Bakı və San Dieqo şəhərləri arasında yaranmış münasibətlərin daha da inkişaf etdirilməsi və möhkəmləndirilməsi, eləcə də böyük sayda erməni icmasının mövcud olduğu Kaliforniyada Azərbaycanın təbliği məqsədilə Nəsimi Rayon İcra Hakimiyyəti başçısının rəhbərlik etdiyi 4 nəfərdən ibarət nümayəndə heyəti cari ilin 23-31oktyabr tarixlərində ABŞ-ın Kaliforniya ştatına səfər edib.
Nəsimi Rayon İcra Hakimiyyətindən baki-xeber.com-a verilən xəbərə görə, rayonun icra başçısı Asif Əsgərovun başçılıq etdiyi nümayəndə heyətinə Milli Məclisin deputatı Asim Mollazadə, Bakı Dağ Yəhudiləri Dini İcmasının rəhbəri Milix Yevdayev və Nəsimi RİH başçısı aparatının İnformasiya təminatı və təhlil sektorunun müdiri Məhəmməd Məmmədli daxil olub.
Xatırladaq ki, 2011-ci ildən etibarən Kaliforniyanın San Dieqo şəhərinin Svitzer Haylənd rayonu ilə Bakı şəhərinin Nəsimi rayonu arasında qardaşlaşma münasibətləri qurulub. Əhalisinin sayına görə Kaliforniyanın ikinci, ümumilikdə ABŞ-ın səkkizinci ən böyük şəhəri olan San Dieqo Kaliforniya ştatının siyasi və iqtisadi həyatında mühüm rol oynayır.
Oktyabrın 24-də nümayəndə heyəti Los Anceles şəhərində keçirilən Asiya Filmləri Dünya Festivalı çərçivəsində Heydər Əliyev Fondunun vitse-prezidenti Leyla Əliyevanın dəstəyi ilə ərsəyə gəlmiş «Əli və Nino» bədii filminin premyerasında iştirak edib. Azərbaycanın Los Ancelesdəki Baş Konsulluğunun dəstəyi ilə keçirilən premyerada Hollivud kino sənayesinin tanınmış nümayəndələri, Oskar və Emmi mükafatçıları və nominantları, müxtəlif kino prodüserləri, rejissorları və aktyorları və digər şəxslər iştirak edib.
Nəsimi rayonunun nümayəndə heyətinin şərəfinə oktyabrın 25-də San Diyeqo Şəhər Şurasında xüsusi mərasim keçirilib. Azərbaycanın müstəqilliyinin bərpasının 25-ci ildönümünə, eləcə də Bakı şəhərinin Nəsimi rayonu ilə San Dieqonun Svitzer Haylənd rayonu arasındakı münasibətlərin yaradılmasının 5-ci ildönümünə həsr olunmuş mərasimdə nümayəndə heyətimizlə Azərbaycanın Los Ancelesdəki baş konsulu Nəsimi Ağayev iştirak edib. Mərasimi açan San Dieqo Şəhər Şurasının sədri Şeri Laytner San Dieqo-Bakı münasibətlərinin önəmindən və Azərbaycan-ABŞ dostluq və tərəfdaşlıq münasibətlərindən danışaraq, Azərbaycan nümayəndə heyətinə Azərbaycanın Dövlət Müstəqilliyinin bərpasının 25-ci ildönümü ilə əlaqədar bəyannamə təqdim edib. Şəhər Şurasının bütün üzvləri tərəfindən imzalanan bəyannamə ilə 18 oktyabr tarixi San Dieqoda Azərbaycanın Müstəqillik Günü elan olunub. Tədbirdə nümayəndə heyətinin rəhbəri Asif Əsgərov çıxış edərək, Prezident İlham Əliyevin davamlı və dinamik inkişaf məntiqinə əsaslanan siyasətinin həyata keçirilməsi nəticəsində qazanılmış uğurları, Bakı şəhərinin son illərdə dünyanın ən gözəl şəhərlərindən birinə çevrildiyi, Bakı-San Dieqo münasibətlərinin ötən 5 il ərzində inkişafı, San Dieqo ilə tərəfdaşlıq münasibətlərinin bundan sonra daha da dərinləşdiriməsinin zəruriliyi, Azərbaycan-ABŞ münasibətlərinin möhkəm əsaslar və vacib dəyərlər üzərində qurulduğu, bu baxımdan Bakı-San Dieqo dostluğunun gözəl bir nümunə təşkil etdiyini vurğulayıb və ölkəmizdəki dini tolerantlıq, multikulturalizm ənənələrindən danışıb. Mərasimin sonunda San Dieqo Şəhər Şurasına Nəsimi Rayon İcra hakimiyyətinin hədiyyələri təqdim olunub. Səfər zamanı Kaliforniya Ştat Senatoru Marti Blok və onun ofisinin aparatının rəhbəri Kris Vard ilə görüş, San Dieqonun müharibə icması veteranları, daha sonra Tomas Jeferson Hüquq İnstitutunun rəhbəri Tomas Guernsey və institutun digər ziyalıları ilə birlikdə görüşlər keçirilib. Həmçinin Amerika-İsrail İctimai Əlaqələr Komitəsinin liderləri ilə görüş olub. Tədbirlərdə Azərbaycan milli sənət əsərlərindən ibarət hədiyyələr təqdim edilib. Oktyabrın 26-da səfər proqramı çərçivəsində San Dieqo Vilayəti Yəhudi Federasiyasının sədri Maykl Sonduk ilə San Dieqo Limanı Administrasiyası idarə heyətinin sədri Marşal Merifild ilə görüş keçirilib. Daha sonra San Dieqo Cevish Cournalda, San Dieqo Vilayəti Nəzarətçilər Şurasının sədri Ron Robert, Kaliforniya Ştat Assambleyasının üzvü Roki Çavez ilə görüş olub. Azərbaycanın Dövlət müstəqilliyinin bərpasının 25-ci ildönümünə və Bakı-San Dieqo münasibətlərinin yaradılmasının 5-ci ildönümü münasibəti ilə keçirilən ziyafətdə şəhər ictimaiyyətinin tanınmış nümayəndələri, o cümlədən Kaliforniya Ştat Assambleyasının üzvü Roki Çavez, San Dieqo Liman Administrasiyasının sədri Marşal Merifild, digər şəhər rəsmiləri və siyasətçilər, xarici diplomatlar, universitet professorları, mədəniyyət xadimləri, iş adamları və digər şəxslər iştirak edib. Ziyafətdə Nəsimi rayon nümayəndə heyəti tərəfindən çıxışlar edilərək Azərbaycanın qədim dövlətçilik ənənələrindən, müstəqilliyinin bərpasından, ümummilli lider Heydər Əliyevin hakimiyyətə qayıdışından sonra ölkənin dərin böhrandan xilas olmasından, Prezident İlham Əliyevin rəhbərliyi altında bu gün Azərbaycanın sabit və öz tolerantlığı ilə çoxlarına nümunə olan güclü bir dövlətə çevrilməsindən, Bakı və San Dieqo şəhərləri arasında yaradılmış əlaqələrin Azərbaycan-ABŞ tərəfdaşlığına və iki xalqın yaxınlaşmasına xüsusi dinamika verməsindən danışılıb. Tədbirdə, həmçinin, San Dieqo-Bakı Dostluq Cəmiyyətinin təsis olunduğu qeyd edilib. Kaliforniya Ştat Assambleyasının üzvü R.Çavez, San Dieqo Liman Administrasiyasının sədri Marşal Merifild öz çıxışlarında əldə etdiyi mütərəqqi nailiyyətlərlə Azərbaycanın son illərdə beynəlxalq aləmin diqqətini çəkdiyini, çətin bir bölgədə yerləşən və yüksək strateji önəm daşıyan Azərbaycanın ABŞ-ın yaxın tərəfdaşı və dostu olduğunu qeyd edilərək, dostluq əlaqələrinin gücləndirilməsi məqsədilə yaxın aylarda San Dieqo şəhərinin nümayəndə heyətinin Azərbaycana səfəri üzərində düşündüklərini bildiriblər. Çıxışının sonunda Azərbaycanın Müstəqillik Günü ilə bağlı R.Çavez Kaliforniya Ştat Assambleyasının fərdi qətnaməsini təqdim edib. Oktyabr ayının 27-də nümayəndə heyəti Los Anceles şəhərinə yola düşüb, 28-i tarixdə Los Anceles Amerika Yəhudi Komitəsinin üzvləri ilə, sonra isə İsrail Konsulu ilə görüşlər keçirilib. Nəsimi rayon nümayəndə heyətinin San Dieqoya səfəri zamanı keçirilən görüşlərdə və həmçinin tərəflər arasında qarşılıqlı maraq doğuran məsələlər ətrafında geniş müzakirələr zamanı San Diyeqolu iş adamları ölkəmizə investisiyalar yatırılmasına dəvət edilib və əlaqələrin qarşılıqlı davam etdirilməsi qərara alınıb.
