"Qoy ədalətli məhkəmə onun taleyini həll etsin"
İkili vətəndaşlığı (İsrail və Rusiya) olan Aleksandr Lapşin dekabrın 14-də Belarusda Azərbaycan tərəfinin tələbi ilə saxlanıb. Belarus Ali Məhkəməsi blogerin Azərbaycana ekstradisiyasına dair qərardan verdiyi şikayəti təmin etməyib.
Xatırladaq ki, ayrı-ayrı dövlətlərin vətəndaşlığını daşıyan A.Lapşin Ermənistan silahlı qüvvələri tərəfindən Azərbaycan Respublikasının işğal olunmuş ərazilərində yaşayan digər şəxslərlə qabaqcadan əlbir olub cinayət əlaqəsinə girərək "Azərbaycan Respublikasının dövlət sərhədi haqqında", "Pasportlar haqqında" Azərbaycan Respublikası qanunlarının tələblərini kobud surətdə pozmaqla Azərbaycan Respublikasının mühafizə olunan dövlət sərhədini müəyyən edilmiş sənədlər olmadan və nəzarət-buraxılış məntəqələrindən kənarda keçərək 2011-ci ilin aprel və 2012-ci ilin oktyabr aylarında işğal olunmuş ərazilərə daxil olub, qanunsuz rejimin beynəlxalq səviyyədə təbliğ edilməsi məqsədilə internet sosial şəbəkəsində özünə məxsus "http//puerrtto.livejournal.com" səhifəsində səyahət etdiyi dövlətlər arasında Azərbaycan və Ermənistanla yanaşı, Dağlıq Qarabağı da "müstəqil dövlət" kimi qeyd etməklə, həmçinin, 6 aprel və 29 iyun 2016-cı il tarixli müraciətlərində işğal olunmuş ərazilərdə qanunsuz fəaliyyət göstərən rejimin "müstəqilliyi"ni dəstəkləməklə Azərbaycan Respublikasının beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.
A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan, Baş Prokurorluğun Ağır cinayətlərə dair işlər üzrə istintaq idarəsində fakta görə Azərbaycan Respublikası Cinayət Məcəlləsinin 281.2 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və barəsində dövlətlərarası axtarış elan edilib.
A.Lapşin Belarus Respublikası hüquq-mühafizə orqanlarının həyata keçirdiyi tədbirlər nəticəsində saxlanıb.
Azərbaycan Xarici İşlər Nazirliyi bundan əvvəl Azərbaycanın işğal olunmuş ərazilərinə qanunsuz səfəri ilə əlaqədar A.Lapşinin adını "arzuolunmaz şəxslər" siyahısına daxil edib.
Lapşinin ekstradisiyası Azərbaycan diplomatiyasının böyük qələbəsi kimi təqdim edilir. Bununla dünyaya bir mesaj verildi ki, Azərbaycanın işğal olunmuş torpaqlarında qərar tutan qondarma rejimin heç bir hüquqi əsası yoxdur. Eyni zamanda, sübut olundu ki, Lapşinin müstəqil dövlət kimi təqdim etdiyi ərazilər Azərbaycanın tərkib hissəsinə aiddir. Artıq Ermənistan mətbuatı məsələyə başqa rakursdan yanaşmağa başlayıb və iddia edir ki, güya Lapşinlə bağlı qəbul olunan qərar söz azadlığına müdaxilədir. Həmçinin bildirilir ki, onun Azərbaycanda ədalətli mühakimə olunması şübhə altındadır.
Lapşinin Azərbaycanda ədalətli mühakimə olunmayacağı ilə bağlı səslənən ittihamlar hansı məqsədləri güdür?
Politoloq Razi Nurullayevin fikrincə, Lapşinin ədalətli mühakimə olunacağına heç bir şübhə ola bilməz: "Azərbaycanın işğal altında olan torpaqlarına qanunsuz səfər edən, Azərbaycan tərəfinin xəbərdarlıqlarına baxmayan, öz bloqunda Dağlıq Qarabağı "müstəqil respublika" kimi qeyd edən İsrail və Rusiya vətəndaşı, fitnə toxumu səpən bloqçu A.Lapşin Minskdən Bakıya ekstradisiya olunub. Bu, Azərbaycana başucalığı gətirən bir məsələdir və bunu təqdir edirəm.
Fitnə toxumu səpən kimliyindən, hansı güclü dövlətin vətəndaşlığından güc almasına baxmayaraq, ən sərt cəzaya məruz qalmalıdır. O cümlədən Lapşinə də heç bir güzəşt edilmədən ədalətli məhkəmə keçirilməli və cəzasını almalıdır.
Belarus prezidenti Aleksandr Lukaşenkoya da təşəkkürümü bildirirəm. Belarus Respublikası ilə uğurlu danışıqlar aparan Azərbaycan tərəfinə, o cümlədən bu məsələdə prinsipiallıq göstərən Azərbaycan Prezidenti İlham Əliyevə də təşəkkürümü bildirirəm.
Ümid etdiyimi bildirmək istəyirəm ki, Lapşin cəzasının ən azından xeyli hissəsini Azərbaycanda çəkəcək və o, başqa tərəfə verilməyəcək. Çox yaxşı olardı ki, onun məhkəməsi Azərbaycan televiziyaları tərəfindən Azərbaycan, rus və ingilis dillərində canlı olaraq yayımlansın. Bu, Azərbaycan torpaqlarını işğal etmiş təcavüzkar Ermənistana və fitnə toxumu səpən havadarlarına ən layiqli cavab olacaq.
Bu fitnə toxumu səpən namərdin hərəkətlərində dövlət əleyhinə yönələn açıq çağırışlar və Azərbaycanın dövlət sərhədini qanunsuz olaraq keçmə əməlləri var. Qoy ədalətli məhkəmə onun taleyini həll etsin".
Məhəmmədəli QƏRİBLİ
