Xəyal Bəşirov: "Qərbi Azərbaycan və Zəngəzur bir reallıqdır və siyasi gündəlikdə öz yerlərini tutublar, onların inkar edilməsi absurddur"
Avropa Parlamentinin bəzi ermənipərəst deputatları Azərbaycanla Ermənistan arasında sülh prosesinə, normallaşmaya mane olan bəyanatlarını dayandırmaq istəmir. Demək olar ki, hər gün belə ürəkbulandıran, reallıqdan uzaq bəyanatlarla rastlaşırıq.
Avropa Parlamentinin üzvü Natali Luazo da qətiyyən reallıqla uzlaşmayan açıqlama verib.
Avroparlamentin deputatı erməni mətbuatına deyib ki, Qərbi Azərbaycan və ya "Zəngəzur dəhlizi"məsələsinə Ermənistanla Azərbaycan arasında münasibətlərin normallaşmasına dair danışıqlarda yer olmamalıdır. Luazo özünü tarixi gerçəklikdən xəbərsiz apararaq Qərbi Azərbaycan və "dəhliz" məsələsini "rəvayət" adlandırıb. Qərbi Azərbaycan faktına "qondarma" adı qoymağa çalışan Avroparlamentin deputatı unudur ki, Qərbi Azərbaycan bir reallıqdır, böyük və qədim bir xalqın tarixi ərazisidir, zorla deportasiya olunan Azərbaycan türklərinin doğma yurdudur.
Luazo onu da deyib ki, Ermənistan və Azərbaycan arasında sabit sülh hər iki ölkənin ümumi məqsədi olmalıdır. Guya indiyə qədər Ermənistan "xoşməramlılığını və güzəştə getməyə hazır olduğunu" nümayiş etdirib. Bu, deysən, Azərbaycanla Ermənistanın yerini səhv salıb. O xoşməramlı təşəbbüslər, sülhə nail olmaq kimi addımları Ermənistan deyil, Azərbaycan atıb, xanım deputat.
Bundan başqa, deputat Bakıda həbsdə olan hərbi canilərdən də danışıb, onları "hərbi əsir" adlandırıb. Onun necə deməsindən və düşünməsindən asılı olmayaraq, Bakıda həbsdə olanlar müharibə caniləridir və əli Azərbaycan xalqının qanına batnış cinayətkarlardır, onların "hərbi əsir" kimi qələmə verilməsi absurddur.
"...ATƏT-in Minsk qrupu ifadəsinin siyasi leksikondan çıxarılmasına və onun tarixin arxivinə göndərilməsinə təşəbbüs göstərsəydi daha yaxşı olardı"
Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, Ermənistan kimi Qərbdə olan bir sıra dövlətlər də, siyasilər də real, həqiqi tarixdən qorxurlar. "Onlar tarixin əvvəlki səhifələrinə boylanmaqdan çox narahat olurlar. Çünki orda daha çox saxtakarlıq, qeyri-real məsələlər var. Bəzi Qərb dövlətlərinin hazırkı səviyyəyə gəlib çatmasının arxasında onların böyük cinayətlərlə, qanlı səhifələrlə dolu tarixçələri durur. Ona görə də, bu həmin o şəxslərin həqiqi, real reaksiyasıdır. Çünki onlar tarixi həqiqətləri qəbul etməkdən qorxurlar. Yüz il əvvəlki xəritəyə baxsaq görərik ki, Cənubi Qafqaz tamam fərqli formada olub. Onlar Sovet dövrünə qədər indi beynəlxalq səviyyədə Ermənistan ərazisi kimi tanınan torpaqlara baxmaqdan narahatdırlar, bunu qəbul etməkdən mümkün qədər boyun qaçırmağa çalışırlar. Zəngəzur tarixi Azərbaycan ərazisidir. Zəngəzur bir toponim kimi tarixi mənbələrdə əks olunub. Biz bu adı indi işlətmirik ki, tarixi əsərlərdə, mənbələrdə əks olunub. Eyni zamanda beynəlxalq səviyyədə, yəni dövlətlərarası sənədlərdə, müqaviələrdə belə, Zəngəzur ifadəsi öz əksini tapıb. Qərbi Azərbaycan ifadəsi onları bu qədər narahat edirsə, niyə Ermənistanın ana qanunu olan və Avropanın da təbliğ etdiyi konstitutsiyasında nəinki Azərbaycana qarşı, hətta bütün qonşu dövlətlərə qarşı ərazi iddiaları var? Ermənistanın rəsmi gerbində dörd çarlığın işarəsi, simvolu var. Ermənistanın iddiasına görə, o çarlıqların bir hissəsi Türkiyədə, bir hissəsi Azərbaycanda, bir hissəsi Şimalda-Gürcüstanda, bir hissəsi isə Cənubda-İranda olub. Həm bu saxta məqamlarla, həm "Arsax" ifadəsi ilə bağlı həm Natali Luazo, həm də digər Avropa rəsmiləri, Qərbdən olan bəzi təxribatçı şəxslər bugünə qədər Ermənistana irad bildiriblərmi? Ermənistana sual veriblərmi ki, Azərbaycanın beynəlxalq səviyyədə tanınmış, eyni zamanda da bütün tarixi faktların təsdiqlədiyi kimi Azərbaycanın tarixi ərazisi olan həmin ərazilərə nə üçün iddia edir, Qarabağı "Arsax" adlandırır? Bu iradı bildirmək əvəzinə, qondarma "Arsaxı" dırnaqsız yazırlar, amma Qərbi Azərbaycan və Zəngəzur ifadəsini əsassız olaraq dırnaq arasına alırlar, bu ifadələri siyasi leksikondan çıxarmağa çalışırlar. Amma təbii ki, Qərbi Azərbaycan və Zəngəzur ifadəsini siyasi leksikondan çıxarmaq mümkünsüzdür".
X.Bəşirovun sözlərinə görə, Azərbaycan İkinci Qarabağ müharibəsindən sonra bölgədə bir sıra yeni geosiyasi reallıqlar formalaşdırıb, o reallıqlardan biri də Cənubi Qafqazla bağlı siyasi leksikona daxil olmuş ifadələrdir: "Qərbi Azərbaycan, Zəngəzur dəhlizi və bir sıra ifadələr var ki, onların siyasi leksikona daxil olması təbii bir prosesdir. Bütün dırnaqarası, saxta toponimlər siyasi leksikondan çıxarılıb. Biz bunu danışıqlar prosesində də görürük. Həmin o "Arsax" da, Ermənistanın saxtakarcasına formalaşdırdığı digər "toponimlərin" də yeri bəllidir. O "toponimlər" artıq tarixin arxivinə gömülüblər. Bu gün o avropalı deputatlar ATƏT-in Minsk qrupu adlı artıq iflasa uğramış, faktiki mövcud olmayan, keçmiş münaqişənin həlli ilə bağlı öhdəliyi öz üzərinə götürməsinə baxmayaraq heç bir addım atmayan, əksinə, keçmiş Qarabağ münaqişəsinin mümkün qədər uzadılması üçün əlindən gələni edən həmin o mürtəce, bədnam institutun siyasi leksikondan çıxarılmasına təşəbbüs göstərməlidirlər.
Avroparlamentin deputatı Qərbi Azərbaycan, "Zəngəzur dəhlizi" kimi siyasi leksikonda özünə xüsusi yer tutan məsələləri hədəfə almaqdansa, ATƏT-in Minsk qrupu ifadəsinin siyasi leksikondan çıxarılmasına və onun tarixin arixivinə göndərilməsinə təşəbbüs göstərsəydi daha yaxşı olardı. Çünki Qərbi Azərbaycan və Zəngəzur bir reallıqdır və siyasi gündəlikdə öz yerlərini tutublar, onların inkar edilməsi absurddur.
Bu deputat məşğul olmalı olduğu işləri bir kənara qoyub real tarixi toponimləri siyasi leksikondan çıxarmağa cəhd göstərir. Sanki bu yolla Azərbaycanı öz haqq mübarizəsindən, haqlı tələblərindən, Cənubi Qafqazda formalaşdırdığı yeni reallıqlardan imtina etdirməyə cəhd göstərirlər. Amma başa düşmürlər ki, bu mümkünsüzdür. Bu artıq yeni tarixi reallıqdır və bu reallıqla bütün dünya barışmalıdır".
X.Bəşirov əlavə etdi ki, Luazo kimiləri Azərbaycanın Cənubi Qafqazda formalaşdırdığı yeni reallıqları qəbul etmək istəmədikləri üçün bu cür çirkin kampaniyalar aparırlar və bizim tarixi ərazilərimizlə bağlı reallqıdan uzaq iddialar səsləndirirlər. Qərbi Azərbaycanın və Zəngəzurun bir reallıq olduğunu deyən ekspertə görə, heç bir qüvvə tarixi gerçəkliyi dəyişə bilməz, bu məsələdə də ədalətin zəfər çalması qaçılmazdır.
İradə SARIYEVA
