"2025-ci ildə Azərbaycan növbəti böyük idman yarışına ev sahibliyi edəcək, bu da MDB Oyunlarıdır. Üçüncü MDB Oyunları Azərbaycanda keçiriləcək. Bunun üçün 14 şəhər seçilibdir və əsas oyunlar Gəncə şəhərində keçiriləcək. Gəncə şəhəri MDB Oyunlarının mərkəzi olacaq". Bu barədə Azərbaycan prezidenti, Milli Olimpiya Komitəsinin prezidenti İlham Əliyev 2024-cü ilin idman yekunlarına həsr olunan mərasimdə bildirib.
Prezident deyib ki, hazırda Gəncə şəhərində yeni stadion inşa edilir və oyunlara qədər istismara verilməlidir: "Eyni zamanda, bir neçə ay bundan əvvəl Gəncədə ölkəmizin böyük Olimpiya İdman Kompleksi açılmışdır. Hətta Bakı şəhərində bu boyda və bu qədər funksional standartlara cavab verən Olimpiya Kompleksi olmamışdır. Üçüncü MDB Oyunlarında 7 min idmançının iştirakı gözlənilir. Əgər biz 2015-ci ilin Avropa Oyunları ilə müqayisə etsək, o vaxt təqribən 5000-5500 iştirakçı var idi". Dövlət başçısı bildirib ki, Gəncə şəhərində 7000 iştirakçını, onların komandalarını, heyətlərini qəbul etmək üçün şərait yaradılmalıdır və müvafiq göstərişlər verilib. Onun sözlərinə görə, gələn ildən başlayaraq Gəncə şəhərində çox böyük təmir-bərpa işləri aparılacaq. Xatırladaq ki, Müstəqil Dövlətlər Birliyi ölkələrinin idman yarışları ilk dəfə 2021-ci ildə Rusiyanın Kazan şəhərində keçirilib. İkinci oyunlar 2023-cü ildə Belarusun paytaxtı Minskdə olub. Minskdə keçirilən oyunlara MDB ölkələrindən başqa İran, Misir, Vyetnam, Monqolustan, Kuba idmançıarı da qatılıb. "Müstəqil Dövlətlər Birliyinin iştirakçısı olan dövlətlərin bədən tərbiyəsi və idman sahəsində əməkdaşlığı haqqında Saziş" iştirakçılarının Bədən Tərbiyəsi və İdman Şurasının 2021-ci il 20 dekabr tarixli növbədənkənar iclasında III MDB Oyunlarının 2025-ci ildə Azərbaycanda keçirilməsi barədə qərar qəbul edilib. Ölkəmizn beynəlxalq tədbirlərin keçirilməsində təcrübəsinin nəzərə alınması fonunda budəfəki yarışların da yüksək səviyyədə baş tutacağı şübhə doğurmur. Ekspertlər qeyd edir ki, ölkəmiz istər beynəlxalq tədbirlərin təşkili, istərsə də belə tədbirlərdə iştirak baxımından olduqca mühüm məsələlərlə yadda qalır. O da xüsusi vurğulanır ki, ölkə həyatının bütün sahələrində olduğu kimi, Azərbaycanda idmanın inkişafı da ardıcıl, bir-birini dəstəkləyən qərarlar və tədbirlər əsasında həyata keçirilir. Ölkə ərazisində gənc nəslin fiziki inkişafı üçün hər cür şərait yaradılıb və bu proses davam edir. İdmançılarımız beynəlxalq tədbirlərdə yüksək nailiyyətlər qazanır, Azərbaycanın adını dünya birinciləri sırasına yazırlar. III MDB Oyunları da çox əhəmiyyətli beynəlxalq tədbirdir, Azərbaycan bu oyunlara ev sahibliyi etməklə, öz gücünü, idman imkanlarını bir daha bütün dünyaya göstərəcək. Eyni zamanda Azərbaycanın beynəlxalq arenada mövqeyini möhkəmləndirən, davamlı uğurlarını şərtləndirən amillərdən biri məhz ölkəmizin dünyamiqyaslı mötəbər tədbirlərə uğurla ev sahibliyi etməsidir. Çoxsaylı beynəlxalq forumların, "Eurovision-2012" beynəlxalq mahnı müsabiqəsinin, "Baku-2015" ilk Avropa Oyunlarının, IV İslam Həmrəyliyi Oyunlarının və digər nüfuzlu idman, mədəniyyət tədbirlərinin ölkəmizdə uğurla keçirilməsi Azərbaycanın beynəlxalq dialoq məkanı kimi çıxış etməsini göstərir. Beynəlxalq idman ictimaiyyətinin Azərbaycandakı idman mühitini yüksək qiymətləndirməsi isə, əsas etibarilə, müxtəlif mötəbər yarışların respublikamızda keçirilməsi ilə bağlı çıxardıqları qərarlarda ifadə olunur. Təsadüfi deyil ki, son illərdə ölkəmiz bir neçə beynəlxalq turnirə uğurla ev sahibliyi edib. Bunlardan biri də Formula-1 Azərbaycan Qran-Prisidir. Artıq neçə ildir ki, Azərbaycan bu yarışa ev sahibliyi edir.
Reallıq budur ki, Azərbaycanda hər bir sahədə olduğu kimi, idman sahəsində də böyük inkişaf müşahidə olunur. Qeyd edildiyi kimi bu gün Azərbaycan dünya miqyasında idman tədbirlərinin yüksək səviyyədə keçirildiyi idman ölkəsi kimi tanınır və şanlı bayrağımız beynəlxalq arenalarda qürurla dalğalanır. Hər bir ölkənin inkişafında idman faktoru çox böyük rol oynayır. Azərbaycanda müasir dövlətçiliyin inkişafında bütün sahələrə ciddi diqqət yetirilir. İdman sahəsi isə burada xüsusi yer tutur. Mötəbər tədbirlərin Azərbaycanda keçirilməsi həm də ölkəmizin böyükmiqyaslı idman yarışlarına ev sahibliyi etmək imkanlarına malik olması reallığını nümayiş etdirir. Bir-birini əvəzləyən idman yarışları Azərbaycanın daha böyükmiqyaslı yarışlara ev sahibliyi etmək imkanlarını artırıb. Ölkəmizdə idmana və idmançılara qayğı göstərilməsi dövlət siyasətinin prioritet hədəflərindən biridir. Bu gün idmançılarımızı yüksək nailiyyətlərə ruhlandıran ən vacib amillərdən biri də onların artıq qalib ölkənin təmsilçiləri olmalarıdır. Azərbaycan Ordusu 44 günlük Vətən müharibəsini möhtəşəm Zəfərlə başa vurduqdan sonra idmançılarımız da artıq bütün beynəlxalq yarışlarda məhz qalib ölkənin təmsilçiləri, qalib xalqın nümayəndələri kimi çıxış edirlər. Azərbaycan həmçinin beynəlxalq idman tədbirlərinə ərazi bütövlüyünü və suvernliyini bərpa etmiş tərəf kimi ev sahibliyi edir. Əlbəttə, bu yarışlar Azərbaycana həm daha çox turist axınının təmin olunmasına əlavə imkanlar yaradır, eyni zamanda, beynəlxalq təbliğat üçün əhəmiyyətli zəmin rolunu oynayır. Digər çoxsaylı üstünlüklərdə Azərbaycana əlavə dividendlər qazandırır.
Ramil QULİYEV
