Xatirə Kitabının möhtəşəm “44 gün - Tarixi Zəfər”i Lənkəranda... II YAZI

Azərbaycanın Cənub bölgəsi həm təbiəti, həm də insanlarının mənəvi dünyası ilə zəngindir. Bura vətənpərvər insanların doğulduğu, ərsəyə çatdığı yerdir. Bilmirəm buranın torpağındandır, suyundandır, havasındandır, insanlarının təbiətindəndir, nədirsə, bu bölgənin insanları çox vətənpərvərdir. Biz həm Birinci Qarabağ, həm İkinci Qarabağ, həm də Aprel və Tovuz döyüşlərində bu bölgənin oğul və qızlarının vətənpərvərliyinin, comərdliyinin, igidliyinin şahidi olmuşuq.

Masallı rayon Nizami Gəncəvi adına Mədəniyyət Mərkəzində Mədəniyyət Nazirliyi Respublika Xatirə Kitabı  Redaksiyası Vətən müharibəsində həlak olanların adlarının və xatirələrinin əbədiləşdirilməsi üçün “44 gün – Tarixi zəfər” adlı üçcildliyin (“A-Ə” hərfləri üzrə) birinci cildinin növbəti təqdimat mərasimini keçirildikdən və burada Masallı, Yardımlı və Cəlilabad rayonlarından olan şəhid ailələri ilə görüşdən sonra “44 gün – Tarixi zəfər” nəşrini təqdim etmək üçün Lənkarana yola düşdük. Qəhrəmanlar yurdu olan Lənkəran Azərbaycana iki dəfə Sovet İttifaqı qəhrəmanı Həzi Aslanovu və başqa şəxsiyyətləri bəxş edib. Bu yurdda Həzi Aslanov kimi minlərlə, on millərlə vətənpərvər, qəhrəman oğullar yetişib. Onlar Vətənimizin ərazi bütövlüyü uğrunda şəhid olublar. Lənkəran da şəhidlər şəhəridir, qəhrəmanlar yurdudur. Hər şəhid bir qəhrəmanlıq örnəyidir. 

• Şahin Şahbazov: “Bu kitab Mədəniyyət Nazirliyi Respublika Xatirə Kitabı redaksiyasının kollektivinin zəhməti sayəsində ərsəyə gəlib”

Mədəniyyən Nazirliyi Respublika Xatirə Kitabı redaksiyası Lənkəran şəhər Mədəniyyət Mərkəzinin binasında Vətən müharibəsində həlak olanların adlarının və xatirələrinin əbədiləşdirilməsi üçün “44 gün – Tarixi zəfər” adlı üçcildliyin (“A-Ə” hərfləri üzrə) birinci cildinin növbəti təqdimat mərasimini keçirdi. Tədbirdə  Astara, Lerik və Lənkəran rayonlarından olan şəhid ailələri iştirak etdi. Əlbəttə, həm tədbirdən əvvəl, həm də tədbir başa çatdıqdan sonra şəhid ailələri ilə səmimi ünsiyyətlər quruldu, onları qayğılandıran məsələlər barədə danışıldı. “44 gün – Tarixi zəfər” adlı üçcildliyin ilk cildinin təqdimat mərasimini Lənkəran Regional Mədəniyyət İdarəsinin rəisi Şahin Şahbazov açaraq, şəhid ailərinə və qonaqlara Xatirə Kitabı redaksiyasının böyük zəhmət hesabına ərsəyə gətirdiyi “44 gün – Tarixi zəfər” nəşrindən söhbət açdı. Şəhidlərimizin xatirəsinin hər zaman əziz tutulduğunu, şəhid ailələrinə, qazilərə daim diqqət və qayğı göstərildiyini qeyd edən Ş.Şahbazov bildirdi ki, bu, sözügedən seriyanın ilk nəşridir və burada Lənkəran, Astara və Lerik şəhidlərinə də yer ayrılıb.  İdarə rəisi qeyd etdi ki, bu səbəbdən də tədbirə Lənkəran, Astara və Lerik rayonundan olan şəhid ailələri dəvət edilib. “Bu kitab Mədəniyyət Nazirliyi Respublika Xatirə Kitabı redaksiyasının kollektivinin zəhməti sahəsində ərsəyə gəlib. Onlar bu kitabın üstündə uzun müddət işləyiblər, şəhid ailələri ilə bir-bir görüşlər keçiriblər, onlardan məlumatlar, fotolar toplanılıb və kitab ərsəyə gəlib. Şəhidlərimizə həsr olunan kitabların təqdimatlarının keçirilməsi artıq bir ənənə halını alıb. Bu gün Azərbaycan ədəbiyyatında, kitab nəşri sahəsində yeni səhfə açılıb. Bizə zəfər bəxş edən ordumuzun, qəhrəman şəhidlərimizin şücaəti ədəbiyyatda, elmdə öz əksini tapıb. Artıq yazarlarımız da, alimlərimiz də yeni mövzuda yazmağa başlayıblar. Bu mövzu zəfər mövzusudur. Bu kitablar vasitəsilə şəhidlər qarşısında olan borcumuzu yerinə yetiririk, eyni zamanda da müharibədə qəhrəmanlıq göstərən qazilərimizə, müharibə iştirakçılarına hörmətimizi ifadə edirik”.

Ş.Şahbazov sonra sözü Lənkəran rayon İcra Hakimiyyətinin  İctimai-siyasi və humanitar məsələlər şöbəsinin baş məsləhətçisi Könül Manafovaya verdi. Şəhid ailələrini və qonaqları Lənkəran rayon İcra Hakimiyyətinin başçısı Taleh Qaraşovun adından salamlayan K.Manafova bildirdi ki, şəhid ailələrinə hər zaman diqqət və qayğı göstərilir. “44 gün – Tarixi zəfər” adlı kitabın ilk cildini ərsəyə gətirdiyinə, şəhidlərlə bağlı layihələr işlədiyinə, kitab çap etdirdiyinə, onların xatirəsini əbədiləşdirdiyinə görə Xatirə Kitabı redaksiyasının rəhbəri Nəzakət Məmmədovaya və əməkdaşlara təşəkkür edən K.Manafova “Bu kitabın ərsəyə gəlməsində rolu, əməyi olan hər kəsə təşəkkür edirəm. Bu kitabda Vətən müharibəsində, bütövlükdə torpaqlarımızın ərazi bütövlüyü uğrunda canlarını fəda edən Vətən oğullarının xatirəsi əbədiləşdirilib. Bu nəşri hazırlayanlar şəhid ailələri ilə bir yerdə olublar, onların ağrı-acılarını daxilən yaşayıblar”- deyə bildirdi, bu sahəyə diqqət ayırdığına, qayğı  göstərdiyinə görə müzəffər Ali Baş Komandana təşəkkür etdi.

Sonra söz geniş məruzə üçün Respublika Xatirə Kitabı Redaksiyasının baş redaktoru Nəzakət Məmmədovaya verildi: “Respublika Xatirə Kitabının Vətən müharibəsində həlak olmuş üç min şəhidlə bağlı "44 gün - Tarixi zəfər" adlı üçcildliyi hazırlanır. Hazırda kitabın birinci cildinin təqdimatına toplaşmışıq. Kitabda Vətən uğrunda həlak olmuş, "A-Ə" hərfləri üzrə adları sıralanmış şəxslər barədə bioqrafik məlumat verilib, digərlərinin də adlarının əbədiləşdirilməsi istiqamətində növbəti cildlər üzərində işlər görülür...”

Şair-publisist Rəfael Tağızadə də çıxışında “44 gün – Tarixi zəfər” adlı kitabının məziyyətlərinə, daşıdığı dərin məna yükünə toxundu. R.Tağızadə bildirdi ki, torpaqlarımızın azad edilməsinə görə şəhidlərimizin ruhuna borcluyuq.

“Xalq qəzeti”nin bölgə müxbiri Əli Nəcəfxanlı da şəhidlərimizin adlarının əbədiləşdirilməsi istiqamətində redaksiyanın gördüyü işləri yüksək qiymətləndirdi.

Astara rayonundan olan şəhid Ramin Əliyevin atası Muxtar kişi oğlunun döyüş yolundan, onun xatirəsinə bəslənən dövlət qayğısından danışdı.

• Rəsmiyyə Şükürova: “Tarix yaradan balalarımızın adı tarixə yazılıb”

Sonra Nəzakət xanım “Ağlama, şəhid qızı” şeirini söylədi. Şeir şəhid ailələrinin qəlbinə acazıq da olsa təsəlli oldu. Şəhid İmaməli Əhədzadənin anası Rəsmiyyə Şükürova da çıxış edərək bildirdi ki, “44 gün – Tarixi zəfər” onlar üçün bir təsəllidir və ovladlarının xatirəsini bu şəkildə əbədiləşdirdiyinə görə Xatirə Kitabı redaksiyasına minnətdarlıq etdi: “Bu kitabın əhəmiyyəti böyükdür, tarix yaradan balalarımızın adı tarixə yazılıb”.

• Şəhid atası: “Biz şəhid ata-anaları başımızı dik tutmalıyıq”

Lerikli şəhid, gizir Cəlal Ağayevin atası da çıxış etdi: “Mənim oğlum qəhrəman kimi döyüşə atıldı. Tankçı idi. Aprel döyüşlərində iştirak etdi. 27 sentyabrda isə ön cəbhəyə getdi. Vətən müharibəsində şəhid olan 3 minə yaxın şəhidin içində mənim balam Cəlal da var. Biz şəhid ata-anaları başımızı dik tutmalıyıq. Ali Baş Komandan şəhid ailələrinə çox böyük dəstək göstərir”.

Əlbəttə, şəhid anaları, şəhid ataları, şəhid balaları öz əzizləri haqda bir cümlə yazıya, bir fotoşəklə belə canlı olaraq yanaşır. Hər şəhidin adı  bizim üçün bir qəhrəmanlıq ünvanıdır. Biz o adları müqəddəs bilirik.

Respublika Xatirə Kitabı redaksiyasının əməkdaşları “44 gün – Tarixi zəfər” kitabının birinci cildini şəhid ailələrinə payladılar.

Lənkəranda keçirilən təqdimat mərasimində şəhid ailələri ilə görüşmək, ata-analarına, həyat yoldaşlarına dəstək olmaq, bizə yadigar qoyub getdikləri balalarının başına sığal çəkmək də varmış qismətimizdə. İnanırıq ki, şəhid aiələrinin ürəyinə acazıq da olsa təsəlli ola bildik. Lənkəranda görüş başa çatdıqdan sonra Bakıya üz tutduq. Özümüzlə o gözəl yerlərin ab-havasını, mehriban insanların xeyir-duasını gətirdik...

İradə SARIYEVA
Lənkəran-Bakı