Elnur Kəlbizadə: "Guya orada hansısa dağıntının törədilməsi cəfəngiyatdan başqa bir şey deyil"
Azərbaycan 44 günlük Vətən müharibəsi nəticəsində Ermənistanın işğalına son qoydu, 23 saatlıq antiterror tədbirləri ilə ərazi bütövlüyünü təmin edib öz torpaqlarında suverenliyini bərqərar etdi. Bundan sonra Ermənistan mediası, ayrı-ayrı siyasilər, adını alim qoyan şəxslər Azərbaycana qarşı açıq-aşkar toponum müharibəsinə başladılar.
Əsassız olaraq Azərbaycanı xristian abidələrini "dağıtmaqda" ittiham etməyə başladılar. Biz onların bu cür yalan dolu iddialarına az qala hər gün rast gəlirik. İndi də yalandan yazırlar ki, guya Qarabağın "Məmmədadzor", yaxud "Mariamadzor" kəndində xristian abidələri "məhv edilir". Əslində o kəndin adı "Məmmədadzor" yox, Məmməddərədir və bu kənddəki xristian abidələrinin də ermənilərə heç bir aidiyyəti yoxdur. İkinci bir tərəfdən də, Azərbaycan dövləti heç zaman xristian abidələrinə qarşı siyasət yürütməyib, əksinə, o abidələri bərpa edib, qoruyub.
Azərbaycanı xristian əhəmiyyəti daşıyan tarix və memarlıq abidələrini, yaşayış məntəqələrini, yaşayış massivlərini "dağıtmaqda" ittiham edən erməni mediası iddia edir ki, guya 2025-ci il fevralın 4-də Telegram kanalında hansısa fotoşəkil dərc olunub və onlar da buna "əsasən" danışırlar (?).
Qarabağın xristian irsinin "təhlükə altında olduğunu" iddia edən ermənilər dünyanı inandırmağa çalışırlar ki, guya bütün irs "məhv olmaq" və "mənimsənilmək təhlükəsi altındadır", "bu, soyqırımın təzahürüdür". Guya Azərbaycan Cuğanın min illik xaçkarlarını məhv edib(?).
Həqiqətən də bütün bunlar erməni yalanından və erməni fantaziyasından başqa bir şey deyil. Azərbaycan öz torpağını işğaldan azad edib və öz abidələrinə sahib durub. Qarabağda tarixən erməni irsi, erməni abidəsi olmayıb və orda olanlar da alban xristian irsinin nümunələridir. Ermənistan tərəf Azərbaycanı qaralamaq məqsədilə yalan məlumatları yaymaqdan yorulmur. Uydumalar düzüb-qoşan ermənilər niyə bir dəfə özlərinin Qarabağda, indiki Ermənistan ərazisində törətdikləri vəhşilikləri, mədəni irs soyqırımlarını, kultsidləri vurğulamırlar? Azərbaycan heç vaxt xristian irsini hədəfə almayıb, almayacaq da. Tarixi, mədəni irs cinayətkarı ermənilərdir, biz yox.
"Əvvəla, Qarabağda "erməni irsi" kimi təqdim edilənlər Azərbaycan albanlarının irsidir"
Tarix üzrə fəlsəfə doktoru, dosent, AMEA-nin şöbə müdiri Elnur Kəlbizadə "Bakı-Xəbər"ə şərhində "Əvvəla qeyd etmək lazımdır ki, həmin kəndin tarixi adı Məhəmməddərədir. Vaxtilə XIX əsrdə bu əraziyə köçürülən ermənilər kəndi Mariamadzor adlandırmaqla elə öz təcavüzkar niyyətlərini göstərirlər. Guya orada hansısa dağıntının törədilməsi cəfəngiyatdan başqa bir şey deyil. Əvvəla, Qarabağda "erməni irsi" kimi təqdim edilənlər Azərbaycan albanlarının irsidir"-deyə bildirdi.
E.Kəlbuizdə qeyd etdi ki, hay ünsürünə onun heç bir aidiyyəti yoxdur. O vurğuladı ki, bunu ən yaxşı erməni keşişlərinin özləri bilirlər. "İkincisi, Azərbaycan ermənilərə aid abidələri məhv etmək niyyətində olsaydı, əvvəlcə Bakının mərkəzində 1863-1869-cu illərdə tikilmiş Müqəddəs Marifləndirici Qriqori kilsəsindən başlayardı. Tarix boyunca böyük imperiyalar və dövlətlər qurmuş Azərbaycan xalqının xristian keçmişi də vardır və biz haqlı olaraq həmin dövr tariximizlə də fəxr edirik. Bu ərazidə hansı dinə aid olmasından asılı olmayaraq hər bir abidə Azərbaycanın milli sərvətidir. Bizim üçün İrəvandakı Göy Məscid və dağıdılan digər məscidlər qədər, ərazilərimizdə yerləşən atəşgahlar da, kilsələr də, sinaqoqlar da doğmadır. Ermənilər yaxşı olar ki, hər gün vandalizm aktları və antisemit şüarlarla üzləşən İrəvandakı yəhudi sinaqoqun mühafizəsini gücləndirsinlər, İrəvan şəhərində dağıtdıqları məscidlərin taleyinə aydınlıq gətirsinlər, aysorlar yaşayan kəndlərində normal məktəblər tiksinlər, onların milli və dini hüquqlarını tanısınlar"-deyə E.Kəlbizadə bildirdi.
İradə SARIYEVA
