Təbriz Musayev: “Avroittifaq Azərbaycanla normal siyasi münasibətlər qurmağa məhkumdur”
Heç şübhəsiz ki, Azərbaycan Respublikasının Prezidenti İlham Əliyevin “Avropa Siyasi Birliyi”nin (ASB) 6-cı Zirvə Toplantısında iştirakı ölkəmizin beynəlxalq müstəvidə artan təsir imkanlarının və strateji rolunun növbəti aydın göstəricisi oldu. Bu mühüm beynəlxalq tədbirdə dövlət başçımızın iştirakı Azərbaycanın diplomatik fəallığının yüksələn xətt üzrə inkişaf etdiyini, Avropa İttifaqı (Aİ) və Avropa dövlətləri ilə münasibətlərdə yeni mərhələyə qədəm qoyduğunu bir daha sübut etdi.
Son illərdə Azərbaycan-Aİ münasibətlərində müşahidə olunan dinamizm, xüsusilə enerji, nəqliyyat və yaşıl iqtisadiyyat sahələrində əməkdaşlığın genişlənməsi fonunda daha da aktuallaşır. Halbuki, bir müddət əvvəl bu münasibətlərdə müəyyən gərginlik hiss olunurdu. Bu, Aİ-nin əvvəlki rəhbərliyinin qeyri-obyektiv və bəzi hallarda qərəzli yanaşmalarından qaynaqlanırdı. Məhz həmin dövrlərdə Ermənistan Aİ-də inhisarçı, bu bölgədə Avropanın əsas dayağına çevrilmək və beləliklə regionumuzda ayırıcı bir xətt aparmaq istəyirdi. Üstəlik, Gürcüstanla Aİ arasında yaşanan gərginlik də Ermənistanın əl-qolunu açırdı. Ermənistan hesab edirdi ki, Avropanın Cənubi Qafqazda əsas prioritet verdiyi ölkə, nöqtə olacaq. Guya Aİ Azərbaycana diqqət göstərmir və s. Ancaq Ermənistanın bununla bağlı gözləntiləri puça çıxdı. 6-cı Zirvə toplantısında Prezident İlham Əliyevin Aİ rəsmiləri səviyyəsində yüksək səviyyədə qarşılanması ermənilərin istəklərini ürəyində qoydu. Azərbaycanın Avropa ilə siyasi əlaqələri yenidən dinamik xarakter alır.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, bir sıra reallıqlar Ermənistanı və bu dövləti himayə edən xarici dairələrin planlarını fiaskoya uğratdı: “Ermənistanda ya bunu anlamaq qüdrətində deyillər, ya da bizə olan düşmənçilikdən bunu görməzdən gəlirlər. Kimin nə deməsindən asılı olmayaraq, Avroittifaq Azərbaycanla normal siyasi münasibətlər qurmağa məhkumdur. Bunu şərtləndirən çoxsaylı faktorlar vardır. Çünki Azərbaycan siyasi, geosiyasi, enerji, nəqliyyat sahələrində, ümumilikdə, dünyada qlobal problemlərin aradan qaldırılmasında etibarlı tərəfdaş kimi dəfələrlə özünü sübut edib. Azərbaycan əvvəl Avropanın əsasən enerji tərəfdaşı idisə, son illər həm də etibarlı nəqliyyat tərəfdaşıdır. Azərbaycan 10 Avropa ölkəsinə təbii qaz ixrac edir və onların 8-i Aİ üzvüdür. Azərbaycansız Aİ-nin Cənubi Qafqaz, Mərkəzi Asiya və Yaxın Şərqdə siyasətinin həyata keçirilməsini təsəvvür belə etmək mümkün deyil. Çünki ortada önəmli coğrafi amil faktoru var. Azərbaycansız Mərkəzi Asiya ilə Avropa arasında dayanıqlı, etibarlı əlaqə qurmaq mümkünsüzdür. Aİ bunu Rusiya, İran üzərindən həyata keçirə bilməz. Birincisi, tərəflər arasında siyasi münasibətlər gərgindir və bunun dərin kökləri var. İkincisi, hər iki ölkə sanksiyalar altındadır. Məsələn, Fransa Orta Asiyadan uran almaq istəyir. Bu, elə məhsuldur ki, bunu hava yolu ilə daşımaq mümkün deyil. Mütləq şəkildə quru və yaxud da dəniz yolu ilə daşınmalıdır. Azərbaycansız Fransa uranı ölkəsinə çatdıra bilməz. O cümlədən, Çinlə Avropa ölkələrində ticarət əlaqələrində ən qısa yol Azərbaycandan keçir. Ermənistan isə Cənubi Qafqazda dalan dövlətdir. Çünki bir sıra enerji və nəqliyyat layihələri Ermənistansız reallaşıb. Ona görə də sözügedən məsələdə Ermənistan Aİ üçün prioritet əhəmiyyət kəsb edən ölkə ola bilməz. Bu səbəbdən Aİ rəsmiləri bunu dərk edərək əvvəlki səhvlərini təkrarlamaq istəmirlər”.
Vidadi ORDAHALLI
