırılıb.
Şotland parlamentarilərlə müzakirələrdə iki ölkənin parlamentləri arasında belə təmasların intensivləşdirilməsi, qarşılıqlı səfərlərin təşkili və parlamentlərarası münasibətləri daha da inkişaf etdirmək üçün Azərbaycanla Böyük Britaniya arasında parlamentlərarası işçi qrupların nəzdində mövafiq alt qrupların təsis edilməsi razılaşdırılıb.
Xəbər xidməti
