Azərbaycanda əmək pensiyaçılarının sayı son 7 ildə 216 657 nəfər azalıb. Belə ki, 2017-ci ildə 1 315 229 nəfər əmək pensiyaçısı olduğu halda, ötən il bu rəqəm 1 098 572 nəfər olub.
Yəni 2017- 2024-ci illərdə əmək pensiyaçılarının sayı 216 657 nəfər azalıb.Sayın azalmasının əsas səbəbi nədir və azalma növbəti illərdə də davam edəcəkmi?
Xalid Kərimli: “Ölkədə əmək pensiyaçılarının sayının azalmasının əsas səbəbi pensiya yaşının uzadılmasıdır”
İqtisadçı Xalid Kərimli hesab edir ki, ölkədə əmək pensiyaçılarının sayının azalmasının əsas səbəbi pensiya yaşının uzadılmasıdır: “Məlumdur ki, əvvəl qadınlarda pensiya yaşı 60, kişilərdə isə 62 yaş idi. Lakin 2017-ci ildə qəbul edilmiş qanunverciliyə görə, kişilərin pensiya yaşı həmin dövrdən hər il 6 ay uzadılmaqla 65-ə, qadınların isə 60 yaşdan sonra hər il 6 ay uzadılmaqla 65 yaşa çatdırılması nəzərdə tutuldu. Kişilərdə artıq pensiya yaşı 65, qadınlarda 64-dür. 2027-ci ilə qədər qadınların da pensiya yaşı kişilərlə eyniləşəcək. Təbii ki, sözügedən qərar pensiyaçıların sayına təsir göstərir”.
Natiq Cəfərli: “Təqaüd yaşına çatacaq və ya təqaüd yaşında olan yaşlı insanların müxtəlif xəstəliklər üzündən həyatdan köçməsinin də statistik rəqəmlərə təsiri var”
İqtisadçı ekspert Natiq Cəfərlinin fikrincə, Azərbaycanda qanunvericiliyə edilən dəyişikliyə görə, hər il 6 ay olmaqla təqaüd yaşının artırılması təqaüdçülərin sayına təsir göstərən başlıca amillərdən biridir: "Təqaüd yaşına çatacaq və ya təqaüd yaşında olan yaşlı insanların müxtəlif xəstəliklər üzündən həyatdan köçməsinin də statistik rəqəmlərə təsiri var. Həmçinin qanunvericiliyə edilən bəzi dəyişikliklərlə vaxtından əvvəl təqaüdə çıxmaq məhdudlaşdırıldı, əlilliyi olan insanlar üçün müəyyən tələblər sərtləşdirildi, təsnifat dəyişdirildi, artıq pensiya birinci, ikinci və ya üçüncü qrup əlilliyə görə deyil, faiz nisbəti ilə hesablanmağa başlandı. Beləliklə, bütün bunlar təqaüdçülərin sayının azalmasına təsir edir. Azərbaycanda təqaüd sisteminə, təqaüd yaşı məsələsinə, təqaüdə çıxanların təsnifatına yenidən baxılmasına, bəlkə də təqaüd yaşının azaldılmasına ehtiyac var. Çünki ölkədə demoqrafik dinamikaya baxanda təqaüd yaşının artırılmasının o qədər də əhəmiyyəti olmadığını görürük. Məsələn, Avropada əhali qocadır, doğuş dinamikası aşağıdır, gənclərin sayı azdır, bu da gələcəkdə iş yerləri ilə bağlı problemlər yaradacaq deyə təqaüd yaşını artırırlar. Bizdə isə bununla bağlı problem yoxdur".
Günel CƏLİLOVA
