Əli Mustafa: “Düşünmürəm ki, Putin bununla Avropa ilə ABŞ-ı üz-üzə qoya bilsin”
Rusiya ABŞ prezidenti Donald Trampdan Sülh Şurası təşəbbüsünə qoşulmağa dəvət alıb. Bunu Rusiya Prezidenti Vladimir Putin Rusiya Təhlükəsizlik Şurasının daimi üzvləri ilə görüşdə deyib.
Putin Rusiyanın əvvəlki ABŞ administrasiyası dövründə dondurulmuş aktivlərindən 1 milyard dolları Sülh Şurasına göndərməyə hazır olduğunu da açıqlayıb.
Putin bununla çox hiyləgər gediş etdi. Putin deyir ki, Trampın Sülh Şrasına qoşulmaq üçün 1 milyard dolları verməyə hazırdır, amma Avropanın dondurduğu aktivlərdən götürmək şərtilə. Faktiki olaraq Putin bununla Trampı yenidən Avropanın üstünə yönəltdi.
Sözügedən məsələyə aydınlıq gətirən siyasi şərhçi Əli Mustafa baki-xeber.com-a açıqlamasında bildirib ki, Sülh Şurası əslində beynəlxalq münasibətlər sisteminin yeni bir forması kimi yaranır: “Tramp zaman-zaman deyirdi ki, BMT bir sıra məsələləri həll etmir, onları mən edirəm. İndi bununla BMT-yə bir alternativ tapılır. Düzdür, bu qurumların paralel işləyəcəyi ilə bağlı fikirlər var. Ancaq bütün hallarda beynəlxalq sistem yenilənir. Sadəcə olaraq, BMT tədricən ortadan qalxacaq, Sülh Şurası tədricən güclənəcək. Ancaq biz Sülh Şurasının dəqiq necə fəaliyyət göstərəcəyini bilmirik. Deyəsən, artıq nizamnaməsi var və imzalanıb. Çox güman ki, instisional qurum kimi fəaliyyət göstərəcək və yalnız Yaxın Şərqlə bağlı deyil, dünyadakı digər məsələlərə də yəqin ki, bu Şura müdaxilə edəcək. Tramp Rusiyanı ona görə dəvət edib ki, bu qurumun legitimliyini, mötəbərliyini təmin etsin. Tramp istəyir ki, Sülh Şurasını bütün tərəflər qəbul etsin. Putin bəzi Avropa dövlətlərinin qoşulmaması fonunda, qoşularaq siyasi oyun oynayır. Məqsəd bəzi Avropa ölkələri ilə ABŞ arasında konfrontasiya yaratmaqdır. Bu minvalla dondurulmuş vəsaitlərini xilas etmək istəyir. Ancaq düşünmürəm ki, Putin bununla Avropa ilə ABŞ-ı üz-üzə qoya bilsin. Lakin Moskva bu cəhdlərindən əl çəkməyəcək. Putin həm də ona görə bu təklifə qarşı getmir ki, Tramp Ukrayna məsələsində mövqeyini sərtləşdirə bilər. Bir səbəb də bununla bağlıdır”.
Vidadi ORDAHALLI
