Abutalııb Səmədov: "Paşinyanı tək qoymaq olmaz, çünki o, təkcə Ermənistan üçün deyil, bütün Cənubi Qafqaz üçün mühüm işlər görür"
Sosial şəbəkələrin erməni seqmentində bildirilir ki, Baş nazir Nikol Paşinyanın administrasiyasındakı mənbələrin məlumatına görə, “Soyqırımı Muzeyi”nin direktorunun qanunsuz şəkildə vəzifədən azad edilməsindən sonra müvəqqəti icraçı direktor kimi muzey əməkdaşlarından biri təyin olunub.
Bu il 24 apreldən sonra isə muzey struktur dəyişiklikləri çərçivəsində ləğv edilərək Ermənistanın Milli Tarix Muzeyi ilə birləşdiriləcək. Daha sonra isə guya bina təmiri bəhanəsi ilə bütün "unikal" eksponatlar Milli Arxivin və Matenadaranın anbarlarına paylanacaq.
Bu tədbirlərin Türkiyə rəhbərliyi ilə razılaşdırıldığı bildirilir.
İddialara görə, çox güman ki, qarşıdan gələn 24 aprel qeyri-iş günü statusuna malik olan Matəm Gününün sonuncu günü olacaq: "Beləliklə, Papoyanın sözlərini parafraz etsək, “Vətəndaş Müqaviləsi” yenidən seçilərsə, Ermənistan olmayacaq." Məsələ ilə bağlı “Bakı-Xəbər” qəzetinin müxbiri ilə fikirlərini bölüşən politoloq Abutalıb Səmədovun sözlərinə görə, Ermənistanın baş naziri Nikol Paşinyan son aylarda bir neçə dəfə açıq şəkildə bəyan edib ki, onun hədəfi sülh məntiqinə əsaslanan yeni Ermənistan Respublikasının qurmaqdır.
“Biz qonşularla münasibətlərdə konflikt yaratmaq düşüncəsindən xilas olmalıyıq”, - deyə Paşinyan bildirir. Baş nazirin fikrincə, bu cür Ermənistan nə yaşaya, nə də inkişaf edə bilər: "Nikol Paşinyanın atdığı addımlar göstərir ki, o, yalnız bəyanatlar verməklə kifayətlənmir, eyni zamanda real işlər görmək üçün qətiyyət və cəsarət nümayiş etdirir".
Ekspert qeyd edir ki, bunun nümunələrindən biri də “erməni soyqırımı” iddialarına münasibətdə nümayiş olunan yanaşmadır: “Ermənistan Türkiyə ilə qonşudur və Paşinyan yaxşı başa düşür ki, bu ölkə ilə düşmənçilik münasibətlərini davam etdirmək, uydurma soyqırımı iddialarını daim gündəmdə saxlamaq Ermənistan dövlətinə heç nə qazandırmayacaq. Bu cür iddialar bəlkə də hansısa xarici qüvvələrin maraqlarına xidmət edə bilər, lakin Ermənistanın dövlət maraqlarına ziddir”.
Politoloq bildirir ki, Paşinyan Qarabağ məsələsi ilə bağlı da kifayət qədər qətiyyətli mövqe nümayiş etdirib. O, açıq şəkildə bildirib ki, Qarabağ ermənilərinin geri qayıtması məsələsini gündəmə gətirməyin tərəfdarı deyil. Onun fikrincə, Azərbaycan Qarabağ məsələsini köklü şəkildə həll edib və bu mövzunu yenidən gündəmə gətirmək Ermənistana heç nə qazandırmayacaq.
“Belə olarsa, həm Azərbaycanla münasibətlər pozular, həm də Qarabağa qayıdış mövzusu qaldırılsa, Azərbaycan da Ermənistandan qovulmuş azərbaycanlıların geri qayıtmasını tələb edəcək. Ermənistan isə bunu böyük narahatlıqla qarşılayır”, – deyə politoloq bildirib.
Ekspertin sözlərinə görə, Paşinyanın tutduğu siyasi xətt, atdığı addımlar və səsləndirdiyi bəyanatlar son dərəcə cəsarətli addımlar kimi qiymətləndirilməlidir və Qərb ona zəruri dəstəyi verməlidir.
Qarşıdan gələn parlament seçkilərində rusiyameyilli qüvvələr nəyin bahasına olursa olsun qalib gəlməyə çalışacaqlar. Rusiya da kifayət qədər fəal mövqe tutur və öz tərəfdarları olan partiyalara müxtəlif formalarda yardım göstərir. İlk dəfədir ki, rusiyameyilli qüvvələr seçkilərdə blok şəklində iştirak edəcəklərini bildiriblər.
Belə ki, iş adamı Samvel Karapetyanın rəhbərlik etdiyi siyasi qüvvələr -Daşnaksütun və Robert Kocharyanın rəhbərlik etdiyi "Hayastan" blokunun birləşəcəyi bildirilir. Çox güman ki, digər rusiyayönlü partiyalar da bu bloka qoşulmağa çalışacaq və ya seçkilərdə ayrıca iştirak edib sonradan birləşmə variantını seçəcəklər.
Politoloqun fikrincə, Paşinyanın əsas rəqibi məhz rusiyameyilli siyasi qüvvələr olacaq. Əgər Paşinyan məğlub olsa, hakimiyyətə rusiyayönlü qüvvələr gələcək və Rusiyada tez-tez səslənən “Qarabağ məsələsi hələ bitməyib” bəyanatları real fəaliyyət mərhələsinə keçə bilər.
Belə olan halda, 1990-cı illərdə olduğu kimi, Rusiya yenidən Ermənistanı alət kimi istifadə edərək regionda öz nüfuzunu möhkəmləndirməyə çalışacaq.
Ekspert hesab edir ki, bu təhlükələr mütləq nəzərə alınmalıdır və Qərb, eləcə də Türkiyə indiki Ermənistan hakimiyyətinə dəstək verməlidir. O qeyd edir ki, Azərbaycan hakimiyyətinin tutduğu mövqe və atdığı addımlar da digər dövlətlər üçün nümunə sayıla bilər. Ermənistana yanacaq məhsullarının göndərilməsi, Rusiyadan və Mərkəzi Asiya ölkələrindən gələn yüklərin Azərbaycan ərazisindən keçərək Ermənistana çatdırılması kimi addımlar Paşinyan hakimiyyətinin mövqeyinin möhkəmlənməsinə təsir göstərir.
Politoloq əlavə edib ki, ABŞ-ın vitse-prezidenti J. D. Vencein Ermənistana səfərinin məqsədlərindən biri də seçkilər ərəfəsində Paşinyana siyasi dəstək nümayiş etdirmək idi. Onun sözlərinə görə, ABŞ-ın mövcud təhlükələri düzgün qiymətləndirməsi müəyyən ümidlər yaradır.
Səmədov hesab edir ki, Paşinyanı tək qoymaq olmaz. Çünki o, təkcə Ermənistan üçün deyil, bütün Cənubi Qafqaz üçün ciddi əhəmiyyət daşıyan addımlar atır və bu proses yarımçıq qalmamalıdır. Onun fikrincə, yaxın vaxtlarda Ermənistanda bu miqyasda ikinci belə siyasətçinin meydana çıxması ehtimalı çox azdır.
Politoloq qeyd edir ki, Paşinyanın atdığı addımlar Ermənistan cəmiyyətinin müəyyən hissəsi tərəfindən narazılıqla qarşılanır. Çünki uzun illər ərzində bu insanlara Türkiyə və Azərbaycanın düşmən olduğu barədə təbliğat aparılıb, qonşularla münasibətlər düşmənçilik üzərində qurulub.
İndi isə Paşinyan sülh məntiqinə əsaslanan respublika qurmaqdan danışır. O, Ermənistan Konstitusiyasında dəyişiklik edilməli olduğunu, ərazi iddialarının sənəddən çıxarılmalı olduğunu və qonşularla normal münasibətlərin qurulmasının vacibliyini bildirir.
Bu yanaşmanı qəbul etməyən qüvvələrin kifayət qədər olması səbəbindən Ermənistanda parlament seçkilərinin ağır siyasi mübarizə şəraitində keçəcəyi gözlənilir.
Akif NƏSİRLİ
