Bəhruz Quliyev:“ Missiyanın fəaliyyəti göstərir ki, Avropa Birliyi Ermənistanda...”
Ermənistanın informasiya məkanını izləyən “CyberHUB-AM” təşkilatından Artur Papyan deyib ki, yüksək vəzifəli məmurların Avropayönlü açıqlamalarından və ya Brüsselə səfərlərindən sonra tez-tez Gürcüstan-Rusiya sərhədində Ermənistan yük maşınlarının saxlanılması qərarları, eləcə də hakerlərin hökumət saytlarına hücum təhdidləri gəlir.
Bildirilir ki, ötən ay Avropa İttifaqı (Aİ), xüsusilə iyun ayında Ermənistanda keçiriləcək parlament seçkiləri ərəfəsində Rusiyanın dezinformasiyasına, kiberhücumlarına və qanunsuz maliyyə axınlarına qarşı mübarizə aparmaq üçün nəzərdə tutulmuş növbəti iki il üçün Ermənistanda yeni mülki missiyanı təsdiqləyib.
Bu, 2025-ci il seçkilərindən əvvəl yaradılmış və Kişinyovda Avropayönlü qüvvələrin hakimiyyəti saxlaması ilə nəticələnən Moldovadakı oxşar Aİ missiyası əsasında modelləşdirilib.
Yanvar ayında onun komandası WhatsApp-a kütləvi hücum qeydə alıb və bu hücumun bir neçə yüz min hesabı ələ keçirdiyi təxmin edilir. O bildirib ki, mesajlaşma tətbiqindən nazirlər və hökumət rəsmiləri geniş istifadə edir.
Ayrı bir əməliyyatda hakerlər saxta siqnal hesabı yaradaraq, özünü Aİ-nin Ermənistandakı səfiri Vasilis Maraqos kimi təqdim edərək QHT liderlərini Ermənistan-Aİ münasibətləri ilə bağlı saxta konfransa dəvət ediblər.
“Qeydiyyat linki qanuni görünürdü. Hətta təcrübəli vətəndaş cəmiyyəti işçiləri belə bu hiyləyə aldanıblar. Hücumun mənbəyi aşkar edildikdə, IP ünvanları Moskvanın şimal-qərbində yerləşən Rusiyanın Zelenoqrad şəhərinə işarə edirdi”.
İrəvan sammitləri ərəfəsində Papyan cəmi bir səhər Telegram-da altı və ya yeddi aktivlik olduğunu və hamısının eyni fikri təbliğ etdiyini bildirib: bu hadisələrin Ermənistan üçün geri dönüş nöqtəsi olmadığını və Rusiyanın ölkəni onlara ev sahibliyi etdiyinə görə cəzalandıracağını qeyd edib.
Zirvə görüşlərində iştirak edən Avropa Şurasının baş katibi Alen Berset bildirib ki, "Ermənistanın demokratik institutları fəaliyyət göstərir və real irəliləyiş əldə ediblər, lakin onlar təzyiq altındadırlar". Məlumatı BBC-yazıb.
Avropa İttifaqının seçki üzrə missiyası Ermənistanda seçkiqabağı Rusiyanın dezinformasiyası, seçkiyə müdaxilə cəhdləri və sair məqsədlə yaradılıb. Müəyyənləşdiriblər ki, həmin o İT-in giriş yeri Moskvanın yaxınlığındakı Zelenoqrad şəhəridir. Orada siqnal tətbiqinin saxta hesabını yaradıblar, Avropa Birliyinin Ermənistandakı səfirinin adından səhifə açıblar və Ermənistandakı bütün QHT-ləri virtual konfransa çağırıblar. O konfransda Ermənistan və Rusiya münasibətlərini Rusiyanın maraqlarına, mövqeyinə uyğun təhlil ediblər. Seçkiyə qarşı artıq indidən bu cür addımlar atılır. Yəni Rusiya tərəfindən edilən bu cür kiberhücumlar, bu cür dezinformasiya cəhdləri Ermənistanda seçkinin gedişatına nə dərəcədə təsir göstərə bilər? Bunun qarşısını almaq üçün Avropa Birliyinin mülki missiyası nə kimi effektiv rol oynayacaq?
“Ermənistanda seçki prosesi fonunda Avropa Birliyi tərəfindən xüsusi missiyanın formalaşdırılması və informasiya təhlükəsizliyi məsələlərinə diqqətin artırılması, əlbəttə ki, təkcə texniki təhlükəsizlik addımı kimi yox, eyni zamanda mövcud hakimiyyətə siyasi və institusional dəstək kimi də qiymətləndirilə bilər.
Çünki Avropa Birliyi yaxşı anlayır ki, Ermənistanda keçiriləcək növbəti seçkilər bu ölkənin gələcək geosiyasi kursunu müəyyən edəcək. Yəni məsələ sadəcə parlament mandatları uğrunda rəqabət deyil, Ermənistanın hansı istiqamətə üz tutacağıdır, yenidən Rusiya orbitinə qayıdacaq, yoxsa Qərblə inteqrasiya xəttini davam etdirəcək. Bu baxımdan Brüsselin aktivliyi bir növ Nikol Pashinyan hakimiyyətinə siyasi dayaq mesajıdır.
Missiyanın fəaliyyəti göstərir ki, Avropa Birliyi Ermənistanda hakimiyyət dəyişikliyinin xarici təsir mexanizmləri ilə baş verməsini istəmir. Çünki Qərb üçün hazırkı hökumət regionda əməkdaşlığa açıq, yeni siyasi kurs nümayiş etdirən tərəf kimi görünür. Ona görə də seçkiqabağı kiberhücumlar, dezinformasiya kampaniyaları və ictimai rəyə təsir cəhdlərinə qarşı tədbirlər eyni zamanda Paşinyan komandasının mövqelərinin qorunmasına xidmət edən faktor kimi təqdim olunur." Bu fikirləri “Səs” qəzetinin baş redaktoru, siyasi ekspert Bəhruz Quliyev baki-xeber.com-a deyib.
Ekspert qeyd edib ki burada diqqət çəkən başqa məqam da budur ki, Avropa Birliyi Ermənistan cəmiyyətinə belə bir mesaj verir ki, “Sizin seçiminiz kənardan pozulmasın, biz prosesin yanındayıq.” Amma siyasi reallıqda bu, həm də mövcud iqtidara beynəlxalq legitimlik qazandırır. Yəni müşahidə missiyası yalnız təhlükəsizlik mexanizmi deyil, siyasi çəkisi olan diplomatik siqnaldır.
"Düşünürəm ki, bu missiyanı iki istiqamətdə qiymətləndirmək lazımdır: bir tərəfdən seçki təhlükəsizliyinin təminatı, digər tərəfdən isə Ermənistan hakimiyyətinə verilən açıq Avropa dəstəyi. Region siyasətində belə addımlar heç vaxt yalnız texniki xarakter daşımır. Onların hər birinin arxasında strateji maraqlar dayanır, "-deyə, B.Quliyev əlavə edib.
İradə SARIYEVA
