Akif Nağı: “Beynəlxalq hüquq normalarını AŞPA-nın özü tapdalayır”
Avropa Şurası Parlament Assambleyası (AŞPA) Azərbaycana qarşı qərəzli mövqeyindən heç cür əl çəkmək istəmir. Erməni lobbisinin əlində alətə çevrlən muzdlu AŞPA deputatları haqsız olaraq ölkəmizi hədəfə alır. Belə ki, AŞPA Azərbaycanı Bakıda saxlanılan bütün erməniləri azad etməyə çağıran qətnamə qəbul edib.
Ermənistan Milli Assambleyasının vitse-spikeri və AŞPA-da Ermənistan nümayəndə heyətinin rəhbəri Ruben Rubinyan rəsmi Facebook səhifəsində Strasburqda AŞPA-nın "Assambleyanın Monitorinq Prosedurunda İrəliləyiş" adlı qətnaməsinin qəbul edildiyini yazıb. “Qətnamənin Ermənistanla bağlı hissəsində, digər məsələlərlə yanaşı, AŞPA “bir neçə ruhani tərəfindən hakimiyyəti ələ keçirmək planları ilə bağlı məlumatlarla bağlı” dərin narahatlığını bildirir və Azərbaycanla bağlı hissəsində isə orada saxlanılan bütün ermənilərin azad edilməsinə çağırır”-deyə R.Rubinyan bildirib.
Bakıda həbsdə olan ermənilərin ittiham olunduğu konkret maddələr var və onlar Azərbaycan məhkəməsi tərəfindən mühakimə olunur. AŞPA-nın erməni lobbisinin puluna şirnikib belə qətnamə qəbul etməsi və separatçıları azad etməklə bağlı Azərbaycanın qarşına hansısa tələb qoyması qəbuledilməzdir.
Azad Vətən Partiyasının sədri Akif Nağı baki-xeber.com-a bildirdi ki, AŞPA Azərbaycana qarşı öz ənənəvi qərəzli mövqeyini nümayiş etdirir. “AŞPA-nın qərarlarının, çıxardığı qətnamənin Azərbaycana heç bir dəxli yoxdur. Cənab Prezident son çıxışlarından birində də vurğuladı ki, AŞPA-nın və başqa qurumların qərarlarına biz heç əhəmiyyət vermirik, nəzərə almırıq, çünki qərəzlidir. Dəfələrlə AŞPA-nın diqqətinə çatdırılıb ki, Azərbaycama qarşı qərəzli mövqedən geri çəkilin, amma yenə də qərəzli mövqelərini nümayiş etdirirlər. AŞPA-da qəbul olunan anti-Azərbaycan qətnaməsi də bu qərəzli mövqeyinin davamıdır. Deyirlər ki, Bakıda saxlanılan ermənilər azad olunmalıdır. Bu nə deməkdir? Siz etnik mənsubiyyət məsələsini müəyyənləşdirirsiz burada? Əvvəllər “hərbi əsir” deyirdilər, indi də sadəcə ermənilər deyirlər. Artıq bütün cizgiləri keçiblər, ədalət prinsipləri yoxdur, açıq-aşkar ermənilərin mövqeyindədirlər. Bir tərəfdən öz qərəzli qətnamələri ilə erməniləri müdafiə edirlər, onlara öz simpatiyalarını göstərirlər, digər tərəfdən, məqamdan istifadə edib Azərbaycanı nədəsə ittiham etməyə, günahkar tərəf kimi göstərməyə çalışırlar. Məsələnin də mahiyyətinə varmaq istəmirlər ki, bunlar hərbi canilərdir və bu hərbi canilərə qarşı Azərbaycan məhkəmə prosesi qurub, ədalətli proses gedib, faktlar hamısı ortadadır, yüzlərlə şahid dindirilib, şahid ifadələrində onlarla bağlı açıq, təkzib olunmaz faktlar səsləndirilib. Bu məhkəmə prosesində hər şey ortadadır. Müraciət edə bilərlər ki, onlarla bağlı hansısa yumşaldıcı hal nəzərə alınsın. Amma “buraxılsınlar” deyirlər. Bu nə hökmdür? Beynəlxalq hüquq normalarını AŞPA-nın özü tapdalayır”.
A.Nağı qeyd etdi ki, Azərbaycanla bağlı məsələni Ermənistanla əlaqdar qətnaməyə əlavə etməklə AŞPA deputatları məsələni tamamilə təhrif edirlər. “Bu məsələnin Ermənistana nə dəxli var? Proses Azərbaycanda gedən prosesdir. Azərbaycana qarşı hansısa təkliflərini Ermənistanla bağlı qətnamədə verirlər. Bu özü də məntiqsizliyin bir göstəricisidir.
Onsuz da Azərbaycan bu istiqamətdə müəyyən addımlar atır. Qatı cinayətkar başda Vaqif Xaçaturyan başda olmaqla dörd nəfəri azad edib Ermənistana göndərdi. Onlar Ermənistana gedən kimi Azərbaycana qarşı təbliğat kampaniyası aparmağa başladılar, olmayan ittihamlar səsləndirirlər. Azərbaycanın bu humanist addımına münasibətdə onlar tərəfindən qeyri-adekvat, nankor bir münasibət sərgilənir”.
A.Nağı əlavə etdi ki, Azərbaycan dövləti öz humanistliyini göstərir, amma qarşılığında erməni xislətini görür. “Ona görə də yaxşı olar ki, AŞPA Ermənistanda gedən proseslərə, buradan Azərbaycanın azad edib Ermənistana göndərdiyi adamların davranışları, hərəkətləri ilə bağlı münasibət bildirsin, Azərbaycanın onlara humanist davrandığını qeyd etsinlər. Amma bunları görmürük, onlarda obyektivlik hissi yoxdur. Hesab edirəm ki, Azərbaycan bu cür qətnamələrə heç əhəmiyyət verməməli, öz xəttini, öz mövqeyini davam etdirməlidir”-deyə A.Nağı qeyd etdi.
İradə SARIYEVA
