Sahil Kərimli: "Bundan istifadə edərək, KTMT-dən çıxmaq məsələsini yenidən aktuallaşdıra, yaxud Qərb ölkələrinin bölgədə hərbi müstəvidə təmsilçiliyini gündəmə gətirə bilər"
Ermənistan Respublikası xarici işlər nazirinin müavini Paruyr Hovhannisyan 2024-cü il dövlət büdcəsi layihəsinin ilkin müzakirəsi zamanı NA-nın xarici əlaqələr və maliyyə-kredit və büdcə məsələləri daimi komissiyalarının birgə iclasında bildirib ki, yaxın vaxtlarda Aİ-nin Ermənistandakı missiyasının statusu və faydaları haqqında saziş imzalanacaq:
"Yeni sahə kimi siyasət və təhlükəsizlik sahəsini də qeyd etmək lazımdır. Bununla bağlı biz artıq Aİ-nin Ermənistandakı missiyasının statusunun müəyyənləşdirilməsində irəliləyiş qeydə almışıq. Müvafiq saziş yaxın vaxtlarda imzalanmalıdır".
Nazir müavini deyib ki, söhbət müşahidəçi statusundan, imtiyazlardan, tibbi xidmətdən, nəqliyyatdan istifadədən gedir: "Biz bunu bütün beynəlxalq strukturlara münasibətdə edirik".
Hazırda Ermənistanda Aİ müşahidəçilərinin sayının artırılması və bəzi mümkün yeni funksiyalar məsələsi müzakirə edilir. Ovannisyan ətraflı məlumat verməyib və qeyd edib ki, missiyanın genişləndirilməsi prioritet məsələdir.
Ermənilərin Avromissiya barədə ayrıca qanun hazırlaması Rusiyaya yeni təhdid əlaməti sayıla bilərmi?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistanın son bir ildə həyata keçirdiyi siyasət, Paşinyanın Avropaya meyllənməsi, xüsusilə də Avropa missiyası ilə bağlı ayrıca qanun layihəsi hazırlamaq istəyi Rusiyaya qarşı yeni təhdid əlaməti sayıla bilər: "Son illərdə Ermənistan açıq şəkildə Rusiyaya qarşı oyunlarda yer alır. Bu da Ermənistan üçün olduqca təhlükəli proseslərdən xəbər verir. Ermənistanın belə riyakarlığı bütün bölgəni risq altına salır. Ermənistan öz havadarlarına arxalanaraq separatizmi, terroru təşviq edir. Ermənistanın bizimlə sülh müqaviləsi imzalamasına birbaşa Qərb dairələri mane olur. Təəssüf ki, Qərb dairələri bu məkrli niyyətdən əl çəkmir. Ermənistan bilməlidir ki, onun gələcəyini təmin edən sənəd sülh müqaviləsinin imzalanmasından keçir. Rusiyaya qarşı belə addımlar da Ermənistanı uçuruma apara bilər.
İrəvan bu missiyanı üçtərəfli bəyanatın digər tərəfləri olan Azərbaycan və Rusiya ilə razılaşdırmadan yerləşdirməyə razılıq verməklə, sülh danışıqları prosesində Avropadan olan aktorlar arasında öz mövqeyini gücləndirməyi düşünürdü.
Əvvəla onu nəzərə çatdıraq ki, Avropa İttifaqı (Aİ) təxminən bir il əvvəl bölgəyə göndərdiyi mülki missiyasının məqsədini bu cür formalaşdırmışdı: "Məqsəd Ermənistanın sərhədyanı ərazilərində sabitliyə, regionda etimadın yaranmasına töhfə vermək və Avropa İttifaqı tərəfindən dəstəklənən Ermənistanla Azərbaycan arasında normallaşma səyləri üçün əlverişli mühiti təmin etməkdir".
Doğrudan da əsl niyyətləri dedikləri kimidirsə, onda xeyirxah missiyanın savab işini alqışlamaq lazımdır. Lakin rəsmi Bakının xidmətindən imtina etdiyi Avropanın çoxmillətli monitorinq qrupunun missiyasının əslində nədən ibarət olduğu bugünədək tam aydınlaşdırılmayıb. Bu məsələ təkcə Bakıda deyil, Ermənistanın özündə də tez-tez dartışılan mövzulardan biridir.
Avropa İttifaqının missiyasının ortaq mövqeyi Rusiyanın "Ermənistanı müdafiə etmədiyini" əsaslandırmaqdır. Eskalasiya baş verərsə, Ermənistan yenidən KTMT-nin öz öhdəliklərini yerinə yetirmədiyini bildirəcək və Aİ missiyasının, yəni Qərbin onların təhlükəsizliyində Rusiyadan daha çox rol oynadığı fikrini irəli sürəcək. Bundan istifadə edərək, KTMT-dən çıxmaq məsələsini yenidən aktuallaşdıra, yaxud Qərb ölkələrinin bölgədə hərbi müstəvidə təmsilçiliyini gündəmə gətirə bilər".
Məhəmmədəli QƏRİBLİ
