Mətləb Salahov: "İnsan faciəsi üzərində "xal qazanmaq", sosial şəbəkələrdə təxribatla məşğul olmaq insanlıq adına qara ləkədir"
Bakıdan Qroznıya uçan sərnişin təyyarəsinin qəzaya uğraması nəticəsində böyük faciə baş verib, insan tələfatı olub, ciddi xəsarət alanlar var. Əlbəttə, insan taleyi ilə bağlı olan bu ağır faciə bizim hamımızı dərindən sarsıtdı.
Təyyarə qəzasının səbəbləri bu gün ciddi müzakirə olunur, müxtəlif versiyalar var və hazırda dövlət qurumları araşdırma aparır, Baş Prokurorluqda cinayət işi açılıb və sair. Nəticə barədə də, təbii ki, ictimaiyyətə məlumat veriləcək. Bu öz yerində. Amma təyyarə qəzası baş verəndən sonra sosial şəbəkələrdə müxtəlif uyğunsuz fikirlər səsləndirilir. Bununla bağlı sosial şəbəkələrdə "sərhədlər açıq olsa idi bu qəza olmazdı, bu qədər adam ölməzdi" kimi səhv təbliğat aparılır. Təəssüf ki, bizim bəzi sosial şəbəkə istifadəçiləri bu ağır gündə belə bir-birinə uyğun gəlməyən, əlaqəsi olmayan məsələləri əlaqələndirməyə cəhd edirlər. Belə deyək, az qala qəzanın səbəbini quru sərhədlərin bağlı olmasının üzərinə atmaq istəyirlər. Guya quru yolu açıq olsaydı, quru sərhədlərimiz bağlı olmasaydı bu qəza da baş verməzdi. Qəzanın baş verməsi birinci Allahın işidir və bu daha çox insan taleyi ilə bağlı məsələdir. Amma quru sərhədlərin bağlı olmasını təyyarə qəzasının baş verməsinə səbəb kimi göstərməyə cəhdlər etmək, bu cür kampaniya aparmaq, əslində, məntiqsiz bir yanaşmadır.
"Məgər quru sərhədlər açıq olanda hava nəqliyyatında texniki nasazlıq və qəza risqi heçə enir?"
Jurnalist-ekspert Mətləb Salahov "Bakı Xəbər"ə açıqlamasında "Öncə onu qeyd edim ki, AZAL-ın Bakı-Qroznı reysini həyata keçirən təyyarəsinin qəzaya uğraması nəticəsində vəfat edən insanlar üçün hamımız qəlbən üzüldük. Bu, bir insani həmrəylikdir. Milliyətindən, dinindən asılı olmayaraq günahsız insanların bu cür acı qədərlə üzləşməsi, həyatlarını itirməsi ürəkağrıdan hadisədir. Lakin təəsüflər olsun ki, təyyarə qəzasında həyatını itirən insanların bu faciəsi üzərində siyasi şou qurmaq, bundan öz çirkin məqsədləri üçün yararlanmaq istəyənlərin həyasızlıqlarını da müşahidə edirik. Utanmadan yalanlar uydurub baş vermiş hadisə ilə heç bir əlaqəsi olmayan ittihamlar irəli sürməyə, faciənin başvermə səbəbləri məlum olmadığı halda bunu Azərbaycanın nüfuzuna xələl gətirmək üçün istifadə etməyə cəhd göstərən qüvvələr, həm əsl simalarını, həm də aşağı səviyyəli insan olduqlarını büruzə verirlər.
Bu təxribatçı qüvvələr xüsusilə sosial şəbəkə seqmentində "yalan maşınını" işə salaraq insanları çaşdırmağa, ictimai narazılıq yaratmağa çalışırlar" - deyə bildirdi.
M.Salahovun sözlərinə görə, baş vermiş təyyarə qəzasını Azərbaycan dövlətinin əleyhinə çevirməyə çalışan bu tiplər indi də ölkənin quru sərhədlərinin bağlı olması ətrafında səs-küy salırlar. "Guya quru sərhədlərinin bağlı olması hava nəqliyyatında problemlər yaradırmış. Bu savadsız təxribat tipləri məntiqdən başqa nə desən uydurub, ictimai fikri dövlət əleyhinə qaldırmağa çalışırlar. Əlbəttə, aldıqları təlumat bunları istənilən həyasızlığa sürükləyir.
Əvvəla, COVİD19 pandemiyası ilə bağlı tədbirlər çərçivəsində, birbaşa əhalinin təhlükəsizliyi üçün nəzərdə tutulan bu addımın hava nəqliyyatının təhlükəsizliyi və ya texniki problemləri ilə heç bir əlaqəsi yoxdur. Axı normal düşünən istənilən insana məlumdur ki, belə təyyarə qəzaları hər il baş verir. Istər quru sərhədlər bağlı olsun, istərsə açıq. Son 3-4 ilə qədər isə bütün dövlətlər arasında sərhədlər açıq olub. İstər sərnişindaşıma olsun, istər yükdaşıma. Məgər quru sərhədlər açıq olanda hava nəqliyyatında qəza risqi heçə enir? Yaxud quru sərhədlər bağlı olduğu zaman hava nəqliyyatında sərnişin sıxlığı, texniki problemlərmi baş qaldırır?
Məgər ölkənin quru sərhədləri açıq olsaydı, Bakı-Qroznı reysini həyata keçirən təyyarənin qəzaya uğraması baş verməyəcəkdi? Bunların dərdi aldıqları təlimata uyğun Azərbaycan cəmiyyətində ajiotaj yaratmaq, dövlətin qərarlarını ictimai rəydə gözdən salmaq, geniş təxribat hərəkətləri üçün meydan yaratmaqdır.
Diqqət edin, anormal təxribat sürüsünün sosial şəbəkə seqmentini seçməsi də təsadüf deyil. Daha çox çığır-bağır salmaq, daha çox məlumatsız insan qrupu toplayıb yalanlarını daha böyük çevrələrdə yaymaq - bunların sosial şəbəkələrə doluşmasının məqsədi budur. Lakin görünən bir həqiqət var ki, quru sərhədlərin bağlı olmasının təyyarə qəzaları ilə "bağlılığını kəşf edən" bu diletant təxribatçılar xidmət etdikləri xarici qüvvələrə nə qədər bacarıqsız və lazımsız olduqlarını da göstərmiş oldular" - deyə M.Salahov qeyd etdi.
İradə SARIYEVA
