Azər Həsrət: “İranla bağlı proseslərdə Azərbaycanın istəyi, sözü eşidilir və eşidiləcək”
Nüfuzlu “Washington Post” qəzetində İranın və Cənubi Azərbaycanın gələcəyi haqqında maraqlı məqalə dərc olunub. Məqalənin tezisləri Ağ Evin İran siyasətinin “yol xəritəsi”ni necə müəyyənləşdirməsi baxımından diqqət çəkir.
Məqalədə İranda farsların sadəcə Tehran və İsfahan ətrafındakı mərkəzdə cəmləşdikləri, ölkənin sərhəd boyu ərazilərində digər xalqların, o cümlədən azərbaycanlıların üstünlük təşkil etdiyi yazılıb. Yazıda qeyd edilib ki, İranda yaşayan azərbaycanlılar Türk-Azərbaycan kimliyinə daha çox maraq göstərir, Azərbaycanın Avropa ilə inteqrasiyaya can atdığı, NATO standartlı ordusu olduğu bildirilib. Burada diqqəti çəkən məqam həm də odur ki, məqalədə Vaşinqtonun İranla bağlı planlar qurarkən Azərbaycan Prezidenti İlham Əliyevlə məsləhətləşmənin vacibliyi qeyd edilib.
Sözügedən məsələni baki-xeber.com-a şərh edən siyasi şərhçi Azər Həsrət hesab edir ki, dünyada artıq yeni reallıqlar başlayıb: “Birləşmiş Ştatların prezidenti Donald Trampın timsalında yeni dünya düzəninin qurulmasına start verilib. Sevindiricidir ki, Prezident İlham Əliyev də bu məsələdə masanın başında oturanlardan biridir. Yəni Azərbaycan da artıq söz sahibləri sırasındadır. Ona görə də İranla bağlı proseslərdə Azərbaycanın istəyi, sözü eşidilir və eşidiləcək. Düzdür, molla rejimi təbliğat aparır ki, ABŞ-dan qorxmur. Yaxud da ABŞ nəsə edərsə, İran onun cavabını beşqat verər. Ancaq məlum deyil, İran bu cavabı nə ilə verəcək. Belə təbliğat da yayırlar ki, guya ABŞ İranla bağlı heç bir addım atmaq fikrində deyil, hərbi müdaxilə olmayacaq və s. Əgər belədirsə, o zaman ABŞ niyə özünün ən böyük təyyarə daşıyan gəmisini İran körfəzinə göndərib? Bundan başqa, niyə bir belə xərc çəkib hərbi arsenalını İranın ətrafına cəmləyir? Aydın məsələdir ki, ABŞ-ın İranla bağlı bir planı var. Bu plan həyata keçirilərkən Azərbaycanın dövlət maraqları mütləq nəzərə alınacaq. O cümlədən də Cənubi Azərbaycan məsələsi üçün yaşıl işıq yandırılıb. Yəni kim nə deyir-desin Cənubi Azərbaycanın müstəqilliyi an məsələsidir. Ona görə də Azərbaycan, Türkiyə, eləcə də digər türk dövlətləri yeni müstəqil bir türk dövlətinin yaranmasına daha sürətlə hazır olmalıdırlar. Çünki dünya dəyişir və burada söz sahibi olanlar Trampın Davosda imzaladığı Sülh Şurası sənədinin ətrafına yığışmışdı. Həmin dövlətlərin içində 4 türk dövləti də var – Azərbaycan, Türkiyə Özbəkistan və Qazaxıstan. Bu da əslində işin sevindirici tərəfidir. Yəni yeni dünya düzənində türk dövlətlərinin də rəyi, mövqeyi nəzərə alınır. Ona görə də düşünürəm ki, “Washington Post” təsadüfən belə məqalə dərc etməyib. Bu, faktiki olaraq ABŞ-ın dövlət proqramının təzahürüdür. Bunu bu şəkildə dünya ictimaiyyətinə təqdim ediblər. Ona görə də biz qarşıdakı proseslərə hazır olmalıyıq”.
Vidadi ORDAHALLI
