Bəhruz Quliyev: “Prezidentin Davosda verdiyi mesaj ondan ibarətdir ki, beynəlxalq qurumların nüfuzu qəbul etdikləri sənədlərin icrası ilə ölçülür”
“Beynəlxalq vasitəçiliklə bağlı ümidlərimiz tamamilə uğursuzluğa düçar oldu. Ən böyük beynəlxalq qurum olan BMT-nin Təhlükəsizlik Şurası o vaxt Ermənistan qüvvələrinin bizim ərazidən qeyd-şərtsiz çıxarılması ilə bağlı dörd qətnamə qəbul etmişdi, ancaq onlar kağız üzərində qaldı”.
Bunu Azərbaycan Respublikasının Prezidenti İlham Əliyev Davos Ümumdünya İqtisadi Forumunun illik toplantısı çərçivəsində “Avrasiyanın iqtisadi özünəməxsusluğunun müəyyənləşdirilməsi” mövzusunda keçirilən panel iclasda çıxışında deyib.
Dövlət başçısı əlavə edib ki, ATƏT, digər beynəlxalq təşkilatlar çoxsaylı qətnamələr, qərarlar qəbul etsə də heç biri reallaşmadı: “O vaxta qədər ki, biz vəziyyəti öz əlimizə aldıq. Biz bunun öhdəsindən gələrək, ədaləti bərpa etdik, beynəlxalq hüquq, ərazi bütövlüyümüzü, suverenliyimizi bərqərar etdik. Ondan sonra biz sülhə nail olduq”.
Məsələyə münasibət bildirən “Səs” qəzetinin baş redaktoru, siyasi ekspert Bəhruz Quliyev baki-xeber.com-a açıqlamasında qeyd etdi ki, Prezident İlham Əliyevin Davosda səsləndirdiyi fikirlər beynəlxalq vasitəçilik mexanizmlərinin uzun illər ərzində necə iflasa uğradığını bir daha açıq şəkildə ortaya qoyur: “BMT Təhlükəsizlik Şurasının Ermənistan silahlı qüvvələrinin Azərbaycan ərazilərindən qeyd-şərtsiz çıxarılmasını tələb edən dörd qətnaməsi olsa da, onların icra edilməməsi beynəlxalq hüququn selektiv yanaşma ilə tətbiq edildiyini göstərdi. Bu, təkcə Azərbaycanın deyil, bütövlükdə beynəlxalq sistemin problemi idi. Qətnamələr qəbul olunurdu, lakin icra mexanizmi işləmirdi. Nəticədə işğal faktı illərlə davam etdi, qaçqın və məcburi köçkün problemi dərinləşdi, regional təhlükəsizlik ciddi təhdid altında qaldı. Beynəlxalq vasitəçilər isə prosesə real təsir göstərmək əvəzinə, status-kvonun qorunmasına xidmət edən passiv mövqe tutdular. Məhz bu reallıqlar fonunda Azərbaycan öz suveren hüquqlarını təmin etmək üçün tarixi qərar verdi və beynəlxalq hüququ BMT Nizamnaməsinə uyğun şəkildə özü icra etdi".
Həmsöhbətimiz hesab edir ki, Prezidentin Davosda verdiyi mesaj həm də ondan ibarətdir ki, beynəlxalq qurumların nüfuzu qəbul etdikləri sənədlərin icrası ilə ölçülür. Əks halda, bu cür platformalar sadəcə siyasi bəyanatlar meydanına çevrilir: “Azərbaycanın mövqeyi aydındır ki, ədalət kağız üzərində deyil, real addımlarla təsdiqlənməlidir. Bu gün regionda yaranmış yeni reallıqlar da məhz icrasız qətnamələrin doğurduğu tarixi dərslərin nəticəsidir".
Günel CƏLİLOVA
