Seyid Camal Əzimbəyli: "Sübut olunur ki, Azərbaycan dünyaya yalnız neftini deyil, eyni zamanda birlik və bərabərliyi də ixrac etməyə qadir ölkədir"
Azərbaycan Prezidenti İlham Əliyev "Rossiya seqodnya" Beynəlxalq İnformasiya Agentliyinin baş direktoru Dmitri Kiselyova "Sputnik Azerbaydjan" üçün verdiyi müsahibədə müsəlman ölkəsi kimi bizim əldə etdiyimiz üstünlüklərdən bəhs edib:
"Mən belə deyərəm: bizim ölkənin daxilində bu baxımdan təhlükə yoxdur. Bizim cəmiyyət milli ideya ətrafında sıx birləşib. Bu ideya bizim dəyərlərin prioritetindən, multikulturalizmin inkişafından ibarətdir. Yeri gəlmişkən, bu il Azərbaycanda "Multikulturalizm ili" elan edilib. Bizim cəmiyyət Azərbaycanın ərazi bütövlüyünün bərpa edilməsi, həmçinin, müstəqilliyimizin möhkəmlənməsi, bütün iqtisadi və sosial məsələlərin həlli ideyası ətrafında birləşir. Buna görə də bizdə radikallara yer yoxdur: istər iqtisadi, istərsə də sosial baxımdan bu cür baza yoxdur. Çünki praktiki olaraq yoxsulluq yoxdur. Onlar haradan özlərinə tərəfdarlar toplayır? Onlar əsasən yoxsul təbəqələrdən toplayır. Azərbaycanda savadlılıq yüz faizdir. Yenə də radikalları haradan toplayırlar? Savadsız kütlədən. Çünki belə mühit yoxdur. Amma bizim ətrafımızda belə deyil. Buna görə bizim üçün əsas məsələ özümüzü mənfi xarici təsirdən, o cümlədən dini ekstremizmin təsirindən qorumaqdır. Bizim cəmiyyət öz köklərinə - həm milli, həm mənəvi, həm dini köklərinə dərindən bağlıdır. Biz ziyarətgahlarımıza ehtiram bəsləyir və bu məsələyə çox qayğı ilə yanaşırıq. Lakin, eyni zamanda, bizim cəmiyyət dünyəvi, müasir cəmiyyətdir. Zənnimcə, Azərbaycanın timsalında müasir dünyəvi müsəlman ölkəsinin nümunəsi hələ yetərincə öyrənilməyib, o çox ölkələr üçün yaxşı nümunə ola bilərdi. Buna görə də radikalizmə qarşı mübarizə baxımından bizim üçün əsas məsələ özümüzü mövcud kənar fiziki və informasiya təhlükələrindən qorumaqdır. Lakin bunun üçün müvafiq orqanlar var, onlar ölkəmizin təhlükəsizliyini təmin edirlər və buna görə də Azərbaycan ətrafda gördüklərimizin hamısının fonunda sabitlik, inkişaf və asayiş məkanı kimi qalır. Biz, vətəndaşlarımız bunu çox yüksək dəyərləndiririk. Onlar qaynar nöqtələrdə, Avropa ölkələrində, MDB məkanında, Yaxın Şərqdə nələr baş verdiyini hər gün görürlər. Müharibə, qan, dağıntılar. Bu, bizim cəmiyyətimizi daha sıx birləşdirir. Bu, radikalizmə qarşı ən böyük "peyvənddir". Lakin bütün bunlara baxmayaraq, biz öz siyasətimizin - məhz müasirliyə, dünyəviliyə, xeyrin şər üzərində üstünlüyünə yönəlmiş siyasətimizin həyata keçirilməsi üzrə fəaliyyətimizi bir an belə zəiflətməməliyik. Biz mütəmadi olaraq bu istiqamətdə işləyirik".
Göründüyü kimi, ölkə başçısı İlham Əliyev Azərbaycanın timsalında müasir dünyəvi müsəlman ölkəsinin nümunəsinin hələ yetərincə öyrənilmədiyini bildirib.
Bu nümunənin lazımınca mənimsənilməsi dünya üçün nə verə bilərdi?
Şərqşünas Seyid Camal Əzimbəyli qəzetimizə açıqlamasında bildirdi ki, ölkə başçısının müsahibəsini diqqətlə oxuyub: "Ölkə başçısı respublikamızda olan dini atmosferi çox dəqiq izah etdi. Hesab edirəm ki, Azərbaycanda olan tolerantlıq, multikultural dəyərlərə bəslənən hörmət nəinki islam aləmi, eləcə də bütün başqa dinlər üçün nümunə olmalıdır. Mən dünyanın müxtəlif ölkələrində oluram. Tam məsuliyyətilə deyərdim ki, bizim bu sahədə qazandığımız uğurun 30 faizi heç ən demokratik ölkələrdə belə yoxdur. Doğrudan da bizim təcrübənin lazımınca öyrənilməsinə böyük zərurət var. Hələ mən deyərdim ki, bu modelin dünyada tədrisi həyata keçirilməlidir. Sübut olunur ki, Azərbaycan dünyaya yalnız neftini deyil, eyni zamanda birlik və bərabərliyi də ixrac etməyə qadir ölkədir. Hesab edirəm ki, bu nailiyyətlərin qazanılmasında xalqımızın dəyərlərə böyük önəm verməsilə yanaşı, dövlət və onun başçısının da böyük rolu var. Hətta biz bu məsələyə o qədər önəm veririk ki, 2016-cı ili dövlət səviyyəsində bu dəyərlərin qorunmasına, təbliğinə aid etmişik. Bu baxımdan dünya bizdən çox detalları öyrənə bilər".
Məhəmmədəli QƏRİBLİ
