Arzu Nağıyev: "DTX daha bir terroru rüşeymdə məhv etdi"
Azərbaycan Respublikası Dövlət Təhlükəsizliyi Xidmətinin (DTX) bir neçə gün əvvəl terrorçulara qarşı keçirdiyi əməliyyatın bəzi təfərrüatı məlum olub. Terrorçulardan "Ömər" ləqəbli A.Quliyev oktyabrın 26-da Bakı şəhəri, Qaradağ rayonu, Ələt qəsəbəsində zərərsizləşdirilib.
Belə ki, DTX əməkdaşları terrorçuluq fəaliyyətində şübhəli bilinən 21 yaşlı A.Quliyevin Bakı-Ələt yolunda hərəkətdə olan Bakı-İstanbul avtobusunda olmasını müəyyənləşdirib.
Əməliyyatçılar A.Quliyevi avtobusdan endirmək istəyərkən o üzərində olan əl qumbarasını partlatmaqla müqavimət göstərməyə çalışıb. "Bu zaman DTX əməkdaşları yüksək peşəkarlıq nümayiş etdirərək avtobusda olan şəxslərin və Bakı-Ələt yolunda olan digər nəqliyyat vasitələrinin təhlükəsizliyini təmin etmək məqsədilə "Ömər"ə atəş açaraq onu zərərsizləşdirib", - deyə, hüquq-mühafizə orqanlarındakı mənbə vurğulayıb.
Xatırladaq ki, DTX-nin İctimai əlaqələr şöbəsi keçirilmiş əməliyyatla bağlı məlumat yayıb. Məlumata əsasən, A.Quliyevlə yanaşı, daha bir terrorçu məhv edilib, digəri isə tutulub.
Məlumatda bildirilib ki, Azərbaycan Respublikasında terror aktları və silahlı basqınlar törətməyi planlaşdıran, ölkə hüdudlarından kənardakı silahlı münaqişələrdə iştirak edən terrorçu silahlı birləşmələrin tabeçiliyini qəbul edərək onlarla əlaqəli qanunsuz fəaliyyət göstərən silahlı dəstə yaradıldığı barədə Dövlət Təhlükəsizliyi Xidmətinə daxil olmuş məlumat aparılan araşdırmalarla təsdiqlənib və təxirəsalınmaz əks tədbirlərin görülməsini zəruri edib. Müəyyən olunub ki, Azərbaycan Respublikasının vətəndaşları F.Rüstəmov, A.Quliyev, A.Gülməmmədov və digərləri ölkə hüdudlarından kənarda fəaliyyət göstərən radikal dini terrorçu silahlı birləşmələrin nümayəndələrinin internet vasitəsilə göndərdikləri gizli tapşırıqlar əsasında terror təşkilatının Azərbaycanda "Qafqaz camaatı" adlı silahlı qolunun yaradılması, rəhbərinin seçilməsi, təşkilatlanaraq dini ekstremizm zəminində digər şəxslərin cinayətkar fəaliyyətə cəlb edilməsi məqsədilə sövdələşmələr aparıb, qanunsuz olaraq odlu silah və partlayıcı vasitələr əldə edib terror aktları və silahlı basqınlar törətməyə hazırlıq hərəkətləri görüblər. Onlar müxtəlif tarixlərdə gizli toplaşaraq ölkədən kənarda fəaliyyət göstərən terror təşkilatının rəhbərinə mütləq tabeçiliklərini və sədaqət andını bəyan etmələrinin videoçəkilişini aparıb, cinayətkar niyyətlərinin həyata keçirilməsi, əlavə silah-sursat əldə edilməsi, vəsait toplanması üçün tədbirlər görüb, ayrı-ayrı şəxslərə hədə-qorxu altında aylıq ödənişlər tətbiq edib, basqın ediləcək konkret şəxslərin güdülməsini həyata keçirib, ictimai qaydanı pozmaq, əhali arasında vahimə yaratmaq məqsədilə planlaşdırılan xüsusilə ağır cinayət əməlinin törədilməsi ilə bağlı dəstə üzvləri arasında vəzifə bölgüsü aparıblar.
Dini ekstremizm zəminində ağır və xüsusilə ağır cinayətlər törətmək məqsədilə yaradılan cinayətkar birlikdə iştirak etmə, odlu silahdan istifadə etməklə terrorçuluğa və quldurluğa hazırlıq əməllərini törətmələrinə əsaslı şübhələr olan A.Quliyev, F.Rüstəmov və A.Gülməmmədovun saxlanması üzrə 26-27 oktyabr 2016-cı il tarixlərində respublikanın müxtəlif rayonlarında kompleks əməliyyat tədbirləri həyata keçirilib, bu zaman saxlanmasına müqavimət göstərərək ictimai yerdə "F-1" tipli əl qumbarasını partlatmağa cəhd edən A.Quliyev, habelə "Steçkin" markalı tapançadan istifadə edərək xidməti vəzifələrini yerinə yetirən əməkdaşlara atəş açıb silahlı müqavimət göstərən F.Rüstəmov ətrafdakıların həyat və sağlamlığının ümumi təhlükəli, real və qəfil cinayətkar qəsddən qorunması və cinayətkar əməllərə qarşı cavab tədbiri olaraq xüsusi əməliyyat qrupu tərəfindən xidməti silahdan istifadə edilməklə məhv edilib, A.Gülməmmədov isə şübhəli şəxs qismində tutulub.
Fakt üzrə Dövlət Təhlükəsizliyi Xidməti İstintaq baş idarəsi tərəfindən Azərbaycan Respublikası Cinayət Məcəlləsinin 218.2, 28,181.2.1, 28,214.2.1, 28,214.2.3 və 228.1-ci maddələri ilə cinayət işi başlanıb.
Hazırda istintaq-əməliyyat tədbirləri davam etdirilir.
Qeyd edək ki, Azərbaycanda hansısa terror qruplaşmasının bazası və ya təlim mərkəzi yoxdur. Bu vəziyyəti öz müsahibəsində Prezident İlham Əliyev də şərh etmişdi. "Sputnik" kanalına müsahibəsində İlham Əliyev vəziyyəti belə qiymətləndirib: "... onlar hər gün Avropa ölkələrində, MDB məkanında, Yaxın Şərqdə, "qaynar nöqtə"lərdə nələrin baş verdiyini görürlər. Müharibə, qan, dağıntılar. Bu, Azərbaycan xalqını daha da birləşdirir və radikalizm əleyhinə ən yaxşı "peyvənd"dir. Buna baxmayaraq, biz bir dəqiqə də olsun məhz müasirliyə, dünyəviliyə, xeyrin şərdən üstün olmasına yönəlmiş siyasətimizlə bağlı fəaliyyətimizi zəiflətməməliyik. Biz bu istiqamətdə mütəmadi işləyirik".
DTX-nin keçirdiyi əməliyyatın təfərrüatı barədə qəzetimizlə fikirlərini bölüşən xüsusi xidmət orqanlarının sabiq əməkdaşı Arzu Nağıyevin sözlərinə görə, terrorçuların zərərsizləşdirilməsi ilə bağlı keçirilən əməliyyat heç də onların ölkəmizdə ifrat fəallaşmasına dəlalət etmir: "Xüsusi xidmət orqanları daim bu sayaq hallara qarşı ayıq olub. Bunun terrorçu qruplaşmaların Yaxın Şərqdə itirilən mövqeləri fonunda burada fəallaşa bilməsilə zərrə qədər də əlaqəsi yoxdur. Lakin həmin terror qruplarına biət edən dəstələrin olması artıq faktdır. Bildiyiniz kimi, həmin dəstə üzvləri "Qafqaz camaatı" deyilən və əsasən Rusiyada, daha doğrusu, Dağıstanda və Şimali Qafqazın bir sıra məntəqələrində fəaliyyət göstərir. Təbii ki, bunlar bir mərkəzdən idarə olunur və maliyyələşdirilir. Son əməliyyat çox təqdirəlayiqdir. DTX daha bir terroru rüşeymdə məhv etdi. Bununla belə, sosial şəbəkələr və internet vasitəsilə bu qruplara cəlbetmənin davam etdirilməsi də faktdır.
Təbii ki, əməliyyat-axtarış fəaliyyətini davam etdirmək üçün onların diri ələ keçirilməsi daha məqsədəuyğundur, lakin artıq həmin qruplar silahlı müqavimət göstərirsə, məhv edilməsi qaçılmaz olur".
Məhəmmədəli QƏRİBLİ
