Məhəmməd Əsədullazadə: “Azərbaycan regionun təhlükəsizliyinin təmin edilməsi istiqamətində addımlar atır”
Prezident İlham Əliyev "Euronews" televiziyasına müsahibəsində bildirib ki, Azərbaycan daxilində potensial risklər mövcud deyil:
“Azərbaycan da daxil olmaqla, hər bir ölkə özünün sərhədləri boyu sabitlik haqqında düşünməlidir. Bütün potensial risklər kənardan qaynaqlana bilər. Bu səbəbdən biz hər zaman qonşuluğumuzda sabitliyin mövcud olması haqqında düşünürük. Ümid edirəm ki, Cənubi Qafqazda və region ətrafında vəziyyət pisləşməyəcək. Bizim istəyimiz, həqiqətən, bunu görməkdir. Ümid edirəm ki, hər bir ölkə regional sabitliyə və təhlükəsizliyə öz töhfəsini verəcəkdir”.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, Azərbaycanda daxili siyasi sabitlik təmin edilib və ölkədə heç bir risk yoxdur: “Cənab Prezidentin apardığı siyasət bu müstəvidə öz səmərəsini verməkdədir. Həmçinin İkinci Qarabağ müharibəsindən sonra da Cənubi Qafqazda ümumiyyətlə, regional təhlükəsizliyin təmin edilməsi istiqamətində mühüm addımlar atılıb. Azərbaycan ətrafında, xüsusən İranda baş verən proseslər təbii ki, narahatedici faktordur. Bu baxımdan Azərbaycan da regionda gedən prosesləri diqqətlə izləyir. İstənilən halda regionda hansısa genişmiqyaslı müharibənin baş verməsi Azərbaycanın təhlükəsizlik maraqlarına cavab vermir. Təbii ki, xarici təhlükələr olanda dövlətlərin sərhədləri də müəyyən qədər təhdid altına düşür. Ancaq bu nəzərə almaq lazımdır ki, Azərbaycanın quru sərhədləri bağlıdır. Bu amil kənar təhdidlərdən sığortalanmaqda önəmli rol oynayır. Ölkədə daxili siyasi sabitlik yüksək səviyyədədir. Bu müstəvidə Azərbaycan regionun təhlükəsizliyinin təmin edilməsi istiqamətində addımlar atır. Hətta bu sahədə xidmətlərinə görə cənab Prezidentə beynəlxalq mükafat verildi. Çünki atdığı addımlar, yeritdiyi siyasət regionda sülhün möhkəmlənməsinə ciddi töhfə verir. Proseslər müsbət istiqamətdə inkişaf edir”.
Vidadi ORDAHALLI
