İbrahim Rüstəmli: "Belə bir vəziyyətdə kütləvi informasiya vasitələrinin yönləndirilməsi ümumi işimizin ancaq xeyrinə ola bilər"
Azərbaycanda hərbi vəziyyət zamanı hərbi vəziyyət tətbiq edilən ərazidə kütləvi informasiya vasitələri üçün xüsusi fəaliyyət rejimi tətbiq ediləcək. Bu, yenidən hazırlanmış "Hərbi vəziyyət haqqında" qanun layihəsinin müvafiq maddəsində əksini tapıb.
Maddədə bildirilir ki, ölkədə hərbi vəziyyət elan olunan zaman hərbi senzura tətbiq edilir. Hərbi senzura kütləvi informasiya vasitələrinin məlumat və materiallarının hərbi idarəetmə orqanları, dövlət orqanları və onların vəzifəli şəxsləri ilə əvvəlcədən razılaşdırılması, dövlət sirri təşkil edən məlumatların qanunsuz yayılmasının qarşısının alınması məqsədilə yazışma, televiziya və radio yayımına, telefon və radio danışıqlarına nəzarətin həyata keçirilməsindən ibarətdir.
Qanun layihəsi birinci oxunuşda Milli Məclisin plenar iclasına tövsiyə olunub.
Məlumat üçün deyək ki, 2014-cü ilin məlum avqust hadisələri zamanı cəbhə xəttində yaşanan olaylar bir sıra media qurumları tərəfindən qeyri-peşəkarcasına tirajlandı. Bəzi xəbər portalları dövlət sirri daşıyan hərbi xarakterli məlumatları ard-arda yaymaqla cəmiyyəti çaş-baş saldılar. Ona görə də indiki qanun layihəsi məhz bu cür neqativ halların qarşısının alınmasında mühüm rol oynaya bilər.
Maraqlıdır, bəs ekspertlərin buna münasibəti necədir? Sözügedən məsələyə münasibət bildirən hərbi ekspert İbrahim Rüstəmli dəyişikliklərə müsbət prizmadan yanaşır. Onun fikrincə, regionda və dünyada baş verən hadisələr informasiya məkanı üçün nəzərdə tutulmuş bir sıra qanun və qərarlarda müəyyən redaktə işlərinin aparılmasını günün tələbinə, zərurətə çevirib: "Biz artıq müstəqil bir dövlətin informasiya daşıyıcıları, media mənsublarıyıq. Əsas məsuliyyətimiz təmsil etdiyimiz ölkənin informasiya təhlükəsizliyinə yardımçı olmaqdır. Belə olan halda, hər hansı bir məhdudiyyət sənin xalqının, dövlətinin mənafeyinə xidmət edirsə, senzura kəlməsindən qorxmaq, çəkinmək lazım deyil. Fikrimcə, belə bir addımın atılması günün ən vacib tələblərindəndir. Çünki indiki məqamda söhbət ölkədə nə vaxtsa hərbi vəziyyətin elan olunmasından gedir. Belə bir vəziyyətdə kütləvi informasiya vasitələrinin yönləndirilməsi ümumi işimizin ancaq xeyrinə ola bilər. Çünki təcrübə bəzi media mənsublarının səriştəsizliyini, hərbi vəziyyətdə kifayət qədər ciddi qüsurlara yol verdiyini təsdiq edir. Onu da unutmaq lazım deyil ki, "hərb" ifadəsi xarakterinə görə daim məxfilik, məhdudiyyət, qadağa, konkretlik, peşəkarlıq, səbr, təmkin, uzaqgörənlik və s. kimi ciddi məqamları özündə ehtiva edir. O üzdən bu istiqamətdə maarifləndirmə işlərinin aparılmasını da zəruri məqamlardan biri kimi dəyərləndirirəm. Yalnız bu halda hansısa media mənsubu ondan tələb olunanları qorxu və həyəcanla deyil, anlayışla qarşılayacaq və qəbul edəcək".
Vidadi ORDAHALLI
