Davosda diqqət çəkən məqamlardan biri də Azərbaycan və Ermənistan arasında sülh gündəliyi ilə bağlı oldu. İki ölkə burada beynəlxalq ictimaiyyəti Cənubi Qafqazın birgə inkişafına başlamaq əzmində olduqlarına əmin etdi.
Davos Forumunda Azərbaycan və Ermənistan prezidentləri İlham Əliyev və Vaaqn Xaçaturyan "Avrasiyanın İqtisadi Kimliyinin Müəyyənləşdirilməsi" mövzusunda panel müzakirəsində iştirak ediblər. Onlara Serbiya prezidenti Aleksandr Vuçiç və "Limak Holding"in sədri Ebru Özdəmir qoşulublar. Onlar Şərq-Qərb maraqları kontekstində Cənubi Qafqazda və Orta Asiyada dəyişən güc balansını, kommunikasiyaların açılmasını və "Tramp Yolu"nu müzakirə ediblər. bu fonda president İlham Əliyev “Euronews”a verdiyi müsahibədə bildirib: “Bu gün Ermənistan və Azərbaycan arasında münasibətlər artıq əməkdaşlığa doğru inkişaf edir. Biz Ermənistana yük daşınmasına qoyulan bütün məhdudiyyətləri aradan qaldırmışıq. Bundan əlavə, biz Ermənistanı vacib mallarla, əsasən də ölkənin çox asılı olduğu neft məhsulları ilə təchiz etməyə başlamışıq. Və bu, qarşılıqlı faydalı bir vəziyyətdir. Buna görə də inanıram ki, Ermənistan və Azərbaycanın, o cümlədən vətəndaş cəmiyyətinin birgə səyləri ilə Qafqazda nəinki uzunmüddətli, həm də daimi sülhə nail olacağıq. Məqsədimiz budur”. Forum ərəfəsində Ermənistan-Azərbaycan münaqişəsinə son qoymaq səylərinə görə İlham Əliyevə və Nikol Paşinyan və Zayed mükafatı veriləcəyi elan edildi. Rəsmi mükafatlandırma mərasimi 4 fevralda BƏƏ-nin Əbu-Dabi şəhərində keçiriləcək. Ermənistan liderinin sözçüsü Nazeli Baqdasaryan bildirib: “Mükafat Ermənistan və Azərbaycan arasında dialoq vasitəsi kimi sülhün bərqərar olması, etimadın qurulması və regionda sabit və davamlı sülhün bərqərar olması üçün davam edən səylərin tanınması olaraq təqdim edilib. Eyni mükafat İlham Əliyevə də təqdim edilib ki, bu da sülh üçün birgə işləməyin vacibliyini bir daha vurğulayır”. Bundan əlavə, Ermənistan və ABŞ hakimiyyəti tikintisinə 2026-cı ilin ikinci yarısında başlanacaq "Tramp Yolu"nun həyata keçirilməsi üçün çərçivə barədə razılığa gəliblər. Davosa səfərindən əvvəl Azərbaycan xarici işlər naziri Ceyhun Bayramov danışıqların təfərrüatlarını aydınlaşdırmaq və Vaşinqtonu Bakının İrəvanla münaqişənin sülh yolu ilə həlli prinsiplərinə sadiqliyinə əmin etmək üçün ABŞ-dan olan həmkarı Marko Rubioya zəng edib. Xatırladaq ki, Ermənistan və Azərbaycan arasında sülh müqaviləsi 8 avqust 2025-ci ildə ABŞ-da paraflanıb. Ermənistanın Xarici Kəşfiyyat Xidməti ümumiyyətlə Bayramovun vədləri ilə razıdır. Qurumun 20 yanvarda dərc olunmuş illik hesabatında bildirilir ki, Vaşinqtonda əldə edilən razılaşmalar sayəsində Azərbaycanla hərbi eskalasiya "demək olar ki, mümkün deyil". Kəşfiyyat rəsmiləri iki tərəfin sərhədlərin delimitasiyası və demarkasiyası, ticarət və iqtisadi təşəbbüslərin həyata keçirilməsi, iki cəmiyyət arasında dialoq, humanitar layihələr və bu kimi məsələlərdə irəliləyiş əldə edəcəyini gözləyirlər. Bu arada, beynəlxalq reytinq agentliyi “Fitch” qeyd edib ki, İrəvan və Bakı arasındakı münasibətlərin yaxşılaşması kommunikasiyaların tədricən açılması səbəbindən Cənubi Qafqazda iqtisadi artıma müsbət təsir göstərir, lakin tərəflər sülh müqaviləsi imzalamasalar, irəliləyiş dayandırıla bilər. Xüsusilə, parlament seçkilərindən sonra keçirilməsi planlaşdırılan Ermənistan konstitusiyasında dəyişiklik edilməsi ilə bağlı referendumun uğursuzluğu müqavilənin bağlanmasına mane ola bilər. Qeyd edək ki, Ermənistan İqtisadiyyat Nazirliyinin mətbuat katibi Lilit Şaboyan İrəvanın tezliklə Rusiyadan mayeləşdirilmiş təbii qaz almağa və onu Azərbaycan ərazisindən dəmir yolu ilə respublikaya çatdırmağa başlaması planlarını açıqlayıb: "Biz qazı iki əsas ölkədən idxal edirik: İran və Rusiya. Məlum səbəblərə görə İranda müəyyən problemlər yaranıb və Rusiya ilə bağlı problem Yuxarı Larsla bağlıdır, lakin bu, çox tezliklə həll olunacaq, çünki Ermənistana maye qaz idxalı dəmir yolu ilə başlayacaq. Rusiya maye qazı çox tezliklə Azərbaycan vasitəsilə Ermənistana çatdırılacaq".
Ramil QULİYEV
