Gürcüstanın hazırkı prezidenti Salome Zurabişvili videomüraciət edərək, ölkə hakimiyyətinə hədələyici bəyanat ünvanlayıb, iqtidarı çevrilişlə hədələyib. Belə ki, Salome Zurabişvili hakim "Gürcü Arzusu" partiyasına videomüraciət edərək, müxalifətlə yeni parlament seçkilərinin təyin edilməsi ilə razılaşmasa, iqtidardakı partiyanı devirəcəyini vəd edib:
"Əgər kompromis variantı, dialoq əldə olunmasa, başqa variant var - biz bu rejimi devirməklə seçkilərə çıxacağıq, başqa yol yoxdur".
Hələlik hazırkı prezident müxalifətin sadəcə başqa seçimi olmadığından şikayətlənib. Onun fikrincə, artan böhranı cilovlamaq üçün bütün hüquqi vasitələr artıq işə salınıb, lakin hakimiyyətin əleyhdarlarının başlatdığı çoxsaylı məhkəmə prosesləri belə buna kömək etməyib. Obrazlı desək, Gürcüstanda vəziyyət indi sönmüş vulkana bənzəyir, lakin o, hələ də tüstülənir və kraterin daxilində yüksək temperatur var. Salome Zurabişvili etirazın "atəşini" alovlandırmaq üçün əlindən gələni edir. Daha əvvəl də o, Tiflisin mərkəzində minlərlə insanın iştirak etdiyi mitinqlərdə çıxış edərək, "Gürcü Arzusu" partiyasına ünvanlanmış ultimatumlarla çıxış edib. Hakimiyyət orqanları Avropaya inteqrasiyanı 2028-ci ilə qədər dondurduqdan sonra Qərbin Gürcüstana hücumları da artır. Ölkə getdikcə daha çox Qərb investisiyalarını itirir. Belə ki, Almaniya 237 milyon avro dəyərində olan layihələrini dondurub və yerli sahibkarlar xidmət sektorunda ciddi tənəzzülün yaşanmasından şikayətlənirlər. Lakin siyasətçiləri hələ də iqtisadi çətinliklər yox, hakimiyyət uğrunda mübarizə maraqlandırır. Gürcüstanın baş naziri İrakli Kobaxidze bildirib ki, əgər Salome Zurabişvili dekabrın 29-da Mixail Kavelaşvilinin andiçmə mərasimi fonunda vəzifəsini tərk etməkdən imtina edərsə, o, həbsxanaya göndəriləcək: "Zurabişvili vəzifəsini tərk etməli olacaq, görəcəyik ki, o, dəmir barmaqlıqlar arxasında həyatını davam etdirəcək, ya yox. Düşünürəm ki, onun cinayət məcəlləsinin normalarını pozmamaq üçün kifayət qədər müdrikliyi olacaq... Bir daha təkrar edirəm, 72 yaşlı qadını həbsxanaya göndərmək istəyən heç kim ola bilməz". Buna cavab olaraq Zurabişvili bir daha heç yerə getmədiyini bəyan edib və özünü ölkədə ali hakimiyyətin yeganə qanuni nümayəndəsi hesab etməkdə davam edib: "Məni müdafiə etmək lazımdır deyən insanlara çox minnətdaram... Amma dekabrın 29-dan sonra kim olacağımı bilirəm - prezident. Mən xalqımın qulu olacağam". O, həmçinin bildirib ki, Gürcüstanda siyasi böhranı həll etməyin iki yolu var: yeni parlament seçkilərinin keçirilməsi ilə bağlı "Gürcü Arzusu" ilə kompromis və ya hakim rejimin məhvi. Bununla bağlı o, müxalifət şurası yaradacağını bildirib: "Onun üzvləri yeni səsvermənin hazırlanması üzərində işə başlayacaqlar". Lakin istənilən halda Zurabişvilinin fikrincə, seçkilər "Gürcü arzusu"nun məğlubiyyəti ilə başa çatmalıdır: "Onlar məni radikallıqda ittiham edirlər, bilmirəm, bunu harada görüblər. Həmvətənlərimi qorxudan hakim partiyadır. Xüsusilə, "Gürcü Arzusu" əvvəlcə müxalifətin hakimiyyətə gələcəyi təqdirdə Rusiya ilə müharibə riskindən, indi isə vətəndaş müharibəsindən danışır. Nə biri, nə də digəri olmayacaq. Bu ölkə yeni seçkilərə sülh yolu ilə yanaşacaq, sonra uğurlu və güclü olacaq".
Bu arada "Gürcü Arzusu" dövlət başçısının psixi sağlamlığından şübhələnməyə başlayıb. Parlamentdəki hakim partiya fraksiyasının sədri Mamuka Mdinaradze deyir: "Çətin emosional fona görə o, qeyri-adekvat bəyanatlar verir". Hakim fraksiyanın digər üzvü Quram Maçaraşvili əmindir ki, Zurabişvili həmişə qeyri-adekvat olub, lakin onun siyasətdəki günləri sayılı olduğundan narahat olmaq üçün heç nə yoxdur. Qərbdə isə Zurabişviliyə dəstək artır. Latviya rəhbəri Edqars Rinkeviç gürcü həmkarını dəstəkləyərək bildirir: "Prezidentə qarşı təhdidlər qəbuledilməzdir". O, Zurabişvili ilə telefon danışığı aparıb və bu zaman Gürcüstanın "Avropa yoluna" qayıtmalı olduğunu bildirib. Çexiya prezidenti Petr Pavel də respublika rəhbərini dəstəklədiyini bildirib. Gürcü politoloq Petre Mamradze məsələ ilə bağlı bildirib: "Zurabişvilinin hüquq-mühafizə orqanları ilə açıq toqquşmaya girəcəyi ehtimalı azdır. O, mükəmməl başa düşür ki, bu döyüşdə qalib gəlməyə gücü çatmır və buna görə də dəmir barmaqlıqlar arxasına düşmək riski var. Bu, 1990-cı illərin əvvəli deyil ki, müdafiə naziri, açıq-saçıq quldur Tengiz Kitovani silahlıların dəstəyi ilə departament binasını zəbt edib istefa verməkdən imtina edə bilərdi". Ekspertin sözlərinə görə, çox güman ki, inauqurasiya ərəfəsində o, Fransaya və ya Aİ-nin başqa ölkəsinə gedəcək, sonra isə müəyyən səbəblərdən geri qayıda bilməyəcək. Bu arada, Zurabişvili "Gürcü Arzusu"nun cinayət təqibi ilə hədələdiyi tək prezident deyil. Məsələn, müxalifət Lelo partiyasının təsisçisi Arçil Gorduladze ölkənin silahlı qüvvələrini tabe olmamağa çağırıb. Onun sözlərinə görə, ordu Kavelaşvilinin andiçmə mərasimində iştirak etməməlidir. Paralel olaraq Almaniyanın Gürcüstandakı səfiri Peter Fişer ölkəsinin respublikada ümumi dəyəri 237 milyon avro olan layihələri dondurduğunu bildirib. Belə ki, Batumidə yaşıl hidrogen, enerji infrastrukturu və su infrastrukturunun maliyyələşdirilməsi dayandırılıb: "Vətəndaş cəmiyyətinə və qanunun aliliyinə dəstək isə davam edir".
Samirə SƏFƏROVA
