Ermənistanda Rusiya əleyhinə sərt bəyanatlar səslənməyə başlayıb. Ən maraqlısı budur ki, analoji bəyanatlar hansısa müstəqil siyasi partiyalar tərəfindən deyil, Paşinyanın parlamentdəki silahdaşlarının dili ilə dövriyyəyə buraxılır. Bu xüsusda söylənilən iki mühüm bəyanata xüsusi diqqət yönəltmək istərdik.
Ermənistan Milli Şurasının Müdafiə və təhlükəsizlik məsələləri üzrə daimi komissiyasının genişləndirilmiş iclasında sensasiyalı informasiya yayılıb. Erməni KİV-inin verdiyi məlumata görə, komissiyanın iclasında bildirilib ki, 27 oktyabr 1999-cu ildə İrəvanda baş vermiş hadisələr Rusiyanın xüsusi xidmət orqanları tərəfindən Vladimir Putinin əmrilə həyata keçirilib.
Həmin hadisələr zamanı parlamentin spikeri Karen Demirçyan və baş nazir Vazgen Sarkisyan öldürülmüşdü. Hadisələrin müzakirəsinə həsr edilmiş iclas zamanı Ermənistanın baş naziri Nikol Paşinyanın silahdaşı, iqtidar partiyasından millət vəkili, Müdafiə və təhlükəsizlik məsələləri üzrə parlamentin daimi komissiyasının sədri Andranik Koçaryan sensasiyalı bəyanatla çıxış edib:
"Oktyabr ayının 27-də törədilən cinayətin üstü açılıb. Sifarişçilər məlumdur. Bu, Rusiyanın xüsusi xidmət orqanları tərəfindən Vladimir Putinin əmrilə həyata keçirilib”.
Bunun ardınca Ermənistanın hakim "Mənim addımım” fraksiyasının deputatı Narina Tuxikyan Rusiya kanallarının ölkədə yayımının məhdudlaşdırılması məsələsini qaldırıb.
Ermənistan KİV-i xəbər verirlər ki, deputat xüsusən "Mir”, "ORT” və "Rosiyya 1” kanallarının yayımının dayandırılmasını tələb edib. N.Tuxikyan həmin kanalların Ermənistan əleyhinə fəaliyyətindən narahatlığını dilə gətirib, onların ölkə əleyhinə siyasi çağırışlar etdiyini söyləyib.
Radio və televiziya verilişləri üzrə Milli Komissiyanın sədri Tiqran Akopyan kanalların bağlanması məsələsinin hazırda gündəmdə olmadığını, lakin Ermənistanın informasiya təhlükəsizliyini təhdid etdiyini bildirib.
Demək olar ki, Ermənistanın tam rəsmi mövqeyini əhatə edən bu iki bəyanatdan hansı nəticələri çıxarmaq olar və bunun Rusiya-Ermənistan münasibətlərinin gələcəyinə nə kimi təsiri olacaq?
“Bunun Ermənistan - Rusiya münasibətlərinə birbaşa təsiri var”
Politoloq Fikrət Sadıqov “Bakı-Xəbər”ə açıqlamasında bildirdi ki, bunun Ermənistan - Rusiya münasibətlərinə birbaşa təsiri var: “Başqa sözlə desək, bununla Ermənistan hakimiyyətindəki Rusiyaya bəslənən münasibət açıq formada özünü büruzə vermiş olur. Bu, birmənalı olaraq, Moskvaya endirilən zərbədir. Onlar hakimiyyətə gələndə, mitinqlərdə etdikləri çıxışlarda romantik ab-hava ilə yaşayırdılar. Hakimiyyətə gələndən sonra isə görürlər ki, burada romantika yox, real addımlar tələb edilir. Paşinyan rəsmi şəxsdir. Başa düşür ki, Rusiya ilə münasibətləri normal şəkildə saxlamasa, məhvə məhkumdur. Ancaq hakimiyyətə birbaşa məsuliyyət daşımayan şəxslər vasitəsilə belə bəyanatların səsləndirilməsini təşkil edir. Başqa bir versiya da ola bilər ki, bu, Paşinyanın iradəsi xaricində baş verir. Yəni komandası ona bu yolla mesaj verir ki, bizimlə hakimiyyətə gəlibsənsə, biz deyəni etməlisən. Daha dəqiqi, ondan Rusiyaya arxa çevirməyi tələb edirlər. Çünki səslənən bəyanatlarda heç bir siyasi üsulla pərdələmə yoxdur. Birbaşa deyirlər ki, Putin terror törətməyə göstəriş verib. İndi Paşinyanın özü götür-qoy etməlidir. Hər iki halda onun vəziyyəti pis olacaq. Hakimiyyətə yeni gələndə o, elə başa düşürdü ki, nə istəsə, onu edə bilər. Zənn edirdi ki, asanlıqla Rusiya ilə münasibətləri pozacaq, Azərbaycanla danışıqlarda separatçıları tərəf kimi əyləşdirəcək və s. Bununla bir daha görünür ki, siyasi rəhbərliyin nə təcrübəsi, nə də biliyi var. Əslində, mən çox şadam ki, Ermənistan parlamentində belə şüarlar səslənir. Qoy, Moskva bunu diqqətlə izləyib, özü üçün nəticə çıxarsın”.
Məhəmmədəli QƏRİBLİ
