Dünən Azərbaycan Mətbuat Şurasının İdarə Heyətinin iclası keçirilib. MŞ sədri Əflatun Amaşov iclası açaraq müzakirəsi tövsiyə olunan məsələlər barədə məlumat verib. Gündəliyə 2 məsələnin daxil edilməsi qərara alınıb.
Öncə Mətbuat Şurası sıralarına qəbula baxılıb. Şuraya ərizə ilə müraciət edən hər bir kütləvi informasiya vasitəsinin baş redaktorları dinlənib. Onlar həmin KİV-lərin fəaliyyət istiqamətləri barədə məlumat verib.
İdarə Heyəti üzvləri "Milli Məclis", "Elm-Nauka", "Le Carrefour" ("Yol qovşağı"), "Bələdiyyə həyatı", "Vedibasar", "Şəki bələdiyyəsi" qəzetlərinin, "Multikulturalizm", "Olimpə doğru", "Mədəniyyət.AZ", "Xəbərlər məcmuəsi" və "Elm və həyat" jurnallarının, "Report.az", "Media news.az", "Olimpnews.az", "Avropa.info", "Arazmedia.az", "7news.az" saytlarının MŞ-yə qəbuluna səs verib.
Sonra Mətbuat Şurasının Şikayətlər üzrə Komissiyasının və "Reket jurnalistika"ya qarşı mübarizə Komissiyasının rəyləri əsasında qərarların qəbulu məsələsinə baxılıb. "Reket jurnalistika"ya qarşı mübarizə Komissiyasının sədri Vüqar Rəhimzadə rəhbəri olduğu komissiyanın bu müddətdə 2 iclasının keçirildiyini, 20-dək məsələyə baxıldığını bildirib. O, "Qanun və şah" qəzeti, "Dünyaxeber.com", "Yukaz.az" saytlarının adlarının MŞ-nin "qara siyahı"sına salınması üçün kifayət qədər əsasların olduğunu nəzərə çatdırıb, "365info.az" və "Haqqınsəsi.com" saytları ilə bağlı isə əlavə araşdırmalara ehtiyacın olduğunu deyib. Məsələ səsə qoyulub və qərara alınıb ki, "Qanun və şah" qəzetinin, "Dünyaxeber.com", "Yukaz.az" saytlarının adları MŞ-nin "qara siyahı"sına daxil edilsin. Digər 2 sayta isə Mətbuat Şurası tərəfindən xəbərdarlıq olunsun və onlarla bağlı araşdırmalar davam etdirilsin.
İclasda "Bizim dövr" qəzetinin adının MŞ-nin "qara siyahı"sına yenidən qaytarılması barədə qərar çıxarılıb. İdarə Heyətinin iclasda iştirak edən bütün üzvləri məsələyə münasibətini bildirib. Çıxışlarda vurğulanıb ki, qəzetin adı həmin siyahıdan çıxarıldıqdan sonra bir müddət onun barəsində MŞ-yə şikayətlər daxil olmayıb. Lakin son vaxtlar belə hallar intensiv şəkil alıb. Qəzetin rəhbərliyi ilə komissiyaların iclaslarında dəfələrlə söhbətlər aparılmasına, iradlara və tövsiyələrə baxmayaraq, bu KİV-in fəaliyyətində dönüş yaratmaq meylləri nəzərə çarpmayıb. Buna görə də İdarə Heyəti "Bizim dövr" qəzetinin adının yenidən "qara siyahı"ya salınmasını qərarlaşdırıb.
Xəbər xidməti
