Bəhruz Quliyev: "Qərb Ermənistanı silahlandırır, Azərbaycanla yeni savaşa hazırlayır"
Prezident İlham Əliyevin Birləşmiş Ştatların Ermənistana silah verməsinə dair bəyanatına Dövlət Departamenti öz aləmində belə cavab verib: "ABŞ-nin Ermənistanla Azərbaycana göstərdiyi hərbi yardım hücum məqsədləri üçün istifadə oluna bilməz.
ABŞ Ermənistan və Azərbaycana göstərdiyi bütün təhlükəsizlik yardımını diqqətlə gözdən keçirir ki, ondan hücum məqsədləri üçün istifadə olunmasın, davamlı və ləyaqətli sülh danışıqlarıyla bağlı səylərə xələl gəlməsin".
Vaşinqtonda bu əminlik hardandır ki, ABŞ-ın Ermənistana göstərdiyi hərbi yardım hücum məqsədləri üçün istifadə olunmayacaq? Bununla ABŞ kimi aldadır?
"Vaşinqtonun İrəvanla hərbi əməkdaşlığı regionda bir neçə dövlətə qarşı yönəlib"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev bildirdi ki, ABŞ demokratlarının prezidenti Bayden hakimiyyətinin son günlərini yaşayır: "O, ötən 4 il ərzində dünya siyasətində heç nə ilə yadda qalmadı, ABŞ-ın qazandığı nüfuzu xərcləməklə dövrünü başa vurmaqdadır. Amma ona "kiçik uğur vəd edən" addımlar atmağı məsləhət görən ətrafı ona Cənubi Qafqazı, konkret olaraq Ermənistanı xatırladıblar. Trampın birinci prezidentlik dövründə Qarabağda Azərbaycanın qələbəsi ilə sona çatan müharibə başlamışdı. Baydenin dönəmində isə ABŞ-ın bütün siyasi emissarları İrəvana axışdılar, işğalçı ölkəyə dəstək verdilər, separatçıların yanında olduqlarını hər addımda göstərdilər. Bu gün Bayden administrasiyasının Ermənistana yardımları da müharibə həvəsindən, ermənilərlə həmrəylikdən qaynaqlanır".
Politoloq B.Quliyev diqqəti bir neçə ay əvvələ, Brüsseldə keçirilən ABŞ-Aİ-Ermənistan görüşünə cəlb edərək qeyd etdi ki, "sabit və daha möhkəm Ermənistan daha stabil Cənubi Qafqaz deməkdir" mövqeyindən çıxış edən Qərbin məqsədi bütün regionda qeyri-sabitlik yaratmaqdır: "Avropa İttifaqı və ABŞ tərəfindən bu kimi fəaliyyətlər açıq şəkildə qərəzli xarakter daşıyır və ikili standart yanaşmasına əsaslanır. Erməni tərəfini xoş niyyətlə danışıqlara sövq etmək əvəzinə, regionda yeni bölücü xətlər və "təsir dairələri" yaratmaq niyyəti ortadadır. Nədənsə, Brüsseldə keçirilmiş həmin görüş "ticari tərəfdaşlığının şaxələndirilməsinə və Ermənistanın iqtisadi sabitliyinə" həsr olunmadı. Əksinə, İrəvana göndərilən yüklərin hərbi təyinatlı olduğu öz təsdiqini tapır. ABŞ Dövlət Departamentinin, "ABŞ-nin Ermənistana göstərdiyi hərbi yardım hücum məqsədləri üçün istifadə olunmasın, davamlı və ləyaqətli sülh danışıqlarıyla bağlı səylərə xələl gəlməsin" fikri, əlbəttə, aldadıcıdır. Qərb Ermənistanı silahlandırır, Azərbaycanla yeni savaşa hazırlayır. ABŞ və Fransa hərbçilərinin Ermənistanda, xüsusən də Zəngəzurda, Azərbaycanla sərhədə yaxın ərazilərdə olması nə deməkdir? Sülhü regiona təpədən-dınağa qədər silahlanmış NATO hərbçilərimi gətirəcək? Bayden Administrasiyası bununla kimi aldadır? Vaşinqtonun İrəvanla hərbi əməkdaşlığı regionda bir neçə dövlətə qarşı yönəlib. Rusiya və Azərbaycandan sonra Türkiyənin adı çəkilsə də, nədənsə, İranın adı bu siyahıya düşməyib. Nədənsə, ABŞ və İran kimi əbədi düşmənlər Ermənistan məsələsində ortaq mövqedən çıxış edirlər. ABŞ bunun əvəzinə Ermənistanı işğalçı siyasətindən daşındırsa, sülh müqaviləsini imzalamağa sövq etsə, normal qonşuluq münasibətləri yaratmağı məsləhət görsə daha yaxşı olar, nəinki silah ticarəti".
Vidadi ORDAHALLI
