Sahil Kərimli: “Bu cür absurd açıqlamalar təbiidir ki, tamamilə təxribat xarakterlidir və bu qəbul edilməzdir”
Ermənistan fraksiyasının deputatı Artur Xaçatryan parlamentdə jurnalistlərə bildirib ki, TRIPP Ermənistanın blokdan çıxarılması məsələsini heç bir şəkildə tənzimləmir. "TRIPP heç bir şəkildə Ermənistanın blokdan çıxarılması məsələsini həll etmir", - deyə Xaçatryan deyib.
Onun sözlərinə görə, 8 avqust tarixli sənəddə Ermənistanın qarşılıqlı fayda əldə etməsi nəzərdə tutulurdu. "Blokdan çıxarmaqdan başqa hər şey budur. Bunun baş verməsi üçün ən azı Arazdəyən (Yerasx)-Naxçıvan dəmir yolu və avtomobil yolu, eləcə də İcevandan Qazaxıstana gedən yol işlək vəziyyətdə olmalıdır", - deyə o bildirib.
Erməni deputat əlavə edib ki, enerji infrastrukturu TRIPP-dən keçərsə, qarşılıqlı prinsip əsasında digər qovşaqlar da yaradıla bilər.
Xaçaturyan iddia edir ki, TRİPP marşrutu Ermənistanı blokadadan çıxarmır və Ermənistan o vaxt blokadadan çıxar ki, Arazdəyəndən Naxçıvana, İcevandan Qazaxıstana dəmir yolu çəkilsin.
Bu nə iddiadır? Ermənistandan Qazaxıstana dəmir yolu xəttinin çəkilməsi kimi mənasız ideya haradan çıxıb?
Qeyd edək ki, ümumiyyətlə, heç zaman İcevan-Qazaxıstan dəmir yolu xətti mövcud olmayıb. Erməni deputat isə belə bir cəfəngiyyatı ortaya atmaqla əslində TRİPP layihəsinə qarşı təxribatla məşğul olur.
Politoloq Sahil Kərimli baki-xeber.com-a bildirdi ki, bu cür açıqlamalar Azərbaycanla Ermənistan arasında sülh müqaviləsinin imzalanmasına çox ciddi maneə törətmək məqsədi daşıyır: “Ermənistanda da, Rusiyada da müəyyən dairələr çalışırlar ki, Azərbaycanla Ermənistan arasında sülh müqaviləsi imzalanmasın. Xüsusilə də Azərbaycanın müəllifi olduğu və ABŞ prezidenti Donald Trampın da reallaşmasına ciddi dəstək verdiyi Zəngəzur dəhlizinin açılmasının əleyhinə olan qüvvələr bölgədə yeni müharibə ocağı yaratmağa çalışırlar, onlar Ermənistanla Azərbaycan arasında gərginliyin yenə də davam etməsinin tərəfdarı olanlardır. Erməni deputatın bu iddiası tamamilə cəfəngiyyatdır və heç bir əsası yoxdur. Çünki bu gün Zəngəzur dəhlizi, yəni TRİPP marşurtu Ermənistanı konkret olaraq blokadadan çıxaracaq. Hələ Zəngəzur dəhlizi (TRİPP marşurtu) açılmamış əlbəttə, Azərbaycan yeni nəqliyyat-kommunikasiya xəttlərindən, marşurtlarından istifadə edərək Ermənistana bir çox yüklərin göndərilməsini təmin edib. Rusiyadan və Qazaxıstandan gələn taxıl Azərbaycan ərazisindən keçərərək Ermənistana çatdırılır. Eyni zamanda son zamanlar Azərbaycandan neft məhsulları da davamlı şəkildə Ermənistana satılır. Bütün bunlar onu göstərir ki, Ermənistanın blokadada olması artıq geridə qalıb”.
S.Kərimlinin sözlərinə görə, son dövrlərdə qardaş Türkiyə də Ermənistanın Azərbaycanla sülh müqaviləsi imzalamaq istiqamətində konstruktiv mövqeyini nəzərə alaraq sərhədlərin açılması, nəqliyyat-kommunikasiya xəttlərinin bərpa olunması istiqamətində müəyyən addımlar atır, bu yöndə çox ciddi işlər gedir. “Yəni bu gün TRİPP marşurtu açılarsa Ermənistan tamamilə blokadadan çıxacaq və bu ölkənin iqtisadiyyatı çox ciddi inkişafa doğru irəliləyəcək. Bu cür absurd açıqlamalar təbiidir ki, tamamilə təxribat xarakterlidir və bu qəbul edilməzdir”.
O, vurğuladı ki, İcevandan Qazaxıstana dəmir yolu xətti heç vaxt olmayıb.
İradə SARIYEVA
