Novella Cəfəroğlu: "Biz bu prosesdə tərəfə çevrilmək niyyətində deyilik və onların işlərinə qarışmırıq"
Azərbaycandakı problemli məhbusların siyahısını müəyyən etmək istəyən fərqli qruplar arasında ciddi fikir ayrılığı yaranıb. Hətta vəziyyət o həddə çatıb ki, keçmiş dostların belə düşmənə çevrilə biləcəyi ilə bağlı məlumatlar dolaşır.
Xüsusilə də bu narazılığın Əli Kərimli ilə jurnalist Xədicə İsmayıl arasında yaşandığı bildirilir. Oktyabrın 17-də Xədicə İsmayılın rəhbərlik etdiyi işçi qrupunun hazırladığı siyahı açıqlandı. Ayın 18-də isə Leyla Yunus, Oqtay Gülalıyev və Elşən Həsənov tərəfindən ayrı siyahı tərtib olundu. Hər iki siyahı "Vahid İşçi Qrupu"nun siyahıları kimi açıqlandı. Əli Kərimli və Milli Şura sədri Cəmil Həsənli Leyla Yunusun rəhbərlik etdiyi qrupun siyahısını dəstəkləyərək Xədicə İsmayılın təşəbbüsünü rədd etdi.
Hətta Əli Kərimli araşdırmaçı jurnalistin siyahısına kurasiyasına daxil olan mətbuat orqanlarında dəstəyin verilməsinə və təbliğatına qadağa qoydu. AXCP sədrinin bu addımı Xədicə İsmayılın narazılığına səbəb oldu, nəticədə o və Cəmil Həsənli jurnalist tərəfindən ağılsız və ambisiyalı olmaqda ittiham edildi.
Əslində davanın nəyin üstündə getdiyi aydındır. Məlumdur ki, hazırlanmış siyahılar xarici təşkilatlara, beynəlxalq insan haqları qurumlarına və bir sıra dövlətlərin QHT-lərinə təqdim olunacaq. Adları siyahıya salınacaq məhbuslara donor təşkilatlardan pullar ayrılacaq. Çox maraqlıdır ki, problemli məhbusların işi ilə bağlı Azərbaycanın hökumət qurumları ilə İşçi Qrup formatında yaxından əməkdaşlıq edən hüquq müdafiəçilərinin bu məsələyə reaksiyası müşahidə edilmir. Onların məsələyə reaksiyası necədir, təqdim olunan iki siyahıdan hansını daha məqbul sayırlar?
İşçi Qrupda təmsil olunan hüquq müdafiəçisi Novella Cəfəroğlunun sözlərinə görə, problemli məhbuslarla bağlı məsələyə onların yanaşması fərqlidir: "Bizim öz siyahımız var və neçə illərdir bu siyahı əsasında işləyirik. Digər siyahıları nəzərə almırıq və izləmirik. Bu siyahı daim dəyişir. Çünki daim araşdırmalar aparırıq.
Fərqli siyahılar təqdim edənlərin bir-birinə qarşı müəyyən fikirlər söylədiklərindən məlumatlıyıq. Odur ki, biz bu prosesdə tərəfə çevrilmək niyyətində deyilik və onların işlərinə qarışmırıq. İkincisi, hesab edirik ki, saxlanan dindarlarla bağlı məhkəmələri gözləmək, onların gəldiyi qərarları bilmək vacibdir. Həmçinin düşünürük ki, onların məhkəmə prosesi obyektiv keçməli, bir çoxları azadlığa buraxılmalıdır. Bu məsələləri daha dəqiq araşdırmaq lazımdır. Əslində siyahı tərtib etmək və mümkün qədər ora daha çox adamın adını əlavə etməkdə məqsədin nə olduğunu siz məndən də yaxşı bilirsiniz. Daha çox adamın adının siyahıya salınması hansısa bir üstünlük yaratmır. Bizim həmin hüquq müdafiəçiləri ilə hər hansı bir kontaktımız yoxdur. Həm də biz təkcə siyahımızda olan məhbusları deyil, eyni zamanda yüzlərlə insanı qarşılığında nəsə gözləmədən müdafiə edirik. İşçi Qrupu bu yaxınlarda toplaşacaq. Bizim İşçi Qrupunda fəaliyyət göstərən bir sıra qurumlarla görüşlərimiz olur. Konkret olaraq Daxili İşlər Nazirliyi, Prokurorluq, Ədliyyə Nazirliyi rəhbərliyi ilə fərdi görüşlərimiz olur, hansısa problemləri qaldırırıq".
Məhəmmədəli QƏRİBLİ
