Tural İrfan: "Ərdəbilə erməni əsilli o şəxsi təyin edən dini lider özünü İslama aid bilirsə, dinin tələbi olaraq üzr istəməlidir"
Molla rejiminin bir qrup nümayəndələri var ki, daim Azərbaycan Respublikasına, onun rəhbərliyinə qarşı hədyanlar danışır, əsassız iddialar irəli sürür, əxlaqdan kənar münasibət sərgiləyirlər.
Onlardan biri də Ərdəbil əyalətinin imam-cüməsi Həsən Amelidir ki, rəsmi tədbirdə çıxışı zamanı Azərbaycan və Türkiyə prezidentlərinə qarşı təhqiramiz ifadələr işlədib. İran rəhbərliyi isə qeyri-adekvat olaraq buna yalnız XİN səviyyəsində təəssüfləndiyini bildirib, heç bir əməli tədbir görməyib.
Prezident İlham Əliyev yanvarın 7-də yerli televiziya kanallarına müsahibəsində Ərdəbil şəhərinin mollasının Azərbaycana, Azərbaycan xalqına qarşı təhqiramiz ifadələr işlətməsi məsələsinə toxunub.
Prezident Əliyev bununla bağlı deyib: "O ki qaldı, əyalət mollasının bizə qarşı nifrət münasibətinə, bu, birinci dəfə deyil. Ərdəbil şəhərinin o mollası dəfələrlə Azərbaycana, Azərbaycan xalqına qarşı təhqiramiz ifadələr işlədib, o cümlədən mənə qarşı. Burada sual ondan ibarətdir ki, onu o vəzifəyə təyin edən adam buna necə münasibət göstərir. Axı o, özbaşına gəlib orada oturmayıb. Onu kim təyin edir, biz yaxşı bilirik. Onun reaksiyası nədir, o bunu dəstəkləyir, yoxsa yox və Azərbaycandan kim üzr istəyəcək? Üzr istəyəcəklər, yoxsa yox?
İranın Xarici İşlər Nazirliyinin açıqlamasındakı təəssüf hissi kifayət deyil. Burada açıq təhqir olub: həm Türkiyə, həm Azərbaycan prezidentləri, həm bizim xalqlar və rəsmi tədbirdə canlı yayım gedən zaman və sadəcə təəssüf?! Bu, əlbəttə ki, qəbuledilməzdir. Ona görə biz hesab edirik ki, o əyalət mollası cəzalandırılmalıdır. Ən azı, vəzifəsindən qovulmalıdır və Azərbaycandan üzr istəməlidir. Bax, məsələ bundadır".
İran tərəfdən kim üzr istəsə Azərbaycan qane olacaq? Kim üzr istəməlidir ki, bu Azərbaycanı qane etsin?
"Cənab Prezidentin İranın bu fitnəkar əməllərinə qarşı mövqeyi tam haqlıdır və bu eyni zamanda xalqımızın tələbidir ki..."
Milli Cəbhə Partiyasının (MCP) sədr müavini, ilahiyyatçı Tural İrfan "Bakı-Xəbər"ə "Məlumdur ki, İranın Azərbaycana qarşı törətdiyi mənfur əməllərlə ilk dəfə qarşılaşmırıq. Davamlı şəkildə buna oxşar formada ölkəmizə, xalqımıza, dövlət rəhbərliyinə qarşı İran təhqir və iftiralar yağdırır. Təbii ki, cənab Prezidentin dediyi kimi, Ərdəbilə erməni əsilli o şəxsi təyin edən dini lider əgər özünü İslama aid bilirsə, dinin tələbi olaraq üzr istəməlidir. Çünki İslam dininə görə şər-böhtan, qardaşa xəyanət, söyüş, təhqir haram hesab olunur. Deputatımıza qarşı terror fətvasını birbaşa İranın dini lideri vermişdi. Səfirliyimizə hücum və qətllə bağlı əgər onun təşkilatçılığı yox idisə, münasibət bildirib qatilin cəzalanmasına nail olardı. Amma bunu da görmədik. Həsən Amulinin vaxtilə Livana köçürülmüş erməni əsilli şəxs olması öz yerində. Elə bir xəbis adamın türk şəhərinə baş molla təyin olunmasının özü də soydaşlarımıza təhqirdir" - deyə bildirdi.
T.İrfanın fikrincə, gərək onlar da etiraz etsinlər ki, əslən erməni olan və bunu davamlı şəkildə dilə gətirən Həsən Amuli özünü seyid elan etməklə Peyğəmbər soyunu təhqir etmiş olur, həm də özünü azərbaycanlı elan etməklə millətimizin sümüyünü başqa sümüyə calamış olur. "Cənab Prezidentin dediyi kimi, o dərhal vəzifəsindən azad edilməlidir və cəzalanmalıdır. Çünki iki müsəlman və türk dövlətin başçısını təhqir etdirib, iki dövlətə qarşı təxribata yol verib. Sasanilər zamanında Hindistandan indiki İrana köç etmiş erməni tayfaları 2-ci xəlifə fars imperiyasını fəth edəndə Livan, Suriya, Fələstin kimi ucqar yerlərə qaçdılar. Səfəvilər zamanı həmin ermənilər müsəlman cildində qaytarılıb dini konsepsiya, qanun, şəriət hökmləri formalaşdırmağa, məzhəblər arasında ideoloji nifaqın əsasını qoymağa başladılar. Həsən Amulinin soyadı da Livanın Cəbəl Amul vilayəti ilə bağlıdır. Çünki babaları həmin ermənilərdir ki, Livandan köç ediblər. Bunların bir qismi İranın fars bölgələrində özlərini fars kimi, kürd bölgəsində kürd kimi, Ərdəbil, Təbriz kimi türk bölgəsində də türk kimi qələmə verirlər, ermənilərin içindəkilər isə açıq erməni kimliyi ilə əməllərinə davam edirlər. Yəni İran rejiminin anti-İslam və antitürk siyasəti həm İslam aləmini, həm də türk dünyasını artıq təngə gətirib. İran bir qaratikan kolu kimi türk və İslam aləmi arasında bitib. "Zəngəzur dəhlizinə" maneə yaradan da odur".
T.İrfan qeyd etdi ki, Suriyada terror, narkotik ticarətinin qarşısını Türkiyə alandan sonra Həsən Amulinin Livan və Suriyadakı erməni qohumları ilə həşiş biznesinə xələl gəlib, ona görə daha da radikallaşıb.
"Azərbaycana qarşı qonşuluq ənənəsinə xəyanət edən İranın rəsmi din və dövlət xadimi sayılan, dövlətin faktiki başçısı Xamneinin rəsmi nümayəndəsi Amuli və onu o vəzifəyə təyin edən şəxs üzr istəməlidir həm Azərbaycandan. həm də Türkiyədən. Çünki İslam dininin tələbi budur. Amma onların öz dinlərinə görə necədirsə bunu zaman göstərəcək. Artıq İran rejimini müsəlman hesab etmək özünü aldatmaqdır. İslamın heç bir dəyərinə hörmət etməyən, əksinə, İslamı təhqir edən, müsəlmanlara xəyanət edən, iki müsəlman ölkə arasında dəhlizin açılmasına maneələr yaradan bir rejim necə müsəlman ola bilər? Eləsinə İslam dövləti, müsəlman rejim demək özü İslamı aşağılamaqdır. Müsəlman da məscidə donuz salanlara qardaş deyib silah verərdimi? Müsəlman müsəlmana qarşı terror edərdimi? Əsla etməzdi.
Cənab Prezidentin İranın bu fitnəkarlıq əməllərinə qarşı mövqeyi tam haqlıdır və bu eyni zamanda xalqımızın tələbidir ki, İran rejimi ali səviyyədə üzr istəməli və bir daha Azərbaycana qarşı belə mənfur əməllər törətməməlidir" - deyə T.İrfan qeyd etdi.
İradə SARIYEVA
