Putinin yaxın çevrəsində “SSRİ-nin bərpası” şüarına qoşulanların sayı artır...
Hüseyn İbrahimov: “Rusiya nə dünən, nə də bu gün imperiya ambisiyalarından əl çəkməyib”
SSRİ-nin dağılması qanunsuz idi, onun hüquqi statusu nəzərə alınmalıdır və deputatlar bu məsələni qaldırmağa hazırdır. Bunu Rusiya Dövlət Dumasının deputatı Nina Ostanina deyib.
Ostaninanın sözlərinə görə, 1991-ci ildə keçirilən referendumda vətəndaşların əksəriyyəti SSRİ-nin saxlanmasına səs verib: “Yəni həm hüquqi, həm siyasi, həm də insani nöqteyi-nəzərdən, mahiyyət etibarı ilə Sovet İttifaqının sonu qeyri-qanuni idi, çünki heç kim Şuşkeviçə, Yeltsinə, Kravçuka qondarma Belovejsk müqaviləsini imzalamaq səlahiyyətini verməmişdi. Və bugünə qədər bu, hüquqi cəhətdən mübahisəli bir sənəddir. Rusiya bu gün də istintaq təşkil etməlidir. Prezidentin müşaviri bu mövqeyi ifadə edibsə, o zaman bu, bizdən asılı olmayacaq. Biz isə siyasi qərar verməyə hazırıq, bu barədə Dövlət Dumasında danışacağıq”.
Bundan başqa, Rusiya prezidentinin müşaviri Anton Kobyakov Sovet İttifaqının dağılması zamanı hüquqi prosedurun pozulduğunu və bunun SSRİ-nin guya “hələ də var olması” anlamına gəldiyini bildirib.
Maraqlıdır, ən yüksək səviyyədə belə kampaniyanın aparılmasında məqsəd nədir?
“Əgər Ukrayna kimi ölkə duruş gətirməyib təslim olsa, bunun postsovet ölkələri üçün çox ciddi mənfi fəsadları olacaq”
Sözügedən məsələyə aydınlıq gətirən İdarəçilik Akademiyasının müəllimi, sosioloq Hüseyn İbrahimovun fikrincə, bütün bunlar təsadüfi deyil: “Çünki Rusiya kimi ölkədə Duma səviyyəsində bu məsələ qaldırılırsa, bu, əsla təsadüf və hansısa partiyanın təşəbbüsü ilə ola bilməz. Ən azından, Kremlin idarəçilik sistemi barədə azacıq məlumatı olanlar bunu yaxşı bilir. Ona görə ki, Dövlət Dumasında təmsil olunan partiyaların heç biri müstəqil deyil və Kremldən gələn tezisləri yerinə yetirirlər. Belə məsələləri gündəliyə gətirməklə, həm əhalinin nəbzini yoxlayırlar, həm də ictimai rəyi buna kökləyirlər. Biz unutmamalıyıq ki, Rusiya nə dünən, nə də bu gün imperiya ambisiyalarından əl çəkməyib. Demokrat Boris Yeltsinin dövründə Çeçenistanda kütləvi qətliamlar törədildi, Moldovada, Gürcüstanda separatizm bilavasitə Rusiyanın dəstəyi ilə bu ölkələrin başına bəla oldu. O cümlədən, erməni separatizminin də arxasında Rusiya dayanırdı. Yoxsa Ermənistan kim idi ki, Azərbaycanın 20 faiz ərazisini işğal etsin? Bu gün Rusiyanın Ukraynada apardığı qanlı işğalçı müharibə də bunun tərkib hissəsidir. Əgər Ukrayna kimi ölkə duruş gətirməyib təslim olsa, bunun postsovet ölkələri üçün çox ciddi mənfi fəsadları olacaq. Rusiya həmin ölkələri müxtəlif vasitələrlə ələ keçirməyə çalışacaq. Adını da qoyacaqlar ki, “SSRİ-nin dağılması qanunsuz idi”. O üzdən hesab edirəm ki, bu kimi çağırışlar və bunun ali qanunvericilik müstəvisinə gətirilməsi təhlükəlidir. Çünki Rusiya əzəldən beynəlxalq hüquqa hörmət etməyib. Onlar yalnız güclü olan tərəfdən çəkiniblər. Lakin hesab edirəm ki, Rusiya öz imperiya xəyallarını reallaşdıra bilməyəcək. Ən azından, Çin kimi böyük ölkə Rusiya ilə nə qədər yaxın olsa da Pekin buna imkan verməz”.
Vidadi ORDAHALLI
