Elçin Mirzəbəyli: "BTQ layihəsi təkcə Azərbaycan üçün deyil, bütün bölgə dövlətləri üçün strateji əhəmiyyət kəsb edir"
Məlum olduğu kimi, Bakı-Tiflis-Qars (BTQ) dəmir yolunun işə salınmasına çox az qalıb. Artıq gələn ildən sözügedən dəmir yolunun fəaliyyət göstərəcəyi gözlənir. Yol istifadəyə verildikdən sonra sərnişinlər qatarla Bakıdan Qarsa 1 sutkaya gedə biləcək.
Bu yoldan istifadə etməklə, Azərbaycan vətəndaşları qatarla Türkiyəyə, oradan da Avropaya səfər edə biləcək. Bakıdan Türkiyə sərhədinə 800 kilometrdir. Bu yolda bəzi vaqonlar istisna olunmaqla, bütün yük və sərnişin vaqonları hərəkət edə biləcək. Yol ən müasir standartlara cavab verəcək.
Məlumat üçün qeyd edək ki, BTQ-nin tikintisi ilə bağlı Azərbaycan, Gürcüstan və Türkiyə arasında yekun sənəd 2007-ci il fevralın 8-də Tiflisdə imzalanıb. Yeni dəmir yolunun Gürcüstan hissəsində tikinti işlərinə 2007-ci il noyabrın 21-də, Türkiyə ərazisində isə 2008-ci il iyulun 24-də start verilib. Ötən müddət ərzində bəzi səbəblərdən dəmir yolunun açılışı yubanıb. Bütün bunlara baxmayaraq, artıq işlər son mərhələyə qədəm qoyub.
Sözügedən dəmir yolu istifadəyə verilərkən media təmsilçilərinin səfər turunun təşkilinə ekspertlər necə yanaşır?
Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, belə bir təşəbbüs çox müsbət ideyadır: "O üzdən bunu dəstəkləmək lazımdır. Çünki çox maraqlı təşəbbüsdür. Nəzərə almaq lazımdır ki, bu cür ənənələr hər zaman olub. O cümlədən Azərbaycanın da təcrübəsində oxşar ənənələr var. Eyni zamanda nəzərə alsaq ki, BTQ layihəsi təkcə Azərbaycan üçün deyil, bütün bölgə dövlətləri üçün strateji əhəmiyyət kəsb edir, o üzdən buna diqqət etmək lazımdır. Son dövrdə Azərbaycan, Gürcüstan və Türkiyənin başa çatmasını gözlədiyi ən önəmli layihələrdən biridir, o zaman bu prosesdə medianın iştirakı önəmli olardı. Açılış mərasimində mətbuat nümayəndələrinin də qatarla səfər etməsi çox maraqlı hadisə olardı. Eyni zamanda, bütövlükdə bu tarixi hadisənin hər anının tarixə çevrilməsinə, tarixə qovuşmasına imkan yaradardı. Ona görə də media təmsilçilərinin bunda iştirakı çox yaxşı olardı". Vidadi ORDAHALLI
