Ceyhun Məmmədov: "ABŞ bu məsələni, bu reallığı mütləq nəzərə almalıdır və tərəf saxlamaqdan imtina etməlidir"
Co Bayden administasiyası dönəmində ABŞ-la Azərbaycan arasında münasibətlər heç də yaxşıya doğru getmədi, əksinə, pisləşməyə doğru getdi. Buna səbəb isə Bayden administrasiyasının Azərbaycana qarşı yürütdüyü qərəzli siyasət oldu. Amma artıq Bayden yol üstədir və ABŞ-ın yeni prezidenti Donald Tramp seçilib.
İndi Azərbaycan-ABŞ münasibətlərinin Trampın dövründə necə olacağı məsələsi geniş müzakirə edilir.
Prezident İlham Əliyev yanvarın 7-də yerli televiziya kanallarına müsahibəsində ABŞ və Azərbaycan arasında gələcək münasibətlərə də toxunub. Azərbaycan Prezidenti "Əgər hər iki tərəf maraqlı olsa, biz Amerika-Azərbaycan əlaqələrini strateji səviyyəyə qaldıra bilərik"-deyə bildirib. Trampın öz açıqlamaları ilə çox aydın, açıq mesajlar göndərdiyini vurğulayan Azərbaycan Prezidenti əlavə edib: "Onların böyük əksəriyyətini Azərbaycan ictimaiyyəti bölüşür. Yəni ona görə ümidlər böyükdür. Ona görə mən dedim ki, ümidlər var, ümidlər böyükdür. O cümlədən Amerika-Azərbaycan strateji əlaqələrinə yaxınlaşmaq da mümkün olacaq".
Amerika bunun üçün nə etməlidir? Biz nə etməliyik?
Azərbaycan-ABŞ münasibətlərinin strateji olması üçün kim nə etməlidir?
"Digər səpkili vacib addımlar atılmalıdır ki, bu məsələlər həllini tapsın"
Millət vəkili Ceyhun Məmmədov "Bakı-Xəbər"ə şərhində bildirdi ki, Prezident İlham Əliyevin müsahibəsində də qeyd etdiyi kimi, Azərbaycanla ABŞ arasında uzun illərə əsaslanan strateji müttəfiqlik var. C.Məmmədovun sözlərinə görə, biz Əfqanıstanla, Əfqanıstana təyyarələrin gedişi ilə, təhlükəsizliklə, enerji təhlükəsizliyi bağlı məsələdə ABŞ-la sıx əməkdaşlıq etmişik. "Azərbaycan bu istiqamətdə Amerikanın yanında olub. Uzun illər bu əməkdaşlıq davam edib. Təəssüflə qeyd etmək lazımdır ki, Bayden administrasiyası dövründə biz bu siyasətin, bu yanaşmanın dəyişdiyini gördük. Yəni Azərbaycana qarşı qərəz, ikili standart və ədalətsiz yanaşma müşahidə etdik. Azərbaycan çox çalışdı ki, münasibətlər inkişaf etsin, amma Bayden administrasiyası açıq-aydın Ermənistanın yanında oldu, Ermənistanın törətdiyi cinayətlərə haqq qazandırmağa çalışdı və dəfələrlə senatda müxtəlif istiqamətlərdə Azərbaycan əleyhinə müzakirələr aparmağa, qətnamələr qəbul etməyə çalışdı. Bir neçə dəfə cənab Prezdentin də qeyd etdiyi kimi, Azərbaycanın Tramp administrasiyasına ümidi böyükdür. Bu müsahibədə onun verdiyi mesajları Azərbaycan cəmiyyəti də bölüşür, ümidlər böyükdür. Ona görə biz hesab edirik ki, Azərbaycan-Amerika strateji əlaqələri daha da yaxşılaşa bilər".
C.Məmmədovun sözlərinə görə, bunun üçün qarşılıqlı şəkildə müəyyən addımlar atılmalıdır: "Hesab edirik ki, birinci növbədə ABŞ Qarabağla bağlı məsələyə ədalətli mövqe nümayiş etdirməlidir. Yəni tərəf saxlamamalıdır. Cənab Prezidentin qeyd etdiyi kimi, tərəf saxlayan ölkə bu prosesdə vasitəçi ola bilməz. Bu birmənalıdır. Yəni ABŞ bu məsələni, bu reallığı mütləq nəzərə almalıdır və tərəf saxlamaqdan imtina etməlidir. Eyni zamanda bu məsələdə Azərbaycanla münasibətlərin qorunması üçün ABŞ tərəfindən real addımlar atılmalıdır. Bugünə kimi keçmiş administrasiya tərəfindən sərgilənən ədalətsiz münasibətə son qoyulmalıdır.
Azərbaycana gəldikdə isə, hesab edirik ki, Azərbaycan öz üzərinə düşəni edir. Cənab Prezidentin rəhbərliyi ilə Azərbaycan böyük səmimi siyasət həyata keçirir. Azərbaycan ABŞ-la təhlükəsizlik və digər məsələlərdə əməkdaşlığa hazırdır. O əməkdaşlıq isə qanuna, qarşılıqlı hörmətə əsaslanmalıdır. Yəni ölkədəki proseslərə kobud müdaxiləsi olmamalıdır, Azərbaycanın daxili işlərinə qarşılmamalıdır. Eyni zamanda digər səpkili vacib addımlar atılmalıdır ki, bu məsələlər həllini tapsın. Azərbaycan indi də Prezident İlham Əliyevin nümunəsində bu mesajları verir ki, əməkdaşlıq və müzakirələr üçün hazırıq, ancaq biz ədalət, qarşılıqlı hörmət, daxili işlərimizə qarışılmamasını istəyirik. Yəni bu olduqca önəmli bir məsələdir".
İradə SARIYEVA
