Hitlerin 1.5 milyondan çox insanı, əsasən də yəhudiləri məhv etdiyi Osvensim düşərgəsinin azad edilməsinin 80 illiyi bu günlərdə tamam olur. Sovet əsgərləri bu dəhşətli ölüm düşərgəsində 7 ton qadın və kişi saçı toplamışdılar. Hələ faşistlərin 45-ci ilə kimi oradan nə qədər saçı Berlinə apardıqlarını bir Allah bilir. Osvensim belə Osvensim olub...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Polşada Qərbin bir çox samballı dövlət rəhbərləri anım tədbirlərinə dəvət olunublar. Putin sonuncu dəfə bu anımda 2014-cü ildə iştirak edib. 2014-cü ildə Krımın işğalından sonra Osvensimin ildönüm tədbirlərinin qapısı Putinin üzünə bağlandı. Rusiyada bu gün Putinin dəvət olunmamasından böyük narahatlıq var. Rusiya ideoloqları, televiziyalar iddia edir ki, Osvensimi sovet qoşunları azad etdiyi üçün bu anımlarda iştiraka ən çox haqqı olanların biri Rusiya rəhbəri olmalı idi.
Putini boykot edən Qərbin də öz arqumentləri var. Qərbdə iddia edilir ki, keçmiş SSRİ və bu günkü Rusiya faşist Almaniyasından o qədər fərqlənmir və yəhudilər Almaniyada olduğu kimi bu ölkələrdə də qaz kameralarında boğulmasalar da təqib olunublar.
Əslində isə nə Putin, nə də Qərb ölkələrinin liderləri bu məsələdə haqlıdır.
Qərb liderləri ona görə, haqlı deyillər ki, Osvensimin azad olunmasında bir nəfər Qərb əsgəri iştirak etməyib və Osvensimin beton divarlarını ilk dəfə Stalinin tankları dağıdaraq hələ də düşərgədə öz ölümünü gözləyən 7500 potensial qurbanı xilas edib. Ən azı tarixi həqiqət xatirinə Qərb liderləri 80 il əvvəl onların iştirakı olmadan baş vermiş hadisənin öz adlarına yazılması kimi əcaib bir görüntünün yaranmasına imkan verməməli idilər. Belə görüntünün yaranmaması üçün nə etmək lazım olduğunu bilməli idilər. Mən bir azdan bunun necə edilməli olduğu barədə fikrimi yazacağam.
80 illikdə iştirak dəvəti almadığına görə, Putin də Qərbi ittiham etməkdə haqlı deyil. Niyə?
Çünki Osvensimi Rusiya ordusu yox, çoxmillətli Sovet ordusu azad etdi. Bu tədbirlərə Sovet ordusunun varisi kmi tək Rusiya prezidenti yox, SSRİ ordusuna zamanında töhfələr vermiş bütün sovet respublikaları dəvət olunmalı idilər. Azərbaycanın, Mərkəzi Asiya ölkələrinin və digərlərinin başçıları dəvət edilməli idilər. Halbuki tək Ukraynanın, 3 Baltik ölkəsinin və Moldovanın başçıları dəvət olundular.
Tarixi yaşatmaq istəyənlər dürüst olmağa çalışmalıdırlar. Onlar saxtakarlıq etsələr, tarixi yaradanlara xəyanət etmiş olurlar... Təəssüflər, saxtakarlığı da görürük, xəyanəti də...
Tahir TAĞIYEV
