Elşad Həsənov: "Guya Azərbaycanın Rusiyasız yaşaya bilməyəcəyi barədə dedikləri boş demaqogiyadır"
"Azərbaycan Rusiyadan qaça bilməz. Sabah onlar hələ də bəzi ehtiyacları üçün bizə gələcəklər". Bunu Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini, qatı şovinist və ermənipərəst mövqeyilə tanınan Konstantin Zatulin deyib.
Zatulin təyyarə məsələsinə və "Rus Evi"-nin bağlanmasına görə Azərbaycanın ünvanına iftira xarakterli fikirlər səsləndirib. Onun sözlərinə görə, Moskva cavab addımları atmalıdır və nəticə çıxarmalıdır ki, Azərbaycan Rusiyanın müttəfiqi sayıla bilməz: "Biz başa düşməliyik ki, Azərbaycan bizim müttəfiqimiz deyil. Moskvada Azərbaycanın analoji strukturları var, bizim cavab addımları atmağımız düzgün olardı. Onlar heç vaxt bizim tam hüquqlu müttəfiqimiz olmayıb, Türkiyənin bölgədəki müttəfiqi olub və olaraq qalırlar".
"Rusiyanın və Ermənistanın timsalında Azərbaycana edilən bütün pisliklərə Zatulin dəstək verib"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, Azərbaycanın Rusiyasız yaşaya bilməyəcəyi ilə bağlı Zatulinin iddiaları absurddur: "Əvvəla, son zamanlar Rusiya-Azərbaycan münasibətlərinin gərginləşməsi onu göstərir ki, Moskvada bəzi siyasi dairələr bundan sui-istifadə edib vəziyyəti daha da gərginləşdirmək istəyirlər. Zatulin hər zaman Azərbaycana qarşı qərəzli mövqedən çıxış edən bir şəxs olub. Zatulin Ermənistanın Azərbaycan ərazilərini işğal etməsinə haqq qazandırıb, qanunsuz olaraq işğal dövründə Qarabağa səfər edib və s. Rusiyanın və Ermənistanın timsalında Azərbaycana edilən bütün pisliklərə Zatulin dəstək verib. Azərbaycan Ukrayna müharibəsində Rusiyaya qarşı tətbiq olunan sanksiyalarda iştirak etməyib. Bu məsələdə tərəf tutmur. Azərbaycan 44 günlük müharibədə səhvən Rusiya dövlətinə məxsus helekopterin vurulmasına görə qarşı tərəfdən üzr istəyib, buna görə kompensasiya ödəyib. O cümlədən, 2023-cü ilin sentyabrında antiterror əməliyyatları zamanı səhvən bir neçə sülhməramlının öldürülməsinə görə də analoji addım atıb. Ancaq əfsuslar olsun ki, ötən ilin 25 dekabrında Rusiya Azərbaycana məxsus mülki təyyarəni vursa da analoji addım atmır. Halbuki, ölənlərdən 16 nəfəri Rusiya vətəndaşı olub. Biz tələb edirik ki, beynəlxalq hüquq normalarına uyğun olaraq Rusiya Azərbaycandan üzr istəsin və buna görə konpensasiya ödəsin. Ancaq Rusiya bunu istəmir. Bəzi Duma üzvləri Azərbaycanın ünvanına böhtan və hədəyanlar səsləndirirlər. Zatulin bu baxımdan xüsusi bir tipdir. Ona görə ki, o, hər zaman erməni daşnaklarından bəslənib. Zatulin bir sıra məsələlərdə ermənidən çox ermənilik edir. Zatulinin guya Azərbaycanın Rusiyasız yaşaya bilməyəcəyi barədə dedikləri boş demaqogiyadır. Azərbaycan kiminsə hesabına yox, öz hesabına yaşayır. Bizim ticarət dövriyyəmizin böyük hissəsi Avropa ölkələri və Türkiyə ilədir. Azərbaycan Avropanın enerji təhlükəsizliyinə töhfə verir. Rusiyanın bizə hansı pisliklər etdiyini tarixdən yaxşı bilirik. Azərbaycan iqtisadi cəhətdən müstəqildir və o cümlədən Rusiyadan asılı deyil. Ona görə də Zatulinin bununla bağlı fikirləri boş sözlərdir".
Vidadi ORDAHALLI
