Elşad Həsənov: “Bu, Cənubi Qafqazı Rusiyanın təsirindən çıxarmaq üçün atılan önəmli addımlardır”
“Keçən ilin avqust ayında imzaladığımız Sülh Sazişinə əməl etdiklərinə görə Azərbaycan Prezidenti İlham Əliyevə və Ermənistan Baş naziri Nikol Paşinyana təşəkkür etmək istəyirəm”. Bu barədə ABŞ Prezidenti Donald Tramp “Truth” sosial mediasında yazıb.
O bildirib ki, bu pis müharibə onun başa vurduğu 8 müharibədən biri idi. Artıq Rifah və sülh hökm sürür: “Biz Azərbaycanla strateji tərəfdaşlığımızı möhkəmləndirəcəyik. Ermənistanla sülhməramlı nüvə əməkdaşlığı üçün saziş imzalayacağıq. Böyük yarımkeçirici istehsalçılarımız üçün müqavilələrə imza atacağıq. ABŞ-da istehsal olunmuş müdafiə avadanlıqlarını, o cümlədən gödəkçə, qayıqlar və sairi Azərbaycana satacağıq”.
Maraqlıdır, Trampın bu planı, Rusiya və İranın bölgədən tam çıxarılması planı hesab oluna bilərmi?
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, dünyada gedən siyasi proseslər, müharibələr hər bir dövlətin strateji müttəfiqlərini seçməyə yönəlir: “Eyni zamanda bu yeni reallıqda strateji tərəfdaşların, həm də əvvəllər milli təhlükəsizlik strategiyasının müəyyənləşdirdiyi bəzi reallıqlar dəyişir. Azərbaycan indiyə qədər Rusiya, İranla xoş qonşuluq münasibətlərində olub. Ancaq son zamanlar görürük ki, ölkəmizə qarşı ən böyük təhdidlər Rusiyadan gəlir. Artıq Rusiya mediasında bizə qarşı açıq-aşkar anti-Azərbaycan təbliğatları gedir. Azərbaycanı müstəqil olmağa qoymamaq haqqında fikirlər, digər sərsəm bəyanatlar səslənir. Söhbət Duqinin, Solovyovun hədələyici xarakterli çağırışlarından gedir. Hesab edirəm ki, bütün bunlar çox ziyanlı proseslərdir. O üzdən, Azərbaycan özünün müstəqil siyasətini yeridərək özünə strateji tərəfdaşlar seçir. Ötən ilin avqustundan Azərbaycan ABŞ-la strateji tərəfdaşlıq xəttini gücləndirməyə başlayıb. Görün necə ciddi yaxınlaşma var ki, Davosda Tramp iki prezidentlə təkbətək görüş keçirdi və onlardan biri Prezident Əliyev idi. Bu, Azərbaycana verilən önəmin göstəricisidir. Deməyim odur ki, indiki konturlar orada cızılıb. Azərbaycanın ABŞ-la strateji tərəfdaşlığı dərinləşdirməsi çox önəmlidir. Trampın son paylaşımında Azərbaycan və Ermənistanla bağlı yer alan məqamlar əsla təsadüfü və gəlişi gözəl söz deyil. Bu, Cənubi Qafqazı Rusiyanın təsirindən çıxarmaq üçün atılan önəmli addımlardır. İran burada əsas oyunçu deyil. Region uzun illər Çar Rusiyasının işğalı altında olub. ABŞ kimi qüdrətli dövlətin bu yardımları vəd etməsi önəmli məsələdir. Vaşinqton regionun strateji əhəmiyyətinin fərqindədir. Digər tərəfdən, post-sovet ölkələri Rusiyanın slavyan qardaşları olan ukraynalılara qarşı törətdikləri vəhşilikləri görürlər. Ona görə də müxtəlif vasitələrlə Rusiya ilə məsafə saxlamağa çalışırlar. Bax budur məsələnin kökü, mahiyyəti”.
Vidadi ORDAHALLI
