Faiq Ələkbərli: "Molla rejimi terrorçunu cəzalandırmaqda və ədalətin bərpa edilməsində maraqlı deyil"
2023-cü il yanvarın 27-də Azərbaycanın İrandakı səfirliyinə terror hücumu baş verdi. Hadisənin üstündən iki ilə yaxın vaxt keçməsinə baxmayaraq, hələ də İran terror aktını törədən Yasin Hüseynzadəyə layiqli cəza verməyib. Onunla bağlı edam hökmünün çıxarıldığını bəyan etsələr də, hələ bu hökm icra olunmayıb.
Bir sözlə, molla rejimi cinayətkarı cəzadan yayındırmaq üçün bütün resurslarını işə salıb. Təbii ki, bu da Azərbaycan tərəfini ciddi narahat edir və ölkəmiz İrandan cinayətkarın cəzalandırılmasını tələb edir.
Prezident İlham Əliyev yanvarın 7-də yerli telekanallara müsahibəsində İran-Azərbaycan münasibətləri barədə danışarkən səfirliyimizə hucumla bağlı məsələyə də toxunub. Bu barədə Prezident Əliyev deyib: "...Daha sonra səfirliyimizə qarşı terror aktı törədildi və bu, təşkil olunmuş terror aktı idi. Bunu deməyə əsas verən bir çox amillər var idi. Birincisi, təxminən 40 dəqiqə ərzində bir dənə də polis maşını oraya yaxınlaşmamışdı. Halbuki bu, paytaxtın mərkəzində idi. Terroru törədən şəxs sonra dərhal, ertəsi gün psixi xəstə elan edildi. Halbuki, istənilən tibbi ekspertiza bir neçə gün davam edir. Həmin bu şəxs elə terroru törətdiyi gün mətbuata çıxıb müsahibə verir. O hadisədən iki il keçir. Bugünə qədər o insan ona verilən hökmə məruz qalmayıb. Bütün bunlar göstərir ki, bu, təşkil olunmuşdu. Bu, bir zəiflik nümayişi idi və Azərbaycan tərəfi də adekvat addımlar atdı. Bilirsiniz ki, biz səfirliyin bütün əməkdaşlarını geri çağırdıq və bizə rəsmi qaydada söz verilməyənə qədər, - İranın mərhum xarici işlər naziri, vertolyot qəzasında həlak olmuş cənab Abdullahian gəlib mənə söz vermişdi ki, o adam edam hökmünə cəlb ediləcək, - ondan sonra biz səfirliyin əməkdaşlarını geri qaytardıq. Amma bizi yenə də aldatdılar. Çünki bu edam hökmü həm icra edilmədi, həm də iş məhkəmədən yenə də istintaqa göndərildi. Yəni bu, dövlət səviyyəsində edilən anlaşılmaz bir hərəkət idi və biz öz tələblərimizdə israrlıyıq. Biz bilirik ki, İranda daha az ağır olan cinayətlərə görə edam hökmü elan edilir və dərhal icra olunur. Amma bu hadisədən iki il keçməsinə baxmayaraq, bu nəinki icra edilməyib, hətta iş yenə də istintaqa göndərilib".
İran niyə bu işi uzadır? Niyə birdəfəlik bu işi həll etmir?
"Əks halda proses çoxdan başa çatmalı və cinayətkar çoxdan cəzalandırılmalı idi, amma bunu görmürük"
AMEA-nın Sosiologiya və Fəlsəfə İnstitutunun şöbə müdiri, fəlsəfə doktoru, siyasi ekspert Faiq Ələkbərli "Bakı-Xəbər"ə şərhində bildirdi ki, Azərbaycan ötən illər ərzində İranla münasibətlərini nə qədər səmimiyyət və obyektivlik üzərində qurmağa çalışsa da, bunun qarşılığını görə biməyib. "Rəsmi Bakı mümkün olduğu qədər rəsmi Tehrana münasibətdə daha şəffaf, daha obyektiv siyasət yürüdüb və yürütməkdə də davam edir. Ancaq bir çox hallarda İran adlanan ölkə nəinki bu məsələlərdən ciddi şəkildə kənara çıxmalara yol verir, hətta açıq şəkildə Azərbaycanın əleyhinə işlər görməkdən belə çəkinmir. Yəni məsələnin əsas mahiyyətini bunda görmək lazımdır. Bu baxımdan, iki il əvvəl Azərbaycanın Tehrandakı səfirliyində baş verənlərin böyük bir terror cinayəti olduğu hər kəsə bəllidir. Bu cinayətin arxasında duranların da kimliyini bilirik. İkinci Qarabağ müharibəsində Azərbaycanın uğurlarını həzm edə bilməyən rəsmi Tehran aşkar Azərbaycanı təhdid etdi və ölkəmizin Tehrandakı səfirliyinə terror hücumu təşkil edərək bu prosesin arxasında dayandı".
F.Ələkbərlinin fikrincə, bu məsələni Azərbaycan Prezidentinin bu şəkildə səsləndirməsi də təsadüfi deyil. O qeyd etdi ki, Prezident Əliyev əvvəlki dövrdə də Tehran hakimiyyətinə bu və digər şəkildə öz xəbərdarlığını edib, mesajlarını ötürüb, bu rejimin yanlış yolda olduğunu ifadə edib. "Ancaq görünür, bu mesajlardan, xəbərdarlıqlardan rəsmi Tehran nəticə çıxarmaq istəmir. Prezident öz müsahibəsində Tehran rejiminin mahiyyətini bir daha ifşa etdi. Burda məsələ təkcə Tehrandakı səfirliyimizə qarşı baş verən xain terror hucumu deyil, İkinci Qarabağ müharibəsi dövründə və ondan sonrakı vaxtda İranın addımlarına, qanunsuz, qeyri-hüquqi davranışlarına da aydınlıq gətirdi. Prezident eyni zamanda Tehrandakı səfirliyimizdə terror törədən şəxsin İran hökuməti tərəfindən cəzalandırıldığını, bunun isə gerçəklikdə reallaşmamasını dilə gətirdi. Tehran rejimi səfirliyimizə hücum edən terrorçunun cəzalandırılması məsələsini müxtəlif bəhanələrlə uzatmaqla, gah edam qərarını elan etməklə, gah da işi yenidən məhkəməyə göndərməklə əslində o canini himayə etdiyini göstərmiş olur. Molla rejimi terrorçunu cəzalandırmaqda və ədalətin bərpa edilməsində maraqlı deyil. Əks halda proses çoxdan başa çatmalı və cinayətkar çoxdan cəzalandırılmalı idi, amma bunu görmürük. Günü-gündən səbəbsiz yerə proses uzadılır".
F.Ələkbərlinin vurğuladığına görə, Prezident Əliyev rəsmi Tehrana göstərir ki, Azərbaycan öz siyasətində yeni addımlar atacaq, yəni İranın yanlış siyasətinə qarşı əvvəlki kimi dözümlü münasibət göstərməyəcək, molla rejiminin addımlarına qarşı müvafiq addımlar atılacaq. "Bir tərəfdən İran Tehrandakı səfirliyimizə hücum edən terrorçunu himayə edir, o biri tərəfdən işğalçı Ermənistanı dəstəkləyir, son zamanlar hansısa əyalət mollası Azərbaycan və Türkiyə prezidentlərinə qarşı hədyanlar yağdırır, bu da bizim səbr kasamızı daşırır. Ona görə də, mənə elə gəlir ki, Prezident İlham Əliyevin təbirincə desək, artıq rəsmi Bakı daha sərt addımlar atmalı olacaq. Hesab edirəm ki, İranla münasibətlər əvvəlki şəkildə olmayacaq. Prezidentin bu mesajları ilə bağlı əgər rəsmi Tehran müvafiq addımlar atmayacaqsa, Tehrandakı səfirliyimizdə silahlı terror törədən öz layiqli cəzasını almayacaqsa, Ərdəbilin imam-cüməsi dövlət səviyyəsində cəzalandırılmayacaqsa, o zaman rəsmi Bakının addımları buna uyğun olacaq. Dövlət başçısı yeni bir mərhələnin işarəsini verdi. Azərbaycan geriyə addım atmayacaq, hansısa güzəştli mövqe tutmayacaq. Əksinə, biz daha çox müdafiə olunmaqdan hücum etmək müstəvsinə keçməliyik. Əlbəttə, bu məsələdə dünya azərbaycanlılarının, İran adlı ölkədə yaşayan soydaşlarımızın da bizim üçün sözün həqiqi mənasında bir güc mənbəyi olduğu bəllidir. Onlar artıq Təbrizdə Azərbaycan və Türkiyə prezidentlərini müdafiə edən posterlər qoyur, sloqanlar, şüarlar paylaşırlar. Bu onu göstərir ki, güney azərbaycanlılar da bizimlə birgə molla rejiminə öz yerini göstərməyə çoxdan hazırdırlar" - deyə F.Ələkbərli vurğuladı.
İradə SARIYEVA
