Sahil Kərimli: "Bu gün həqiqətən də dünyada lider böhranı yaşanır"
Azərbaycan Prezidenti İlham Əliyev yanvarın 7-də yerli televiziya kanallarına müsahibəsində ən müxtəlif məsələlərə, mövzulara geniş şəkildə toxunub və dünyaya, antiazərbaycan qüvvələrə, ölkəmizin daxili işlərinə qarışmağa cəhd edənlərə mesajlar verib.
Prezident İlham Əliyev jurnalistin "Təxminən müsahibənin əvvəllərində qeyd etdiniz ki, yeni dünya nizamının formalaşmasının başlanğıcındayıq. Bilmək istərdik, bu nizamın Cənubi Qafqaza mümkün təsirləri nə ola bilər və Azərbaycan hansı ssenarilərə hazırlaşır" sualına cavabında "Əslində, biz bu prosesin fəal iştirakçısı olmalıyıq. Biz, sadəcə olaraq, burada yeni nizamın necə olacağını gözləməməliyik. Biz öz işimizi görməliyik və gündəliyimizi bundan sonra da tətbiq etməliyik. Çünki Cənubi Qafqaz bizim regionumuzdur və Azərbaycan bu bölgənin aparıcı ölkəsi kimi, əlbəttə ki, məsuliyyət nöqteyi-nəzərindən də xüsusi çəkiyə malikdir. Ona görə yeni nizamı biz ədalətli nizam kimi görürük" - deyə cavab verib.
Prezident eyni zamanda bildirib ki, dövlətlərin zəif olması onların liderlərinin zəif olması ilə bağlıdır: "...Amma gözümüzün önündə olan bir çox ölkələr xarici müdaxiləyə məruz qalırlar və bu, o ölkələrin mənəvi və genetik kodunu da faktiki olaraq sarsıdır. Zəif ölkələrə yad dəyərlər, mənfi dəyərlər aşılanır. Zəif deyəndə, ölkə zəif ola bilməz. Liderlər əgər zəifdirlərsə, onda ölkə zəif sayılır. Ona görə biz bu işə öz gündəliyimizlə hazırıq, gündəliyimiz də var. Yəni ki, bizim siyasətimiz artıq bunu göstərir və yenə də deyirəm, bu işə bizim töhfəmiz əhəmiyyətli olacaq..."
"Biz bunu həm əvvəlki dövrdə, yəni Bayden adminstrasiyası dövründə ABŞ-da, həm Makronun timsalında Fransada müşahidə etdik, həm də..."
Prezidentin bu bəyanatı barədə danışan siyasi ekspert Sahil Kərimli "Bakı-Xəbər"ə bildirdi ki, Azərbaycan Prezidenti tamamilə haqlıdır və zəif liderin ölkəsi güclü ola bilməz. "Prezident İlham Əliyev bir neçə gün əvvəl yerli telekanallara müsahibəsində həm dünyada baş verən geosiyasi prosesləri, həm də Cənubi Qafqazda cərəyan edən hadisələri, Azərbaycanla bağlı bir çox siyasi, iqtisadi, hərbi və digər məsələləri çox ustalıqla, unikal formada, mükəmməl şəkildə analiz etdi. Eyni zamanda Azərbaycan Prezidenti öz mesajlarını da qətiyyətli bəyanat formasında beynəlxalq siyasi dairələrə ötürdü. Həmin dairələr ki, Cənubi Qafqazda gedən proseslərdə Azərbaycanın müstəsna xidmətlərini, yaratdığı yeni reallıqları qəbul etmək istəmirlər, onlar Azərbaycana qarşı açıq qərəzli və düşmənçilik siyasəti həyata keçirirlər. Prezident onu da bəyan etdi ki, bu gün həqiqətən də dünyada lider böhranı yaşanır. Biz bunu açıq şəkildə vurğulamalıyıq. Dünyanın əksər güclü ölkələrinin liderləri bu gün hansı durumdadır, hansı acınacaqlı vəziyyətdədir və hansı yarıtmaz siyasət yürüdürlər, biz bunu həm əvvəlki dövrdə, yəni Bayden adminstrasiyası dövründə ABŞ-da, həm Makronun timsalında Fransada müşahidə etdik, həm də Avropanın bir çox aparıcı ölkələrinin lider böhranı problemində açıq-aydın görürük"-deyə S.Kərimli bildirdi.
S.Kərimlinin fikrincə, bu gün dünyanın dəyişən, yenilənən nizamında həmin ölkələrin liderlərinin zəif xarakterli olması, ümumiyyətlə düzgün xarici və daxili siyasət yürüdə bilməməsi və sair onu göstərir ki, həmin ölkələr dayanmadan həm siyasi, həm də istiqadi baxımdan tənəzzülə uğrayırlar. "Yəni bu mənada, Azərbaycan Prezidenti açıq-aydın, net şəkildə dünyanın siyasi xəritəsini yenidən cızmış oldu və bizim üçün bir çox mətləblər yenidən gündəmə gətirildi. Bu gün açıq şəkildə demək lazımdır ki, Azərbaycan Prezident İlham Əliyevin qətiyyətli siyasi iradəsi, güclü məntiqi, praqmatik düşüncəsi və siyasəti nəticəsində dünyada aparıcı siyasi qüvvə olmaqda davam edir. Aparıcı siyasi və iqtisadi aktor rolunu peşəkarlıqla oynayır".
S.Kərimli qeyd etdi ki, biz bu gün Azərbaycanın durmadan artan nüfuzunun, artan qüdrətinin fonunda ölkəmizin bir neçə addım irəlidə olmasının açıq-aydın şahidi oluruq. O vurğuladı ki, eyni zamanda Azərbaycan həm humanist, həm səmimi, həm ləyaqətli siyasət aparmaqla dünyada özünəməxsus yer tutan ölkədir. "Hesab edirəm ki, Azərbaycanın bu istiqamətdə bənzəri də yoxdur. Çünki həm də onu vurğulamaq lazımdır ki, Azərbaycan elə məsələlərdə elə balanslaşmış siyasət yürüdür ki, bu siyasəti ancaq alqışlamaq lazımdır. Yəni bu gün Azərbaycan NATO ölkəsi olan qardaş, dost Türkiyə ilə müttəfiqdir, həm də eyni zamanda, NATO daim üz-üzə dayanan Rusiya ilə müttəfiqdir. Azərbaycan bütün siyasi kursunu xoşməramlı, xoş niyyətli, eyni zamanda balanslaşmış şəkildə həyata keçirir ki, bu da Azərbaycanın gələcəkdə öz nüfuzlu yerini dünyanın siyasi arenasında müəyyənləşdirir" - deyə S.Kərimli vurğuladı.
İradə SARIYEVA
