Ramil Hüseynov: "Ermənistan hakimiyyəti ölkədə Rusiyanı hörmətdən salır"
Bütün ölkələrin mesajı eynidir - Zəngəzurda təmsil olunmaq. Bunu Ermənistan xarici işlər nazirinin müavini Paruyr Ovanesyan "Zəngəzurda (Sünik) konsulluq açmaq istəyən Rusiyanın mesajı nədir" sualına cavab verərkən deyib.
"Ölkələr sosial, iqtisadi və siyasi maraqları və s. nəzərə alınaraq konsulluqlar açır. İranla bağlı vəziyyət eynidir, Fransa da bunu bəyan edib. Düşünürəm ki, başqa ölkələrdən də diqqət artacaq", - Ovanesyan bildirib.
O əlavə edib ki, konsulluğun açılmasında həm də siyasi komponent var: "Amma burada söhbət mərkəzləşdirilməmiş əməkdaşlıqdan, iqtisadi maraqlardan, mümkün müvafiq enerji və nəqliyyat layihələrindən gedir. Siyasi komponent bu regiona olan maraqdan və bütün bundan irəli gələn nəticələrdən ibarətdir".
Bu da Rusiya ilə münasibətdə Ermənistanın ikiüzlü siyasıtinə daha bir sübut.
"Paruyr Ovanesyan elə danışır ki, sanki iki ölkə arasında bir belə həngamə yaşanmır"
Sözügedən məsələ ilə bağlı "Bakı-Xəbər"ə açıqlama verən "Yeni Xətt" Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, riyakarlıq ermənilərin xislətinə xas xüsusiyyətdir: "Bu nə birincidir, nə də sonuncu. Guya siyasi məqsədlərə görə Rusiya bu addımı atır. Siyasi çalar deyərkən Ermənistan rəsmisi bunu başqa istiqamətə yozur. Mahiyyəti ondan ibarətdir ki, guya Rusiya Azərbaycanın Zəngəzuru güc yolu ilə ələ keçirməsini önləmək üçün orada konsulluq açır. Əslində bu, heç də belə deyil. Yəni İran, ABŞ, Fransa bu məqsədlə Zəngəzurda konsulluq açsalar da, Rusiyanın məqsədi başqadır. Rusiyanı qayğılandırar odur ki, Qərb yavaş-yavaş bütün vasitələrlə Ermənistanı Moskvanın təsiri altından çıxarmağa girişib. Artıq bu kiməsə sirr deyil və getdikcə bunun elementləri Ermənistanda özünü daha qabarıq göstərir. Fikrimcə, Rusiya məhz Qərb ölkələrinə görə orada konsulluq açmağa qərar verib. Ancaq Ermənistan rəsmisi bunu elə təqdim etməyə çalışır ki, guya ölkənin cənubu xüsusi siyasi-iqtisadi əhəmiyyətə malik olduğu üçün bir sıra ölkələr orada ard-arda konsulluqlar açırlar. Halbuki, bu belə deyil. Üstəlik, Zəngəzur dəhlizi açılmadan oranın iqtisadi cazibədarlığı olmayacaq. Başqa bir tərəfdən, Ermənistan hakimiyyəti ölkədə Rusiyanı hörmətdən salır. Ard-arda antirus addımlar atır və bu səbəbdən iki ölkə münasibətləri kifayət qədər pisləşib. Mütəmadi olaraq erməni və rus rəsmiləri bir-birinin ünvanına tənqidlər səsləndirir. Üstəlik, getdikcə bu adi hal alıb. Paruyr Ovanesyan isə elə danışır ki, sanki iki ölkə arasında bir belə həngamə yaşanmır".
Vidadi ORDAHALLI
