Rəşad Bayramov: “Bu, iki ölkənin regional məsələlərdə vahid mövqedən çıxış etdiyini bir daha təsdiqləyir”
Əgər regional nailiyyətlərimiz olmasa, istədiklərimizə nail olmasaq, qlobal töhfələr mümkün olmayacaq. Bu gün Azərbaycan-Ermənistan, eləcə də Türkiyə-Ermənistan yaxınlaşması paralel olaraq keçirilir. Bu barədə Prezident İlham Əliyev Davosda “Avrasiyanın iqtisadi özünəməxsusluğunun müəyyənləşdirilməsi” mövzusunda panel iclasında çıxışı zamanı deyib.
“Mən inanıram ki, həm Türkiyə ilə Ermənistan, eləcə də Azərbaycanla Ermənistan arasında diplomatik münasibətlər də paralel olaraq eyni vaxtda bərqərar olacaq”, - deyə dövlət başçısı əlavə edib.
Bununla əslində Prezident açıq şəkildə bildirir ki, Türkiyə ilə sərhədlər Azərbaycandan əvvəl açıla bilməz.
Sözügedən məsələ ilə bağlı fikirlərini “Bakı-Xəbər”lə bölüşən AMİP Ali Məclisinin sədri Rəşad Bayramov hesab edir ki, Prezidentin “Avrasiyanın iqtisadi özünəməxsusluğunun müəyyənləşdirilməsi” mövzusunda çıxışı zamanı səsləndirdiyi fikirlər regional siyasətin mövcud reallıqlarını və gələcək istiqamətlərini aydın şəkildə ortaya qoyur: “Əgər regional nailiyyətlərimiz olmasa, istədiklərimizə nail olmasaq, qlobal töhfələr mümkün olmayacaq” ifadəsi sadəcə ümumi bir tezis deyil. Bu, Cənubi Qafqazda sülh və əməkdaşlığın qlobal proseslər üçün həlledici şərt olduğunu göstərən strateji yanaşmadır. Bu kontekstdə Prezidentin “Mən inanıram ki, həm Türkiyə ilə Ermənistan, eləcə də Azərbaycanla Ermənistan arasında diplomatik münasibətlər paralel olaraq eyni vaxtda bərqərar olacaq” bəyanatı xüsusilə diqqət çəkir. Bu fikir əslində regional normallaşmanın mərhələli və selektiv deyil, sinxron və qarşılıqlı xarakter daşımalı olduğunu ifadə edir. Mesaj aydındır. Bununla Prezident açıq şəkildə bəyan edir ki, Ermənistan bir tərəflə münasibətləri normallaşdırıb, digər tərəflə gərginliyi saxlamaq kimi siyasət yürüdə bilməz. Beləliklə, Prezident dolayısı ilə, lakin kifayət qədər açıq formada bəyan edir ki, Türkiyə–Ermənistan sərhədlərinin açılması Azərbaycan-Ermənistan münasibətlərinin normallaşmasından kənarda mümkün deyil. Bu, həm də Türkiyə ilə Azərbaycanın regional məsələlərdə vahid mövqedən çıxış etdiyini bir daha təsdiqləyir. Rəsmi Ankara da dəfələrlə bəyan edib ki, Ermənistanla münasibətlərin bərpası Bakı ilə koordinasiya olunmadan və Azərbaycanın əsas maraqları nəzərə alınmadan həyata keçirilə bilməz. Ermənistan uzun illərdir ki, regional kommunikasiyaların açılmasını və iqtisadi blokadadan çıxmağı əsas prioritet kimi təqdim edir. Lakin Prezidentin bu çıxışı göstərir ki, həmin məqsədlərə çatmağın yolu siyasi bəyanatlardan deyil, konkret hüquqi və institusional addımlardan keçir. Ermənistan əgər həqiqətən regionda sülh və əməkdaşlıq istəyirsə, ilk növbədə Azərbaycanla real sülh sazişinin imzalanmasına getməlidir. Bunun üçün isə Konstitusiyasında və digər normativ sənədlərdə mövcud olan Azərbaycana qarşı ərazi iddialarından açıq şəkildə imtina etməlidir. Bu məqam xüsusilə vacibdir. Çünki davam edən ərazi iddiaları, revanşist ritorika Ermənistanın sülhə hazır olmadığını göstərir və istənilən normallaşma prosesini formal xarakterə çevirir. Prezidentin mesajı ondan ibarətdir ki, regionda yeni siyasi və iqtisadi arxitektura yalnız hüquqi baxımdan möhkəm təməl üzərində qurula bilər. Odur ki, bu bəyanat Ermənistan qarşısında açıq seçim qoyur. Ya regionun formalaşmış reallıqlarını qəbul edərək Azərbaycanla sülh yolunu seçmək və bununla Türkiyə ilə münasibətlərin də normallaşmasına yol açmaq, ya da qeyri-müəyyənlik və təcrid vəziyyətində qalmaq”.
Vidadi ORDAHALLI
