Vüqar Bayramov: “Sözügedən məsələdə Azərbaycan öz maraqlarından çıxış edərək siyasətini qurur”
“30 il ərzində edilmiş dəvətlərə rəğmən, biz Ümumdünya Ticarət Təşkilatına qoşulmadıq, çünki öz iqtisadi suverenliyimizi qorumaq istəyirdik”. Bunu Prezident İlham Əliyev Davos Ümumdünya İqtisadi Forumunun illik toplantısı çərçivəsində "Avrasiyanın iqtisadi özünəməxsusluğunun müəyyənləşdirilməsi" mövzusunda panel iclasında deyib.
“Biz siyasi suverenliyə malik olmaqla yanaşı, müxtəlif tərəflərlə yaxşı münasibət saxlamaq istəyirik”, - o əlavə edib.
ÜTT 1995-ci ildə yaradılıb. O, Tariflər və Ticarət üzrə Baş Sazişin (GATT) varisi kimi yaradılmış beynəlxalq təşkilatdır. ÜTT millətlər arasında ticarətin qlobal qaydalarını müəyyənləşdirən yeganə beynəlxalq qurumdur. Onun funksiyasının ticarətin tarazlı, maneəsiz, ehtimal olunan şəkildə və azad aparılmasını təmin etmək olduğu bildirilir. Azərbaycanın ÜTT-yə üzv olmaq niyyətini əks etdirən ərizə 1997-ci ildə bu qurumun Katibliyinə verilib.
Sözügedən məsələni “Bakı-Xəbər”ə şərh edən millət vəkili Vüqar Bayramov hesab edir ki, sözügedən məsələdə Azərbaycan öz maraqlarından çıxış edərək siyasətini qurur: “Cənab Prezident İlham Əliyev “Euronews” kanalına verdiyi müsahibədə, eləcədə Davos İqtisadi Forumunda panel çıxışında ölkəmizin iqtisadi və siyasi suverenliyi ilə bağlı vacib məqamlara toxundu. Azərbaycan bir tərəfdən siyasi suverenliyini qorumaqla bağlı əməli addımlar atır, eyni zamanda iqtisadi sahədə müstəqil qərarlar qəbul edən ölkədir. Azərbaycanın praktik olaraq mövqeyi ondan ibarətdir ki, tərəfdaş ölkələrlə müstəqil, bərabər və hər iki tərəfin maraqlarına uyğun iqtisadi əlaqələrin qurulması. Bu konteksdən təbii ki, beynəlxalq təşkilatlarla əməkdaşlıqda məhz iqtisadi suverenlik prinsipi özünü göstərir. Yalnız Ümumdünya Ticarət Təşkilatı deyil, digər aparıcı beynəlxalq qurumlarla da əməkdaşlıq zamanı məhz bu prinsipə üstünlük verilir. O baxımdan növbəti dövrlərdə də Azərbaycan məhz öz iqtisadi suverenliyini nəzərə almaqla milli maraqlar çərçivəsində beynəlxalq qurumlarla əməkdaşlığı davam etdirəcək. O üzdən hesab edirəm ki, ÜTT-yə üzv məsələsində Azərbaycanın yeritdiyi siyasət doğrudur”.
Vidadi ORDAHALLI
