Sahil Kərimli: “Zəngəzur dəhlizinin açılması, Ermənistanla nəqliyyat-kommunikasiya əlaqələrinin gələcəkdə gücləndirilməsi heç də Gürcüstana qarşı yönəlmiş addım deyil”
“İnterpress News" agentliyinin məlumatına görə, Gürcüstanın sabiq prezidenti Mixail Saakaşvili yazıb ki, Azərbaycan Prezidenti İlham Əliyevin Ermənistandan keçən tranzit marşrutu ilə bağlı açıqlaması Gürcüstanın 1990-cı və 2000-ci illərdə əldə etdiyi hər şeyi "pozur". Onun sözlərinə görə, Gürcüstan ciddi geosiyasi çıxılmaz vəziyyətdədir.
“İlham Əliyevin bu gün tranzit marşrutunun Gürcüstandan, sabah isə Ermənistandan keçəcəyi barədə bəyanatı 1990-cı və 2000-ci illərdə bir ölkə olaraq əldə etdiyimiz hər şeyi sarsıdır.
Gürcüstan ağır geosiyasi çıxılmaz vəziyyətə düşüb və bu, yaxın gələcəkdə ya müstəqil dövlət kimi ləğv olunmağımızla, ya da mafiya başçısı İvanişvilinin caynağından qurtulmaqda və milli inkişaf yoluna qayıtmaqda uğurumuzla başa çatacaq”, - deyə Saakaşvili yazıb.
Saakaşvili düz deyir? Gürcüstanın sabiq prezidenti Azərbaycanla bağlı bu dəfə niyə yanlışlığa yol verib?
“...Reallıqdan uzaqdır, bunların heç bir əsası yoxdur”
Siyasi ekspert Sahil Kərimli baki-xeber.com-a bildirdi ki, Azərbaycan bölgədə nəqliyyat-kommunikasiya xəttlərini şaxələndirməklə, xüsusilə Ermənistanla bu istiqamətdə əlaqələri gücləndirməklə və gələcəkdə Zəngəzur dəhlizi layihəsini həyata keçirməkdə region ölkələri, əsasən də Cənubi Qafqaz respublikları üçün böyük iqtisadi dvidentlər qazandırmağa çalışır. “Bölgədə nəqliyyat-kommunikasiya xəttlərinin açılması, gələcəkdə Ermənistanla bu yöndə əməkdaşlığı gücləndirməsi təbiidir ki, ilk növbədə Cənubi Qafqaz üçün daimi sülh və təhlükəsizlik vəd edir. Əlbəttə ki, Azərbaycanın bu istiqamətdə həyata keçirdiyi nəqliyyat-kommunikasiya xəttlərinin şaxələndirilməsi layihələri bölgədə heç bir ölkəyə qarşı yönəlməyib. Azərbaycanla Gürcüstan arasında iqtisadi əməkdaşlıq, nəqliyyat-kommunikasiya layihələri, neftin, qazın, enerjinin daşınmasında xüsusilə də Bakı-Tbilisi-Ceyhan xətti uzun illərdir ki, uğurla həyata keçirilir. Yəni bu gələcəkdə də belə olacaq. Zəngəzur dəhlizinin açılması, Ermənistanla nəqliyyat-kommunikasiya əlaqələrinin gələcəkdə gücləndirilməsi heç də Gürcüstana qarşı yönəlmiş addım deyil. Bu birmənalı olaraq belədir. Azərbaycan dövləti, Azərbaycan Prezidenti və dövlətimizin digər rəsmi qurumları dəfələrlə bu istiqamətdə bəyanatlar səsləndiriblər. Azərbaycanın mövqeyi bundan ibarətdir ki, Gürcüstan üzərindən də daşımalar, həyata keçirilən əvvəlki layihələr gələcəkdə də inkişaf etdiriləcək və irəliyə aparılacaq. Burada məsələni gərginləşdirmək, bu istiqamətdə hər hansısa bir mənfi fikir bildirmək təbiidir ki, yol verilməzdir. O ki, qaldı Gürcüstanın keçmiş prezidenti Saakaşvilinin bu məsələ ilə bağlı açıqlamasına, bu da əlbəttə, həqiqətdən uzaq bir açıqlamadır”.
S.Kərimlinin sözlərinə görə, Gürcüstanın sabiq prezidentinin məsələyə yanaşması yanlışdır. Onun fikrincə, bu mənada ki, Gürcüstanla Azərbaycan daim mehriban qonşuluq münasibətləri saxlayıb və bu münasibətlər həm siyasi, həm də iqtisadi baxımdan daim irəliyə aparılıb. “Yəni Gürcüstanın dövlət rəhbərliyində, yaxud Gürcüstan ictimaiyyətində bu narahatlıqlar reallıqdan uzaqdır, bunların heç bir əsası yoxdur. Azərbaycan bütün qonşuları ilə daim paralel olaraq həm siyasi, həm də iqtisadi baxımdan, eyni zamanda bir çox istiqamətlərdə münasiblərə daim önəm verin və bu gələcəkdə də belə olacaq”-deyə S.Kərimli vurğuladı.
İradə SARIYEVA
