Elşad Musayev: "Suriyanın yenidən qurulmasına töhfə verməsi ölkəmiz üçün mühüm əhəmiyyət kəsb edir"
Türkiyə Respublikasının Prezidenti Rəcəb Tayyib Ərdoğanla Prezident İlham Əliyev telefon danışığı zamanı Suriyanın sosial və iqtisadi inkişafı ilə bağlı birgə səylərin göstərilməsini razılaşdırıblar. İki ölkə başçısı bununla bağlı bir sıra məsələləri müzakirə ediblər.
Azərbaycanın Türkiyədəki səfiri Rəşad Məmmədov isə eyni gündə Türkiyə Xarici İşlər Nazirliyinin Suriya üzrə İdarə rəisi Mustafa Yurdakulu ilə görüşüb. Görüşdə Suriyaya humanitar yardımla bağlı Azərbaycan və Türkiyə arasında birgə fəaliyyət imkanları müzakirə edilib. Beləliklə məlum olur ki, Azərbaycanın Suriyanın yenidən qurulmasında iştirakı, rolu getdikcə artır. Bütün bunlar Azərbaycan-Suriya münasibətlərinin inkişafı baxımından nə deməkdir? Nəzərə almaq lazımdır ki, Bəşər Əsəd dövründə münasibətlər yaxın deyildi. Əvvəlki rejim İslam Əməkdaşlıq Təşkilatında Ermənistanın maraqlarından çıxış edirdi.
"Azərbaycanın prosesə qoşulması, bölgədə yeni aktor kimi çıxış etməyə başlaması çox yaxşı haldır"
Sözügedən məsələ ilə bağlı fikirlərini "Bakı-Xəbər"lə bölüşən Böyük Azərbaycan Partiyasının sədri, millət vəkili Elşad Musayev hesab edir ki, iki dövlət başçısının Suriyanın sosial-iqtisadi inkişafı ilə bağlı birgə səylər göstərməsi müsbət haldır: "Belə birgə səylər tamamilə doğrudur. Çünki Azərbaycanla Türkiyə arasında ilk növbədə həm strateji müttəfiqlik əlaqələri var, həm də qardaşlıq. Müəyyən geopolitik, bölgə ilə bağlı məsələlər, digər beynəlxalq əhəmiyyətli məsələlərdə birgə hərəkət edirik. Hesab edirəm bu, çox müsbət haldır. İkinci tərəfdən nəzərə almaq lazımdır ki, Suriya məsələsi həm də dünyanın diqqət mərkəzində olan çox ciddi proseslərdən biridir. Suriyada ayrı-ayrı dövlətlərin maraqları var. Türkiyə burada ilk növbədə öz təhlükəsizliyini qorumalı idi. Çünki Türkiyə-Suriya sərhədinin uzunluğu 911 kilometrdir. Suriyanın şimalında mövcud olan PKK-PYD terrorçuları Türkiyə üçün təhdid yaradırdılar. Bu terror qruplarının arxasında müəyyən dövlətlər dayanırdı. Eyni zamanda Əsəd rejimi bu amildən Türkiyəyə qarşı istifadə edirdi. Bu baxımdan Türkiyə doğru olaraq öz təhlükəsizliyini və siyasi-iqtisadi maraqlarını qorumalıdır. Çünki Suriyanın bölünməsi Türkiyənin maraqlarına uyğun deyil. Türkiyədə 3 milyondan çox Suriyadan olan qaçqın var. Onu da nəzərə almaq lazımdır ki, Suriya Azərbaycan üçün yad ölkə deyil. İki ölkə arasında tarixi bağlar var. Ona görə də Azərbaycanın Suriyanın yenidən qurulmasına töhfə verməsi ölkəmiz üçün mühüm əhəmiyyət kəsb edir. Bu, iki ölkə münasibətlərinin inkişafında yeni səhifə açacaq. Bütövlükdə, Suriyadakı proseslərdə Türkiyə qalib gəldi. Hakimiyyətə gələn qüvvələr daha çox Türkiyəyə yaxındır. Orada İran da siyasi və geopolitik baxımından çox ciddi məğlubiyyətə uğradı. O cümlədən, Rusiya və ABŞ da. Bundan sonra açıq-aydın görünür ki, Türkiyənin patronajlığı altında Suriya yenidən qurulacaq. Azərbaycanın prosesə qoşulması, bölgədə yeni aktor kimi çıxış etməyə başlaması çox yaxşı haldır. Çünki Azərbaycan həm də D-8-ə üzv olub. Ona görə də bunu müsbət dəyərləndirirəm. Azərbaycan da bir dövlət olaraq öz gücünü, potensialını göstərir. Fikrimcə, Türkiyə ilə birlikdə Azərbaycan da Suriyaya humanitar yardım göstərəcək".
Vidadi ORDAHALLI
