Elşən Mustafayev: "Ermənistanın belə uydurmasının heç bir əsası yoxdur"
Ermənistanın xarici işlər naziri Ararat Mirzoyan İrəvanda Almaniyanın xarici işlər naziri Annalena Baerbok ilə görüşündən sonra keçirilən mətbuat konfransında deyib ki, Azərbaycanın bu gün də Ermənistana qarşı ərazi iddiaları var.
Nazir xatırladıb ki, son üç il ərzində güya Azərbaycan bir neçə dəfə Ermənistan Respublikasının suveren ərazisini işğal edib:
"Təəssüf ki, bu gün də qonşu dövlətlərin, xüsusən də Azərbaycanın Ermənistana qarşı hələ də ərazi iddialarının olması ilə bağlı ciddi narahatlıqlar var. Ermənistanın suverenliyi ilə bağlı da müəyyən qeyd-şərtlər var, xüsusən də söhbət regional infrastrukturdan gedir. Deməli, bu qorxular bu gün də mövcuddur".
Onun sözlərinə görə, Azərbaycanla sərhəd problemlərinin həlli istiqamətində işlər gedir, lakin hələ ki, dəqiq həlli yoxdur:
"Hazırda nizamlanma prosesi gedir, bəzən elə gəlir ki, həll yoluna yaxınlaşırıq, bəzən isə yeni maneələrin yarandığını görürük".
Erməni nazirin "Azərbaycanın ərazi iddiası" yalanına necə münasibət bildirmək olar?
Siyasi şərhçi Elşən Mustafayev "Bakı-Xəbər"ə açıqlamasında bildirdi ki, hər halda, Azərbaycanın yeni müharibəyə başlamaq niyyəti yoxdur: "Təbii ki, Ermənistan bizə hücum etsə, biz sakit oturmayacağıq. Amma mən inanmıram ki, bu, Ermənistanın marağında olsun. Hesab edirəm ki, bizə, sadəcə olaraq, danışıqlar yoluna qayıtmaq, sülh prosesini irəli aparmaq istəyindən yararlanmaq, sərhədlərin delimitasiyası, kommunikasiya xətləri haqqında danışmaq lazımdır. Biz buna diqqət yetiririk. Azərbaycan danışıqlara hazır olduğunu bildirir, eyni zamanda bütün cəbhələrdə diplomatik müharibə aparan Ermənistan kimi ikili oyun oynamır.
Bəli, Ermənistan sülhdən danışarkən öz diplomatik korpusunu müxtəlif təsisatlarda, o cümlədən BMT-də azərbaycanlıları ittiham etmək üçün istifadə edir. Fransanın Ermənistana dəstəyi sayəsində bu ölkə dəfələrlə Təhlükəsizlik Şurasına müraciət edib. Amma Ermənistan həm də yeni, tamamilə anti-Azərbaycan və qərəzli qətnamələr qəbul edən Avropa Şurasını, Avropa Parlamentini təşvişdə saxlayır. Bu, diaspor vasitəsilə Azərbaycanı sistemli olaraq nüfuzdan salmaq kampaniyasıdır. Bu, ermənilərin həll yollarını tapmaq üçün real səmimiyyətinin olmadığını göstərir. Paşinyan həmkarları ilə görüşəndə deyir ki, Azərbaycan Ermənistana hücum etmək istəyir. Amma bunlar iddiadır. Bunun heç bir sübutu yoxdur. Hesab edirəm ki, Ermənistanın müharibədən qaçmasının ən yaxşı yolu real danışıqlara başlamaqdır. İndi də bu yalanı Almaniya rəsmisinə deyirlər.
Ermənistan hökuməti dialoqdan qaçmaq üçün guya bizim ona qarşı ərazi iddiamızın olduğunu deyir. Biz dəfələrlə rəsmən bəyan etmişik ki, Ermənistanın suverenliyinə və ərazi bütövlüyünə qarşı heç bir iddiamız yoxdur və yeganə məqsədimiz azərbaycanlıların dinc şəkildə Ermənistanda dədə-baba yurdlarına qayıdışını təmin etməkdən ibarətdir. Müharibədən əvvəl Ermənistanda yüz minlərlə azərbaycanlı yaşayırdı, onlara qarşı genişmiqyaslı etnik təmizləmə aparılıb, onların mədəni və dini irsi tamamilə məhv edilib. Biz hesab edirik ki, Azərbaycan-Ermənistan münasibətlərini normallaşdıran və diplomatik əlaqələr quran zaman Ermənistandan zorla deportasiya edilmiş azərbaycanlıların ora qayıtmaq hüququ var.
2020-ci ildə 44 günlük müharibədən sonra Azərbaycan beynəlxalq hüququn tanınmış prinsipləri olan sülh sazişinin prinsiplərini işləyib hazırladı. Onlar ərazi bütövlüyünün, suverenliyinin, bir-birinin beynəlxalq sərhədlərinin qarşılıqlı tanınması, sərhədlərin delimitasiyası, güc tətbiq etmə və ya güc tətbiq etmə hədəsinin olmamasıdır. Bu baxımdan da, Ermənistanın belə uydurmasının heç bir əsası yoxdur".
Məhəmmədəli QƏRİBLİ
